انا والعيال والمدارس فى رمضان

الورق اللى بطلعه والله مطلع عينى ..فعلا ومبهدلنى
يعنى مثلا خلانى أقعد انا وماما على قهوة بلدى
بتعاتبنى ماما بقى : بقى كده يا ريهام؟ قهوة بلدى على اخر الزمن ؟
يعنى دى اول مرة ليكى يا ماما ؟
مش أوى..انا قعدت على الفيشاوى قبل كده بس مش بلدى
قامت فجأة جت ست قعدت جنبى على الكرسى اللى لازق فييا وطلبت شاى
قعدت أضحك وقلت لماما مش احنا بس ردت الست بتقول :ماهو انا بلف على رجلى طول اليوم لازم اشرب شاى
واظبت دماغى ..جه الولد كان نفسى اطلب سحلب وطاولة عشان ألاعب امى ..قصادى على ما تطلع الاوراق ساعة ونص
قمت طلبت سحلب بس
كان قاعد برة فى الشارع على القهوة 6 ستات كمان..قللى الولد كده لما جاب السحلب والشاى
يعنى خلوا البساط أحمدى
كلهم موظفين ..زييى ..انا لما عرفت انى متصنفة موظف مش دكتور زعلت قوى
بس مسيرها تتعدل
الورق بقى اللى بطلعه واخد كل وقتى وتفكيرى
لدرجة انى حلمت ان الست اللى مدوخانى السبع دوخات مديانى ورقى وبتختمه بختم كبير قوى أحمر مكتوب بيه
rejected
اه والله وقعدت أعيط جامد واجرى فى الشارع
قمت من النوم مفزوعة ..بدعى على الولية
على رأى ماما مسيرها تيجى تحت ايدى
وساعتها نياهاهاهاها
حعلقها من السقف بس مش حعمل حاجة تانية
المنطقة بقى عندنا ..يا حلاوتها
ملياتة على اخرها مدارس وعيال
عيال كتير قوى قوى قوى
مش بتعرف تمشى برجليك اصلا
العربية بقى بتقفل الموتور وتفتح الجرنان أو تسمع ووكمان لحد ما تفرج
عيال بتمشى تديلك كتف
أو تجرى ورا بعض بتقول أيوه هرم ..واحد هرم..ما شاء الله عندهم ميول ميكروباسيه عنيفة
بكرة تركبه يا حبيبى وتشبع من وشه وكركرته وسواقه اللى بيجرى بيك طيران وانت بتقرا الفتحة وبتتشاهد على روحك
فيه عيال لذيذة ..مثلا تمسك كيس البوزو فى مكتبة مبارك وتتخانق مع الراجل انها عاوزة اتنين بس مامتها
قالت لها واحد بس
تقول له هات 2..ماما حتدفع
ضحكتنى قوى والله عشان انا لسه أهلى بيدفعوا لحد دلوقتى على دكتور
مفروض انه مؤهل انه يوكل نفسه
بس ال200 يعملوا ايه ؟
يمكن ربنا ينفخ فى صورتهم ويبقوا 500 فى يوم ..يا رب
فيه بقى عيال تانية بيعاكسوهم الناس اللى فى الشارع اللى يعرفوهم من قبل اجازة الصيف
يقول له أه شفت بقيت عريس أهوه
أبص للولد ألاقى بوادر التستوستيرون باين على وشه..شنب الصرصار يعنى
وأقول لنفسى البنى ادم هنا الناس فاكراه انه راجل بالهرمون وبتاع
مش مثلا يسأله عمل ايه فى أجازة الصيف؟ ضيع وقته واللا استفاد واتحضر لمواجهة الدنيا؟
لأ..أهم حاجة يتطمن على المسائل ..حبيب قلبى ده اللى عامل لنا مارش ايرير لوارا
رمضان بقى لسه مش عارفة أظبط الاوقات ..بس حاسسة ان دماغى طايرة
حتى فى المترو النهاردة حسيت انى بتحرك توماتيكى
روبوت متبرمج..أقطع التذكرة ..أمشى متبرمجة على الناحية بتاعتى ..حتى بطنش اللى بيمسك العصايا من ورايا عشان يعدى شعبطة
