برنامجكم : معاك ع الدكة

عبر الأثير يستمع الناس فى الشارع لأغنية أهلا رمضان رمضان جانا..يتخللها نحنحات وكحكحات جعلتهم يرتابوا فى مصدرها..يظهر صوت المذيعة اذ فجأة..عزيزى المستمع ميا مسا..برنامجكم معاك ع الدكة يهنئكم بحلول شهر رمضان اعاده الله علينا بالخير والبركة..ويوعدكم انكم مش حتغيروا المحطة عنه ابدا ..قرر معد البرنامج اننا ننقل نبض الشارع مباشرة ع الهوا..حسبنا الله ونعم الوكيل انه حينزلنا فى عز الولعة..نبض الشارع فى الايام الاخيرة قبل رمضان واثناء رمضان باذن الله..الله يصادفنا الان أول مواطن معاك ع الدكة..نتشرف بحضرتك؟..وحياة ابوكى سيبينى فى حالى..عاشت الاسامى يا استاذ وحيات..يا ترى حضرتك بتستعد ازاى لرمضان؟...رمضان يا ستى فاضل عليه يومين..عارفة بس انت ناوى تعمل ايه؟..انا ناوى ادخل جمعية واقبضها الاول..ويا ترى حتتصرف فيها ازاى ؟..ماهو حضرتك انا قاعد ع الدكة بفكر اصرفها ازاى ....طيب وفكرت ؟..اه يا ستى..كان نفسى اعمل تلات حاجات قبل الصيف ما يروح كان نفسى اروح فيلم كابتن هيما بس اكيد حتطلع قصة واحد بسيط بيحب بنت كلاس وبيتنافس على حبها راجل بسبس مان ايده طايلة..قلت بلاش اروح قصة متعادة..وفكرت انى اروح السيرك المصرى الاوروبى بس قلت طب واروح السيرك لية؟مش كفاية السيرك اللى انا عايش فيه كل يوم..ده انا حتى ماشى على الحبل..وكمان انا شفت استعراض الاسود فى قرية الاسد وانا راجع من اسكندرية من كذا سنة وانبسطت جدا فبلاش القرشين نفرتكهم على حاجة انا شفتها قبل كده..يا سيدى شبرق نفسك واتفسح..يا مودام انا عندى مصاريف متلتلة ورمضان داخل واقل يوم بنزل فيه السوق بصرف ما بين 30 ل50 جنية وساعات سبعين على حاجات ضرورية..طيب حضرتك والتلتة ؟ اكيد تبتة بقى مش كده هى هى هى هى ..اه اكيد تابتة بس انا أجلتها لبعد العيد..كل سنة وحضرتك طيب وبعودة الايام..الله يخليكى يا ستى سيبينى فى حالى بقى..قبل ما نمشى حضرتك ممكن تقولنا حلمك اللى حلمته فى اخر ليلة صيف؟..والله انا ما حلمتش ..انا فكرت فى رغبتى التالتة اللى هى اروح فيها مسرحية كوميدى عشان نفسى اضحك..ربنا يحقق لك الامنية دى ويقدروا ممثلينا انهم يضحكوك شوية..اه والنبى ادعيلى..داعيالك يا ضنايا..وهكذا حضراتكم استمعتم لحلقة من برنامجكم معاك ع الدكة..نرجو ان نكون قد اسعدناكم..المرة اللى جاييا نلتقى فيها باذن الله فى سحور اول يوم رمضان..حتى ذلك الحين لكم مننا اطيب الامنيات والدعوات ..وسلامات