مع السلامه
تعليق طارق شرف الدين تـاريخ
٦/٨/٢٠٠٩
كنت أتابع سفر أسرتى على العباره السلام 98 وفى آخر اتصال لى معهم كان الحوار كالتالى=========== طارق - اخبارك اية يا محمد--- محمد - احنا بخير الحمد لله--- طارق - عملتوا ايه حجزت كابينة ؟--- محمد - لا مافيش كباين فاضية كلها مليانة وحجزنا فى البولمان ----- طارق - ازاى تحجز فى البولمان انت معاك امك واخواتك بنات المفروض تاخد كابينة بأي طريقة --- محمد - خلاص يابابا مافيش مشكلة احنا فى البولمان وقدامنا التليفزيون واحنا مرتاحين ماتقلقش والسفينة خلاص اتحركت والخط هايقطع---- طارق - طيب خد بالك من اخواتك وامك واول ما توصلوا مصر تتصل بيا على طول---- محمد - حاضر يا بابا مع السلامة--- طارق - مع السلامة .. مع السلامة .. يا أغلى من رأت عينى---- مع السلامة .. ياكل اللى فات واللى جاى فى حياتى--- مع السلامة .. يا كل دنيتى وعمري--- مع السلامة .. يا كل ضحكة وبسمة ونكتة--- مع السلامة .. يا مدرسة ودكتور وغدا وعشا وعلاج--- مع السلامة .. يا أدب وتربية واخلاق---- مع السلامة .. يانور الشمس وضي القمر--- مع السلامة .. ياسند يا عكاز--- مع السلامة .. يالمة وشلة ورحلة--- مع السلامة .. يا فيلم وكتاب ومسرحية--- مع السلامة .. ياسهرة تليفزيونية--- مع السلامة .. يالب وسودانى وشوية فول وطعمية--- مع السلامة .. يا مش بالطحينة وأكلة رنجة وفسيخ--- مع السلامة .. يا رز وسلطة وشوية طبيخ--- مع السلامة .. يا كيلو لبن وحتة جبنة بيضا مع بطيخ--- مع السلامة .. يا رمضان ودخلة العيد--- مع السلامة .. يا عيدية ولبس جديد--- مع السلامة .. يا جنينة وموبايل وملاهى فى يوم سعيد--- مع السلامة .. يا ريحة حلوة واكلة طعمة فى النادى قدام البسين--- مع السلامة .. يا قلوب طيبة--- مع السلامة .. يا حنينين--- مع السلامة .. يا خناقة كروية ومين كسب مين--- مع السلامة .. يا غنوة حلوة فى العربية .. مش ناسيها طول السنين--- مع السلامة .. يا احرام جميل لبسناة فى الحرمين--- مع السلامة .. يا طواف وسعى ومنى وعرفات ومزدلفة .. ورجم الشيطان الرجيم--- مع السلامة .. يا شواية وفرخة ولحمة وهبشة وخطفة وضحكة--- مع السلامة .. يا بلطية مقلية وشوية بطاطس محمرين--- مع السلامة .. يا بحر وشمسية واحنا كنا مصيفين--- مع السلامة .. يا كتاب وكراسة وقلم وبرايه ومين اخدألوان مين--- مع السلامة .. واغسل العربية وخلى بالك من البنزين--- مع السلامة .. يا كرت شحن والرصيد خلص ياتري كنت بتكلم مين--- مع السلامة .. يا رنة ورسالة وكمان مادلية المفاتيح--- مع السلامة .. يا مصلية ويا سبحة للتسابيح--- مع السلامة .. يا عباية وجيبة وبدلة--- مع السلامة .. يا مريلة وشراب وشنطة--- مع السلامة .. يا شجرة زرعتوهاأساميكم عليها مكتوبين--- مع السلامة .. يا لعبة وعجلة وعروسه وعربيتين--- مع السلامة .. يا جهاز الولاد وكمان البنتين--- مع السلامة .. يا شيكولاتة وشيبسي ومصروف المدرسة والكانتين--- مع السلامة .. يا شوارع تعدوها تبصوا شمال ويمين --- مع السلامة .. يا شيلة حلوة على السلم لما كنتم نايمين--- مع السلامة .. يا شهادة المدرسة .. مع السلامة يا نجحين--- مع السلامة .. يا ظابط يا دكتورة يا مهندسين--- مع السلامة .. يا حلم حلمتوه صاحيين--- مع السلامة .. يا أتوبيس وتاكسي معاكم فلوس ولا مفلسين--- مع السلامة .. يا شريط كاست وكمبيوتر واسطوانة سي دى--- مع السلامة .. يا أتاري وبلاي استيشن وجاكات بايظين--- مع السلامة .. يا خناقة على ماتش او فيلم وانتم سهرانين--- مع السلامة .. يا صحة وتطعيم يحميكم من المرض اللعين--- مع السلامة .. يا سلسلة وغويشة دهب او مقلدين --- مع السلامة .. يا خضة ورعشة لما كنتم عيانين--- مع السلامة .. وانتم ماشيين--- مع السلامة .. يا فرحتى بيكم وانتم راجعين--- مع السلامة .. يا بمبرز وكفولة وملاية اتغيرت لما كنتم فى البرد نايمين--- مع السلامة .. يا طفولة وصبا وشباب--- مع السلامة .. يا بنات حلوين--- مع السلامة .. يا تيتا وعمو وخالو--- مع السلامة .. يا دنيا انطفت كنتم فيها منورين--- مع السلامة .. يا كل العالم اجمعين--- مع السلامة .. يا شجرة زرعتها بقت فروعها مقطعين--- مع السلامة .. يا بنت فاروق--- مع السلامة .. يا ولاد شرف الدين--- مع السلامة .. يا كل الدنيا--- اللهم اجعلنا من الصابرين--- مع السلامة .. مع السلامة .. مع السلامة .. طارق شرف الدين ============================ مع السلامة .. يا بلد صوت الحق فيكى مالهوش رنين
Labels: almasry alyoum
posted by reham @ 11:49 AM
0 Comments:
Post a Comment
<< Home