تصالح مع اللى فات

انت فاكر لما كلمتنى قبل العزا بتتأكد اذا كنت جاية واللا لأ
وخليت السكرتير بتاعك يكلمنى على معاد العزا ومين من زمايلنا حيبقى موجود عشان نقف مع صاحبنا فى موت اخوه
فاكر انت قلتللى ايه ؟
مكلمتنيش عشان العزا من اساسه كلمتنى عشان تقوللى ان خطوبتك الخميس اللى جى
تفتكر انا لسه بفكر فى اللى فات ؟
انت كده تبقى واهم ولسه مفهمتش الدنيا
ولسه برضه مفهمتنيش ..واللا فاكر نفسك بالخطوبة والجواز انت كده عملت انجاز؟
واللا اياكش فاكر انى ممكن اعيط تانى فى التليفون
بتحب تسمع صوت عياطى فى التليفون للدرجة دى ؟ فاكر انى لسه متعشمة فى امك ؟
انت فاكر الدنيا خدت منى وبتديلك ملو ايديها
انت عارف انا عارفة انى بودنى دى حسمع منك فى يوم من الايام ندمك على انك سبتنى
وحتقول ولا ضفر منك يا ريهام
انا متأكدة ..دى مش اول مرة ..انا عارفاك
بتعزمنى كمان على فرحك ؟ ححضره ..ايوه حاجى و اشوفك فى الكوشة واباركلك كمان
اكيد عروستك حتبقى حلوة انا عارفة ذوقك
واكيد حتبقى عكسى تماما فى كل حاجة
بس انا متأكدة انى لسه حتيجى الايام لييا بالسعادة والعوض من عند ربنا
ربنا اللى كان دايما بينى وبينك وعمرى ما انتهكت حرمته
ربنا اللى اديتله وعد انى اذا اتجوزتك حسعدك على قد ما اقدر واحافظلك على مالك وعيادتك
انت قطعت كل ده وخليتنى ازعل وعيطت
بس ده من كام سنة فاتت ؟ مش من كتير قوى ؟
انت زى ما انت متغيرتش ..بس انا حصل فييا تغيير
انا اتصالحت مع نفسى خلاص وبطلت اجلدها وبطلت احسسها بالذنب
انا كنت بحس بالذنب بروحى بس
بس انت حتحس بالذنب بجسمك وروحك وحتحس بالخسارة على كل المستويات
عارف ليه ؟ مش عشان سبتنى
انت حتى لو رجعت مش حنتجوز عشان جوازنا مكتوب عليه الفشل عشان انا اتغيرت وعنييا فتحت وشايفاك شيطان قصادى
عارف ليه حتحس بالخسارة ؟ عشان الاحساس ده حيبقى جى من جواك
عشان انت مش بيملى عينك اللا التراب
كويس انى احضر فرحك قبل ما اسافر
كويس كمان ان العروسة مش انا