قل لى ماذا تقرأ

يا رب سايقة عليك حبيبك النبى تخلصنى من اللى انا فيه.....هكذا اقول لنفسى وانا اخطو اليوم اول يوم فى الشهر الثالث من علاجى من الالتهاب الرئوى...لم استطع ان افهم ما معنى ان يقول لى المصريين فى الغربة ان حدوث هذا الالتهاب كان من سوء حظى؟
..جعلتنى هذة الاقاويل افكر كثيرا فى معنى كلمة الايمان ..والتى كنا ننافشه بأربع لغات من عدة اسابيع فى ستار باكس باليابان..واستطيع ان اقول اننى ولأول مرة فى حياتى استطيع ان افهم معنى كلمة الايمان بالقضاء والقدر...كانت من المسلمات فى حياتى..ولكن فترة حياتى السابقة كانت تقوم على الحسابات ..عملا بمبدأ اللى يحسب الحسابات فى الهنا يبات..وكانت ماشية معايا مرة حلاوة على مرة خيبة أو بالاحرى مرات..الوقعة بتاعت العيا المرة دى مش سهلة ولا هينة..دخول مستشفى مرتين فى اقل من 3 شهور فى حالة خطر..مع تأجيل الدكتوراة..والله حد نشاها عين ..حسبى الله ونعم الوكيل..مع كل الألم اللى بييا ودخولى أهوه الشهر التالت فى علاج مكثف للالتهاب الرئوى مع معاناتى من مضاعفات المضاد الحيوى وما يتبعه من اسهال ميه والاتهاب باللثة ووجع الاسنان- لا اراكم الله وجع السنان بجد-مع الاجهاد الشديد والاحساس الدائم انى خلاص حيطلعلى ديل من كترة الادوية...المهم فى وسط كل ده قدرت افهم المعنى الحقيقى للايمان بالقضاء والقدر..لأن اللى انا فيه دلوقتى مش نتيجة حسابات تحتمل الخطا والصواب...دهع قضاء وحكم من ربنا وانا بنفذه..طبعا أول ما الجزع والعياط خفوا شوية..ابتديت أهدى و افهم معانى تانية للايمان...بس يا رب الامتحان المرة دى صعب كتير..صعب قوى والله ...أدعولى ربنا يخفف عنى ...مش عاوزة أقول كلام غير كده دلوقتى..بس لمل أخلص حبقى أحكى كل حاجة..عشان بجد انا محتاجة أفضفض للبلوج عشان قلبى النونو ممكن ما يستحملش كل اللى حصل له فى ألفين وتسعة...وعشان يقدر يستحمل ويكمل لازم يحكى..وانا ححكى باذن الله