أوصل محطتى ..انزل ..اشترى الجرنان..موظف بقى ..اتصل بالبيت عاوزين حاجة ..أه ..لأ ..على حسب
بفكر انى لسه ممسكتش المصحف عشان أقرا ..اليوم كله فى الشارع وبنام من 9 ونص عشان اصحى اتسحر وانام تانى
التليفزيون مش عارفة مالوه ..بس فيه بارقة أمل فى مسلسل حنين وحنان
شكله لذيذ..قريت انه حيترجم عشان يتعرض فى امريكا وكندا..ايوه كده أرفعوا راسنا
وفيه واحد تانى اسمه سقف العالم سمعت انه أوكيه بس لسه مشوفتش حاجة منه
الباقى مش بتابع قوى مش فاضية
بس أحلى واحد جدا: ميزو ..بيجيبوه على أو تى فى الساعة 4 بعد ما برجع
هو قديم بس زى العسل بموت اصلا فى المسلسل ده
الاسبوع اللى فات كان رهيب..سافرت اسكندرية بالقطر رايح جاى ومشاوير هناك عملتها
وبعدين تانى يوم رجعت ..وصلت على فيديكس أبعت أوراق
غير مكالمات الفون اللوكال والدولى
غير شرا حاجات ومحاولة التفكير فى فتح عيادة طالما ان أهل المنطقة ممكن يجولى
وغير تخليص ورق وترجمة ورق والسلامات فى التليفون
ومين اترقى
ومين عمل عملية
ومين عاوز يفطر عندنا ..حطبخلوكوا الاكل برجلييا ..قصدى بايديا
والله الخميس اللى فات كنت فى ألكس والجمعة روحت الصبح
السبت لفيت على ورق..الحمد لله كنت فاكرة انى حطلع على شرم والطور عشان أجيبه بس ربنا ستر
وبعدته فيديكس فى نفس اليوم
الحد بقى مفيش طبعا حد حييجى ينضف الشقة ..قمت طبعا بالواجب عشان ماما كانت غارزة فى الطبيخ
صحاب أخويا اليابانيين معزومين ..على أكل مصرى طبعا ..لذاذ جدا ..أول مرة اتعامل مع الشعب اليابانى
حسيت انهم أطفال شوية ..حتى فيه واحدة منهم نامت على سريرى اللى كنت لسه مظبتاه
ملاية عليها رسومات أطفال بتاعت الدب بووه وأصحابه والمخدات أحمريكة
لما دماغها لفت بعد الملوخية والمحشى دخلتها تنام شوية
صرخت لما دخلت القوضة من شكل السرير
انا قلت هو فيه صرصار عليه واللا برص..زى اللى بنلاقيهم فى السكن عندنا ..ده غير الخفاش طبعا
اتاريها بتحب بووه وكانت بتبوس فى ليللو اللى عندى فى الصالون
مع ان ليللو ده جالى هدية من بلدهم
رفعت معنوياتى بعد قعدة يوم السبت فى سيلانترو وربنا ميقطعلناش عادة
غيرت من ماك لسيلانترو..برضة النحس موجود
تانى يوم بقى الاتنين أول الاسبوع دخلت كوستا أعدل دماغى بعد ما غلبت فى الاوراق بتاعتى
وبعد ما لقيت نفسى حعيط والله فى ميدان التحليل
كوستا عدللى دماغى ..حبقى زبونته خلاص..بس بعد كده أى مجايب من هنا أو هنا حقابل على قهوة بلدى
عشان لما اللى معايا ملقيش كونيكشان معاه ..أطلب شيشة بقى
القراية طبعا مش ناسياها فى المواصلات دى كلها
خلصت فردوس بتاعت البساطى
أول مرة أقراله حاجة ..مسابتش انطباع الصراحة
جبت من ديوان حاجات لرضوى عاشور وخيرى شلبى
مش عارفة حيتقروا امتى
أهم حاجة دلوقتى انى أخلص المصحف
ايه البوست الطويل ده ؟
حقوم بقى عشان الفطار قرب
كل سنة وانتوا طيبين