contingency plans

النهاردة كان يوم البريك بتاعى و يا لها من بريك ..انا قمت الصبح بتدلع وسمعت فيروز وفطرت القط بتاعى وظبطت التليفزيون وعملت الاكلة المفضلة بتاعتى تونة باللمون والبصل ودخلت نمت تانى كسل بقى..قمت جبت الشنطة عشان اشوف فى النوتة ايه اللى متأخر علييا معملتوش..الصراحة كنت بقول نخللى اليوم النهاردة هادى كده وابن حلال وأدلع نفسى فيه شوية..قام دق التليفون ودى كانت نهاية روقان الدماغ عشان المكالمة كانت كلها صوات وعياط وزعيق وضحك ..مجموعة من المشاعر المتلخبطة..التليفون كان من انتيمتى وصاحبة عمرى بتبلغنى بالخبر السعيد اللى خلانى اعيط وبعدين ازعق وبعدين نضحك
هى دكتورة بردو..قلت لها من فترة يا بنتى أوعى ندخل سن الاربعين معانا مرض بسبب السترس..لازم نعمل سترس مانجمنت و يكون عندنا خطط بديلة لما الخطة الرئيسية لحياتنا مش ماشية زى ما احنا عاوزين ونتجدعن كده ونتسند على بعض واهيه حتمر الايام بالحلو والمر و اكيد حنوصل فى الاخر ولازم نثق ان الله حيحط ليينا بدائل كتير عشان ننجح فى عز الغلط اللى حوالينا ..البنت كانت مصدقانى فى الكلام ده بس مكانش عندها خطط بديلة لما الدنيا طبلت
قامت كتمت فى نفسها واهه اتصلت بييا بتبشرنى بلخبطة جهاز المناعة عندها واللى ابتدى يهاجم الاوتار بتاعة العضلات ويسبب الام شديدة مش بتخليها تنام ..انا عيطت ..مش ده يوم الاوف بتاعى لازم يحصللى كده
فكرت فى كلامها كتير وسرحت هو ليه دايما احنا بنمشى بالقلم والمسطرة؟ ليه بنمشى زى الكتاب ما بيقول ؟
الظروف بتتغير يا جماعة مع الاجيال والسنين اللى بتمر..تفتكروا الحلول اللى من 10 سنين فاتوا تنفع دلوقتى؟
مفتكرش
طيب انا بقى اعيش زى ما انا عايزة عشان دى حياتى
طز فى الماجستير يا بنتى طالما انتى متبهدلة كده ..فيه خطط بديلة للماستر..مالها الدبلومة ؟ كفرت ؟
ليه اصلا فاكرة ان بعد التخرج حنشتغل فى مكان كويس ونتجوز عرسان كويسة و نخلف عيال كويسة ونعيش عيشة حلوة؟ هو انتى مش واقعية واللا ايه ؟ مين فى دفعتنا وصل لحاجة عظيمة بعد التخرج ..مش كلنا فى الهوا سوا ؟
ايوه اتضحك علينا واتقال ليينا ان الطب بيوكل الطب بيعمل مركز الطب بيدى فرص فى الحياة والجواز..بس ده كله احنا مشفناش منه حاجة..يبقى طالما هو مش محقق ليينا اللى عاوزينه يبقى نسيبه ونشوف حاجة تانية اقل فى السترس واكتر فى الراحة النفسية والسعادة..انتى بتستهونى بالموت اللى بنشوفه ؟ بتستهونى بالضغط اللى عليينا فى الشغل؟ بتستهونى بقلة القيمة اللى بنشوفها اول كل شهر ساعة القبض واحنا بنشوف نظرة التشفى فى عيون اللى اقل مننا و بيظهر منهم الانفريوريتى كومبلكس ؟
كلمة واحدة واخيرة طالما حتتعلجى يا بنتى لمدة سنة عاوزة تحققى معادلة الطب الناجحة لازم تهاجرى و تعملى امتحان المعادلة..مش عايزة تسيبى هنا يبقى لازم نعيش رجالة ونقف واقفة رجالة مش مع كل صدمة نقع.. مفيش لا وقت لكده ولا فيينا صحة نحارب المرض فى نفسينا مش كفاية العيانين اللى حوالينا ؟
ولازم يا أمى يبقى فيه خطة بديلة لاى خطة عندنا فى حياتنا ..يعنى مثلا اسيب نفسى متلحوسة فى مصيبة وانا شايفة ان فيه طريقة تانية للنجاح ؟
مش فاكرة الدكتور اللى راح لعرافة تقراله الطالع قالتله اول 10 سنين فى حياتك حيبئوا صعب أوى و مليانين تعب ومشاكل وشوية نجاح على شوية فشل ..قام قال لها هاه وبعدين؟ قالت له وبعدين ايه يا ولدى؟ حتتعود على كده
مش فاكراها دى ؟ اضحكى بقى