عاوز ابوس ..اشمعنى انا كل شويه ضرب ضرب

فاكرين فيلم نص ساعة جواز؟والله الفيلم ده فظيع
افتكرته امبارح لما عادل امام فضل يقول كده
عاوز ابوس نفسى ابوس كل شويه ضرب ضرب
عاوز ابوس
ده كا ن بيقولها وهو قايم بدور كومبارس
مشهورة برضه ليه كلمة البت دى باين عليها هبلة
المهم انا افتكرته ليه امبارح ؟
رحت امبارح المستشفى القديمة وكشفت وبتاع
المهم قابلت فى الطرقة الصحفى ده بيدور على ايه مش عارفة ومش مهتمية اعرف
قاللى حترجعى امتى بقى عشان اعرف اكتب مواضيع
قلتله ان شاء الله كمان شوية ..هو كان بياخود منى اسلوبى فى الكلام ويكتبه واللا ايه ؟
هوكذا مرة يعرض علييا حديث صحفى وانا اقوله مليش نفس
شكلى كده لما حرجع تانى يمكن يبقى لييا نفس والله اعلم
طبعا بعد ما خلصت فى المستشفى راسى اتأورت من الشمس
رحت البيت شوية وكلت المعتاد زبادى مع كريز
ونزلت جبت تونة وجبنة وبيبسى ماكس وكولا زيرو وكاكاو طعمه عجيب كده
كنت حجيب شاى كمان بس قلت لما اخلص اللى عندى الاول
طبعا بعد الزبادى والكريز الطفاسة حكمت
قمت كلت شوية تونة ..بطنى باظت واليوم لسه طويل
اتقلبت نمت زى الحمار وصحيت طبعا بشر عرق من الجو الظريف ده
خدت دش وشربت كولا زيرو ...ده عشان معنديش وقت اعمل قهوة
نزلت جرى اجدد اشتراك المكتبة وجددت معاد كتب عندى
ورحت جارية على المركز الفرنسى وانا شمه ريحة جوز هند فى مناخيرى
بتهف علييا الايام دى كل انواع الاكزوتيك فروتس الصراحة
التوت ..الكريز..اناناس..جوز هند ..وفى كمبوت فواكه عجيبة كده عند سعود يمكن اتهور وانزل اجيبه بس
الميزانية مخرومة خرم ااااااااد كده ولا خرم الاوزون يمكن اوسع
من شوية جبت كل شنطى ولميت القرشنات منها
ما كملوش 10 جنية والله..الصراحة هما 7 جنية ونص
اصل امبارح تجديد كارنية المكتبة قشطنى
والست فضلت تقول أوف وبتاع وانا عمالة اطلع لها جنية ونص جنية وبتاع
حتى فى سعود عملت كده برضة بس اللى قالت اووف المرة دى كانت اللى ورايا
عاملة نفسها هانم ومتضايقة يا حرام انى بطلع الجنيهات والخمسينات قرش وبتاع
قامت بتاعة الخزنة بعدييا قفلت الحساب بتاعها وقالت للست اللى ورايا المكنة التانية
قلتلها احسن
ما اننا مش فى اخر الشهر بس شنطتى اتفضحت امبارح
المهم فى المركز الفرنسى كان علييا ربع جنيه دين للراجل بتاع الكافيتريا
خلصت الدين الحمد لله ..مهما كان الدين بتحس ان حاجة على قفاك كده
كننا فى البريك وقعدنا نتكلم عن الافلام والكتب ومين كان عاوز يدرس طب
ومين عاوز يتجوز ومين بيفكر فى هرموناته البايظة
خلصنا الكلام بس فيه بنت يمكن 21 سنة واللا حاجة معانا كننا بنتكلم عن الجواز
وشكلها كده فى قصة حب وبتاع فقلنا ان الرجالة اتغيروا والستات كمان
هى فاكرة ان حبيبها حيطلع زى بباها طيب وحنين وبيساعد فى البيت
قلتلها اننا حضرنا مرة ندوة فى الساقية ناقشنا فيها ايه اكتر اسباب الفشل الزوجى
طلع انانية الراجل وحبه لنفسه اوى
المهم كشرت وشكلها مصدقنيش..قلتلها ولا تزعللى نفسك يمكن يكون حظك حلو بس اختارى كويس
وصالحتها واحنا خارجين ..شكلها مقبلة على الحياة وانا بقوللها خليكى واقعية يا بنتى
المهم اتطمنت انها مش مكتأبة ..غريبة ان الناس عاوزة تسمع كلام مش من الواقع اللى احنا فيه
شكلى كده حتكلم مع الناس زى ما بتكلم مع العيانين واهلهم
كله تمام والعيان زى الفل وحيقوم بالسلامة وحيبقى كويس
وهو فى الرعاية ويمكن يكون دخل فى أرست ويمكن يكونوا كمان بيلفوا عليه الملاية
