مرزوق وتفيدة -الحلقة 10

البوكس هارى نفسه دوريات خصوصا فى الشوارع الجانبية والضلمة ..لمحوه وهو داخل ناحية الشارع اللى هما فيه قامت تفيدة نغزت مرزوق فى جنبه ..فطلعوا جرى يستخبوا ورا الشجرة اللى فى الجنينة القريبة ..مرزوق وتفيدة اتهدوا من مشوار المهندسين ده ومخهم هنج من كترة التفكير فى مستقبلهم ..بس كان قلبهم فرحان قوى انهم لقوا بعض فى الكلية دى اللى مدينها اسم الشهرة : المخروبة ..واتفقوا انهم يحطوا ايدهم فى ايدين بعض لحد ما ربنا يفرجها عليهم

تفيدة : بس نشتغل ستيب باى ستب
مرزوق: يعنى ايه ؟
تفيدة : مالك يا مرزوق؟ ده انا حبيتك عشان ذكائك حتخللينى اشك فى قدراتك واللا ايه
مرزوق: قدراتى دى محدش يشك فيها ..دنا مرزوق يا جميل ..ممكن بوسة يا قمر
تفيدة : لأجل خاطرك بس خود واحدة من هنا

تفيدة لسه بتشاورله على خدها الشمال اللى ناحية مرزوق وهما قاعدين تحت الشجرة فى الضلمة قام فى النور الخافت اللى يا دوبك بيه شايفين بعض..طلعلهم فار من المجارى اللى طافحة جنبهم

الفار: مممكن بوسة انا كمان ؟
تفيدة ومرزوق على نفس واحد:اه ه ه ه ه ه ه ه ه ه

قاموا جريوا من مكانهم ..ايه اللى جاى يكلمهم فى الضلمة ده ..فضلوا يجروا يجروا ..نفسهم اتقطع ..لما ايتدى الهوا النضيف يشيل تأثير الهوا الفاسد وريحة الامونية اللى كانوا قاعدين جنبها من دماغهم ..ابتدوا يفوقوا ..وابتدوا يهدوا السرعة لحد ما فرملوا رجليهم عند أول الحتة بتاعتهم

تفيدة : عمرى ما شفت فيران بتتكلم ..وانا شخصية لا أوئمن بالخرافات فطبعا احنا اتهيألنا انه بيتكلم نتيجة الامونيا والسيجارة الهباب اللى خمسنا فيها بعد ما بوستك يا منيل
مرزوق: خرافات ؟انا برضة مش بحب الخوزعبلات والخرافات والتهيؤات..بس هات هات يا جميل هات اى بوسة منك هات
تفيدة :احنا تحت بيتكوا يا مرزوق اتلم
مرزوق:حاضر ..طب اكلمك بالليل عشان تدينى بوسة
تفيدة :قلت لا ..فواتير التليفون نار يا مرزوق بطل حركات المراهقين دول
مرزوق:طب بوسة واحدة فى التليفون وحقفل على طول
تفيدة : طيب .بس اتأكد الاول انى انا اللى رديت بدل متلاقى نفسك بتبوس أمى زى الطروبش
مرزوق وشه اصفر وبلع ريقه : امك ..يا حفيظ
تفيدة :انا حمشى بقى ..وبعدين امى ست طيبة مش زى امك

ام مرزوق طبعا لما اتأخر بالليل قامت قلقت عليه واتشعبطت على سور البلكونة الصغيرة اللى بتطل على الشارع ودلدلت نفسها من الشباك عشان تبص عليه وهو جاى ..سكتت خالص لما لقيته واقف تحت مع تفيدة وعمالين يتكلموا ..مهما حصل من تفيدة فهى جارتهم وبتحبها ..ام مرزوق على عكس تفيدة ما هى ظانة بتحب تفيدة

ام مرزوق: مش حتبقى مرات ابنى ..ده مرزوق ..ربنا يديك يا مرزوق
مرزوق وهو بيفتح باب البيت : يدينى ايه يا أما ؟
ام مرزوق بحنية : يديك كل اللى نفسك فيه يا حبيبى
مرزوق: الدعا يكمل على اللى انا ناوى اعمله ..لازم ابقى متكل على الله مش أنام وادعيله انه يفرجها ..لازم اشتغل وانحت فى الصخر وانا بدعيله عشان يفرجها علييا
ام مرزوق بافتخار : اسم الله عليك يا مرزوق

مرزوق سمع اسم الله عليك دى مرتين ..مرة عشان امه بتدعيله ومرة تانية قالتهاله لما اتكعبل فى السجادة اليتيمة اللى فى بيتهم لما باس امه ولف عشان يدخل قوضته وشايل معاه التليفون ..قام اتكعبل فى السجادة وفى سلك التليفون ..بس ربنا ستر ووشه محصلوش حاجة ..التليفون بقى كان محتاج يتظبط شوية ..قام جاب المفك وقعد يظبط فيه ..يظبط فيه ..ويتكى عليه ويفعص فيه ويخبط على البوكس بتاعه ..ام مرزوق جت جرى لما سمعت الهبد والرقع ده كله

ام مرزوق: ايه ؟ انت فاكرة لعبة ؟. هات اما اصلحه

وبهبده واحدة من هبدات ام مرزوق اللى متعودة تديها لمرزوق..هبدت التليفون قام نطق وطلب كمان نمرة تفيدة ..قام وش مرزوق نور واحمر ..ام مرزوق فهمت قامت انسحبت من سكات وخرجت بره الاوضة

مرزوق فى التليفون بتنهيدة : اخود بوستى بقى

اللى على التليفون : اهوه

مرزوق : تصبحى على خير يا تفدفد
اللى على التليفون : انا مش تفيدة ..انا امها ..اطلعى يا بت يا تفيدة من على الخط التانى ..ودين النبى يا مرزوق ان ما ركزت فى مذاكرتك انت وتفيدة وخلصتوا البكالوريوس السنة دى لحتشوف حعمل ايه ..حقطعك حتت حتت ..تفيدة سابت عريس لقطة عشان خاطرك لما نشوف حتعمل ايه بعد التخرج
مرزوق: والله يا ام تفيدة حتشوفى حعمل ايه ..تفيدة دى عينايا من جوه ..ربنا يحفظهالك
ام تفيدة : ومادام انت بتحبها كده ..ما تيجى تقرا الفاتحة واللا عاجبك ان بنتى يتقال عليها فى الحتة بدل دكتورة ..بتاعت مرزوق ؟
مرزوق : ميخلصنيش ابدا ..ما انا حاجى ان شاء الله بعد الا.....

ام تفيدة ابتدت تقرا الفاتحة بحس عالى فى التليفون بالاشتراك مع تفيدة اللى لسه فاتحة السكة من الخط التانى ..مرزوق كمل معاهم قراية الفاتحة وبعدين اول ما حط السماعة .. قام فى وسط القوضة بتاعته

مرزوق فى نص الاوضة : لولولولولولولولولولولولولولولولولولولولولولوىىىىىىىىىىىىىىىىىى

مرزوق بيزغرط لنفسه