الشبح -الفيلم

لحد دلوقتى اجدع فيلم شفته هو عمر وسلمى
لذيذ ولايت وفيه كوميديا وتخرج من الفيلم منعنش ورايق
مش مجهد للتفكير عشان الفكرة بسيطة
بس برضة انا شايفة الاعلانات بتاعة الافلام بتتغير بسرعة
يعنى ميلحقش بوستر يتحط اللا لما يتشال ويتحط واحد مكانه
وانا بستنى يا اما الاعلان عن الفيلم عشان اعرف ميته ايه
يا اما صفحات النقد فى اى جرنان
بصراحة الريتم بقى عالى قوى فى الافلام الصيف ده
ومفيش اجنبى..موسم بقى
هما مقسمين السوق والفترة اللى قبل رمضان يعنى الشهر ده واغسطس كمان
بس انا دماغى بتتلوح مع الاعلانات بتاعة الافلام عشان انا بحب السينما جدا
ومش بلحق اقرى اى موفى كريتيك
بدخل الصراحة عميانى وعلى حسب الاعلان او الممثل او الاغنية اللى بتلم الفيلم شوية
شكل خليج نعمة لذيذ بس مش عارفة حينزل امتى
جيت من السفر النهارده قلت اكيد الشبح بتاع احمد عز نزل
جبت جرنان الاربع البايت ملقتش الفيلم نزل
قعدت اقلب فى القنوات وثبتت على ميلودى عشان اقرا شوية الجرنان
لقيتهم جايبين اغنية الشبح
افتكرت من اللقطات فيلم جوست رايدر
هو مش زيه اكيد ..بس وجه الخير والشر اللى اتكلمت عليه الاغنية
فكرتنى بجوست رايدر ..بالاضافة الى اسم الفيلم نفسه
القصة اكيد متظبطة عشان يبقى فيلم اكشن لذيذ
هو حيتدخل عشان احمد عز ان شاء الله -انا عارفاكو
كلمات الاغنية شدتنى للفيلم يا عيال شكلى حروحه معاكو بس نظبت التايم
اللى بيشدنى للاغنية العزف -ده فى الاول
عشان كده معظم حفلات عزف شهرزاد بالفرقة الروسى بحاول احضرها
عشان العزف والنغمة
لما سمعت عزف الاغنية بتاعة احمد سعد -سألت نفسى
موجودة على يو تيوب على فكرة
عجبنى العزف واتشديت للنغمة
ركزت فى الكلام
لقيته حلو جدا ..ادانى فلاش باك لفيلم جوست رايدر...لازم تشوفوه الفيلم ده لنيكولاس كيدج
جامد بجد ..فيلم جميل
المهم الاغنية بتقول
سألت نفسى كتير
مرستشى يوم على بر
انا اللى فييا الخير
واللا اللى فييا الشر؟
مليان عيوب واللا
خالى من الذنوب واللا
واللا ايه ؟
واللا انا جوايا ومش دارى
الاتنين فى بعض
و500 حاجة
وملهمش دعوة ببعض
-------------------------------------
انا ساعات بحس فعلا انى انا مش انا
وبحس ان حد تانى هو اللى بيتصرف مش انا
صراع كده ابن كلب بين اللى انا عاوزاه واللى قدامى بيحصل على الواقع
يعنى ساعات بطلع الوحش اللى جوايا
وساعات بخللى الغزال يسرح وسط الناس ويدلعهم
بس فجأة بقلب
طالما الهارمونى اللى ممكن تبقى حوالايا
حصل لها جابوردى
بتحول على طول الى كائن خرافى ..تنين بقى امنا الغولة اللى تحسبه
لحد الوضع ما يتعدل
والدخان اللى بيطلع مننى مش على الفاضى الحمد لله
بتحرك عشان اغير الوضع اللى مش عاجبنى وبلاقى اللى معايا-بقية التيران يعنى
بيتنحرروا هما كمان ويهزوا طولهم ويتنيلوا يقوموا من البطشة عشان يشتغلوا
انا مليانة عيوب وعندى ذنوب
وجوايه الخير والشر
عشان انا بنى ادم
بس الخير مسيطر من جوايا على اى حاجة
وبحبس الشر
عشان انا لو بقيت شريرة حبقى فظيعة تدمير على طول
وبيجيلى فرص للشر والانتقام
وبعرف ازاى انتقم واكول عدوى ازاى
اللى بيمنعنى من التدمير
تفكيرى فى الدرو باك
وخوفى من ربنا من اثر الدروباك
فبطلب من ربنا الانتقام
وبيستجيب عشان هو عارفنى
بس انتقام ربنا ايه بقى
اللى هو ..والدروباك بقى بيبقى ميه ميه
مليون مرة احسن من الانتقام اللى انا ممكن اتكتك ليه
مش من اسمائه المنتقم ؟
يبقى لازم اسمه يتحقق على الارض