واخيرا...اليكم طبق الملوخية
كنت بعيدة لفترة..مع تغيير الفصول بيكون عندى خطط كتير بس معظمها راح مع الحاجات العجيبة اللى بتحصلى ..وجع فى العين ..اظبته يطلعلى حساسية..اخدلها انتى هيستامينبك...انام طبعا و شكلى يبقى زى اللى عامل دماغ..اخلص منها يطلعلى دمامل..هو فى ايه ؟ ادينى على فلاجيل و ابياموكس اصل الدمل ساب كل حتة و طالع فى حتة مش ولابد..فيها اى كولاى الله يحرقها..و قبلها شوية اسهال ميه خدتله ارسيفوريل..غير بقى الانفلوانزا اللى جات للمرة السابعة كده و اللا حاجة..ما علينا ..وحياتكم اول ما اتظبت شوية..جبت كتاب نظيرة و رحت عاملة ملوخية..ياللا ورقة و قلم حلوين كده و اكتبوا ورايا...ننزل الاول نجيب ملوخية متجمدة من عند سعود اسمها مونتانا..وبعدين شوية ميه فى حلة و عليها قرص ماجى...لما تغلى الميه و هنا لينا وقفة عشان الملوخية متوقاعش فى قعر الحلة لازم نحط الملوخية فى الحلة و الميه ام ماجى او الشوربة تكون بتغلى ده لازم جدا..المهم و الملوخية بتسيح فى الشوربة نجيب طاسة صغيرة و معلقة زيت فيها و عليها معلقة كوزبرة مطحونة و كام فص توم معصورين بعصارة التوم و نقيم النار على الطاسة-حلوة نقيم دى-ولمما المللوخية تسيح بالكامل و تغلى فى الحلة نكون حمرنا اللى فى الطاسة ده بس بلاش يتحرق يعنى لما يلون التوم نقوم دلقين اللى فى الطاسة على الملوخية اللى بتغلى -ودى اسمها طشة الملوخية-وبعدين نسيبها تغلى غلوتين و نشهاء كده عشان نديها نفس ...جمبها بقى شوية رز مفلفل و تبقى اكلة 10\10 ..وبالهنا و الشفا ..المرة اللى جاية حقوللكو الرز ازاى نعمله..ملحوظة: اللى حيتهور منكم و ينزل يشترى كام حزمة ملوخية عشان يقطفها هو اللى حيلبسها ...انا بجيب المتجمد و كان الله بالسر عليمLabels: كتاب اكلاتى يا عين
posted by reham @ 1:14 PM
1 Comments:
لسه واكل ملوخية ورز مفلفل بنفس ا لطريقه
لكن معهاهم جربي الآتي وإدعيلي :
فرخة برازيلي من ام 14 جنيه ( بلاش المصري .. البرازيلي طعمها أحسن )
قطعي الفرخه 4 واسلخيها وشيلي كل الدهن اللي عليها وإدعكيها بشوية دقيق
إطحني 5 فصوص حبهان علي 4 ملاعق كبيره زعتر ناشف وشوية فلفل اسود وملح في الخلاط
ابشري بصله وعليها شوية ثوم من اللي باقي من الملوخية وعليهم 2 كوب زبادي
و إدعكيهم مع الحبهان و الزعتر في الصينية اللي هاتعملي فيها الفرخه
إدعكي الفرخة كويس بالخلطبيطة أعلاه ( اوعي تنسي تغسلي الدقيق من عليها) ورصيها كويس في الصينيه
بس .. غطيها بورق فويل و حطيها في التلاجه و إنزلي الشغل إو نامي (لازم تسيبيها في التلاجه تبات)
حطيها في الفرن من تحت بالورق الفويل نص ساعة وبعدين طلعيها وشيلي الفويل من عليها و رجعيها الفرن من فوق 10 دقائق علشان تحمر وتقرمش
بالهنا والشفا
Post a Comment
<< Home