حصاد صيف 2007-الجزء التانى

نبتدى الحصاد ؟ نبتدى ..الصيف ده انا مش فاكرة ابتدى امتى ..انا اخر حاجة فاكراها ان على أواخر شهر 2السنة دى كان عندى امتحانات وبريزنتيشنز بالهبل ..ولما رجعت البيت على اخر امتحان وكان عن التسويق الطبى كنت تعبانة جدا ومن كترة الاجهاد قلت لماما لو حصللى حاجة بالليل أو تعبت قوى انقلينى على المستشفى ..كنت حاسة ان من كترة الاجهاد والتعب قلبى كان حيوقف..بس اكلت شوربة عدس وبصل اخضر فى اليوم ده وشربت ميه كتير ونمت بعد ما شربت اللبن واخدت فيتامينات بعد كده بس اتظبت ..وبعديها بأسبوع قدمت المشروع بتاع التخرج من الجامعة الامريكية وفى خلال كام يوم كننا امتحنا وخلصنا ..كان باين مكافحة عدوى فى المستشفيات ..المهم طول الدراسة فى الايه يو سى كان نفسى أكول كلب ساندوتش من عندهم ولمدة 6 اشهر مش عارفة ايه اللى منعنى من دخول الكافيتريا عندهم ..والله كنت بنسى وباخود القهوة ومعايا الجرنان فى الدور التانى او فى الحوش تحت الشمس..بعد هيصة الامتحانات والدربكة دى ابتديت أروق المكتبة عندى ..مش عاوزة ارمى حاجة كلهم أولادى ..جه شهر تلاتة جددت فيه أجازتى وابتديت اتدلع شوية وعملت بروجرام للسفر والخروج معملتش معظمه لان خطتى كنت بعدل فيها كل شوية حسب الفلوس والوقت والطلبات والاولويات ..كانت سفرية اسكندرية والاقامة فى فندق فى ميامى من أجدع الحاجات اللى عملتها السنة دى ..ركبت هناك التوصيلة بتاعتهم ووصلت للمعمورة والمنتزة وكوم الدكة وأبو قير وراس التين اللى شربت فيها احلى قهوة شربتها الصيف ده ..اهم من ده كله انى زرت مكتبة الاسكندرية كانت من اروع الحاجات اللى شفتها حسيت انى مش فى مصر اصلا ..ومن المطعم اللى فى الفندق اللى اكلت فيه سمك تلات تيام ورا بعض ابتديت لما رجعت القاهرة انى اطبخ بجد لزوم الاحتياج ولازم اعتمد على دراعى لان ببساطة مفيش حد بيشيل حد فى الطبيخ بالذات بالرغم من انى بعز قوى سندوتشات المدرسة اللى بعملها لزوم النبتشيات ..الصيف ده كمان اتأكدلى ان النادى بتاعنا لامم لامم يعنى ..والشجرة اللى كنت بقعود عليها اتنكدت تحتها من صاحبتى من ايام المدرسة عشان برضوه موضوع النيلة الجواز وسنينه ..من ساعتها مروحتش تقريبا يمكن من الحر واللا الزهق مش عارفة ..طبعا التمشية فى وسط البلد بقت بسيطة جدا مع الجو الرهيب اللى عشنا فيه الصيف ده فبقيت بشترى الحاجة من محل واحد واجرى اخود تاكس اروح على طول..لقيت فى مكتبة الاسرة والقراءة للجميع كام قصة حلوة اشتريتهم بسعر معقول خصوصا لأورهان باموك بس لسه مقرتش منهم حاجة وقصة عجيبة كده اسمها الفسكونت المشطور شكلها فلسفى وشكلها تتقرى تحت اللحاف فى الشتا ..القصص والافلام بقى عايزالها فردة لوحدها مش حقولها دلوقتى ..بس من اكتر الحاجات اللى تعبتنى الصيف ده التدوير على شغل ..ملقتش ..مفيش اللا شغل المستشفى اللى انا فيها وعلى الله كمان يفضل موجود..بالنسبة لماجستير الجراحة اتطلب منى دراسة موجودة على النت اصلا يعنى حاخودها كوبى وبيست وادفع تمنها طبعا عشان الارتيكلز مش بالمجانى وزودوا علينا المصاريف قوى فى الدراسات العليا قمت قلبت الماستر دبلومة واهى ماشية عادى يعنى مش بتقول لأ..الصيف ده كتير ناس ظهروا قوى بالصورة الواقعية بتاعتهم ..القناع وقع من على الوش تماما ولقيت وشوش وحشة قوى ..كانت مخبية الخرا ده فين مش عارفة ..وليد مات السنة دى فى شهر ستة ومصدقتش ان صاحبى ده مات ..هو كان حلقة الوصل الاخيرة بينى وبين دكتور كنت بحبه وعرفت فى العزا انه حيخطب وعزمنى بنفسه ..دكتورة زميلتى كنت معتبراها اختى الصراحة ضربتنى فى ضهرى فى الشغل الجديد اللى كنت حتقبل فيه بس ربنا عوضنى ببداية دراسة لموضوع فى الطب مريح الى حد ما وربنا يجعله فتحة خير علييا قولوا ان شا الله ..بعد حكايات العزا وفركشة اخر خيط فى موضوع الارتباط وفقدان الفرصة فى شغلانة انا كنت شايفاها حلوة ..رحت الحسين عشان اغسل همومى شوية ..صليت الجمعه مع الناس وشفت ناس زيى بيلجأوا لربنا بعد ما اتسدت فى وشهم -الهى تتسد فى وشوكوا يا بوعادا قادر يا كريم-ربنا يفرجها علينا كلنا ويطلعنا منها على خير يا رب..المهم مع الروحانيات دى خرجت اتمشى فى الخان ولقيت بدلة الرقص دى قمت صورتها ..الحسين من الاماكن اللى ليها طعم مميز..اذا كان فيه وقت فى رمضان يمكن اروحه تانى ان شاء الله ..يعنى باختصار سافرت اسكندرية وشفت كام فيلم وسمعت كام اغنية وقريت كام قصة وشفت ناس على حقيقتهم وحضرت عزا وحضرت فرح وسمعت عن خطوبة فلانة وفلان وجوازفلانة وفلان وحولت دبلومة مش ماستر..المترو حاولت اتجنبه عشان الروايح اللى فيه فى الصيف محدش بيستحمى اصلا ..ركبتة كام مرة كده على الماشى ..اكتشفت على اخر الصيف انى بعد ما جبت هدوم للبيت وقمصان نوم صيفى انى معنديش لبس صيفى كفاية ..ياللا ادينى بحاول ألحق الايام دى ..لسه فاضللى كام ورقة كده بين الجامعة والقصر والمستشفى والنقابة -يا لهوى-عشان أخلص ورق من ماستر لدبلومة ..ودمتم