ما علينا ..قال بعد كل ده العيلة مجتمعة عند عمتى على العشا
قلت ماشى طلعت على عمتى وانا متضايقة من نفسى
عشان كل ما البروفيسور يسألنى رأيك ايه ؟ نعاقب اللى بيعمل جريمة واللا لأ ؟ نحط المجرمين فى القفص واللا نموتهم ؟
أرد عليه بكلمة واحدة
je ne sais pas
لحد لما كان حيشد شعره
يعنى شكلى بنام فى المحاضرة ومش عارفة اجمع افكار ومثبتنى بموضوع بريزنتيشان زى البتاع
وواكلة تونة على الغدا من غير لمون واللى قاعد جمبى بيشرب ينسون وخايفة اوقعه عليه
وما شربتش قهوة
وبفكر ابعت سؤال للمكتبة عشان هما قايلين : عندك مشكلة ؟ عاوزنا نحلهالك ؟ اكتبلنا من غير متحط اسمك
كنت بفكر اكتبلهم :عاوزين شغل عدل مش بأقل من ألف جنيه وعرسان عدلين
كل ده وعايزنى ارد على سؤال فلسفى ؟ يا عم بقى
المهم طلعت على عمتى ..طلعت على بتها مش عليها مع انى ساعات بكون عاوزة اطلع عليها ابططها بس الطيب احسن
اصلها زعلانة على بختى وبتفكرنى بالوكسة وانا بقولها بكرة الايام تعدى -بس بكون ساعتها عايزة اعضها
المهم عند عمتى شفت كمية عيال صغيرة وناس اول مرة اشوفها
واصوات كلام بالعربى والانجليزى
والعيال الصغيرة اللى بسلم عليهم معرفش دول مين
حسيت انى دخلت فى حضانة كده وعيال تبوسنى وعيال تسلم علييا وهى مكسوفة
وواحد يبوسنى وهو ملحوس طبيخ والتانى ايده مطرحها محشى والتالت صلصة
وبنت صغيرة سلمت علييا ريحتها كريم بتاع عيانين
المهم الصورة العامة ان العيال كلهم باسونى
لدرجة كنت بسلم على ابن عمتى كنت حبوسه وهو كبير كده
والله ان ما كان متجوز كنت اتجوزته ..معلش يا عمتى
المهم العيال دول ولاد مين مهتمتش الصراحة بس عرفت من البوس بتاعهم ان الاكل محشى وفراخ ومكرونة فرن
قلت مفيش داعى كلت ايس كريم شوكولاته وخدت شاى
العيال بقى هرونى كلام على جنينة الحيوانات ...سألتهم هى لسه فيها حيوانات ؟ انا اتقللى انهم ماتوا
قام هشام ضحك قوى وقاللى اتحكالى قصة مأساوية عن موت ظرافتين فى الجنينة
والعيال بقى
auntie , i have put my hands on an alligator
i was on the back of a pony today , was faster than a horse
dad wanted me to jump on a lion !
يا لهوى ؟ ...قام هشام رد وقاللى انه شبل صغير والتمساح كان صغير
قعدت اقول دول فين الحاجات دى ؟ اصلى نفسى جدا اشيل شبل بيبى واشوف تمساح صغير
قلتله يا هشام كنتوا فى جنينة الحيوانات اللى هنا فى مصر ؟ قاللى ايوه
كان الكلام بالانجليزى والعربى بس
من كتر الانجليزى اللى فى البيت ..كلمت عمتى بيه قامت زغرتللى فضحكت قوى
هوب قام الموبايل رن
قمت دخلت فى قوضة نومها واتكلمت ..كانت مكالمة مع صاحبتى بتحاول تبرر ليه الشغل الجديد مش موافق علييا
مبررات هبلة وهطلة مدخلتش علييا
كنت عمالة العب فى البارفانات وانا بكلمها ..قوضة عمتى مليانة مرايات كتير ..ليه يعنى ؟ وبارفانات كتير برضه
ما علينا ...المهم لسه بدور على شغل عشان ده طار ..كتر خيركم يا صوحابى ..مش جى من ريحتكم حاجة
ربنا كريم وادينى لسه بعافر اهوه
المكالمة خلصت ..خرجت بره الاوضة العيال باسونى تانى عشان مشيين
افتكرت ساعتها عادل امام لما كان عاوز يبوس
العيال شكلهم لذيذ خصوصا انهم معندهمش سنان من قودام وده انا استغربت جدا منه
عشان كلهم معندهمش سنان قودام حسيت كأنهم خدوا بوكس فى وشهم كلهم بلا استثناء
رجعت البيت وانا بفكر يا ترى انهى علاقتى بصاحبتى دى اللى ضيعت علييا فرصة شغل كويسة واللا لأ؟
مش لاقية اجابة ..بس قلت الزمن كفيل انه يضيعنى من ايدها