هدوء

معنديش بلكونة عشان افطر فيها
صحيت الصبح مليش مزاج افتح الشباك بدل الهوا السخن بتاع الفرن اللى احنا فيه يدخل
اسبوع عنيف مليان تدوير على شغل
على خناقات ملهاش لازمة على حالة وفاة على خروج حد تبعنا من المستشفى
على نجاح فى الثانوية العامة
على حلويات شامى وتين شوكى ومحشى بتنجان عملوا امساك عنيف
على تشخيص انسداد فى شرايين الرجلين-مزمن..الحمد لله دلوقتى ماشى على علاج
على جرايد الاسبوع اللى متقرتش
على مكالمات تليفون طويلة وقصيرة
على سفر وحر وانقطاع الكهربا ونمل..نمل كتير قوى
على ساعة بتكتك جامد فى السكن لدرجة انى حسيت انها صوت رجلين راجل
خليتنى صاحية طول الليل مع قصة شدتنى ومش مصدقة انها اتكتبت من اكتر من عشرين سنة
مع وشى اللى اسمروالقوضة بتاعتى اللى محتاجة معجزة عشان تترتب
على تحضير طرد لاخويا ..مع تزويغات من زميلتى اللى ضربتنى فى ضهرى
بااااااااااااااااااااااااااااس كفاية...... شوية هدوء بقى
تحميل اغانى كتير معظمها سلو وتشغيل السماعات بصوت واطى
وقوف فى الحمام اللى عامل زى الساونا قودام المراية
تفكير..مجرد تفكير فى محاولة الفطار يوم فى مكان هادى محدش يبقى معايا ولا حد يعرفنى
الخروج من التهييسة دى على فنجال قهوة بعدية شاى
بطنى جاعت اكلت مسقعة وفلفل اخضر وخيار..بطنى اتنفخت مع احساس شديد بالرغبة فى الترجيع
تفكير فى البريزنتيشان
نشر الغسيل مع تصبين اطباق الفطار اللى اصلا فطار على غدا
تدوير فى التى فى على حاجة تتشاف
يعقبه قفل كل الاجهزة تماما وتحويل الشقة الى مكان ضلمة
فتح المراوح على الهادى
تغميض العنين على الكنبة فى محاولة لايجاد الهدوء ولو بالايحاء
مخى بيلف فى دواير
لولو القط بتاعى بينط على حرف الكنبة ..خضنى
طنشته وغمضت عنييا
هو كمان غمض عينيه وصوت القر بتاعه بقى عالى فى الهدوء المصطنع اللى بيكسره صوت عربية فى الشارع
على صوت هبدة كورة على السلم وصوت رجلين طالعة ونازلة
مش حنزل اعمل حاجة النهارده
حدخل انااااااااااااااااااام