افلام الصيف
عودون احمد للغسيل مرة تانية...بعد هوجة الورق- اللى لسه مستمرة-وبعد توقيفى للماجستير-كلاكيت تانى مرة-قررت انى اكتفى بالدبلومات اللى انا واخداها ورفعت شعار اللى اتعلم اتعلم من زمان...ايييييه أهو هم وانزاح وقال العيال عاوزين يرفعوا قضية عشان حقوقنا وبتاع..انا قلت انا مالى انا لييا فى الطب ومليش فى الهم ده كله كفاية ضغطى اللى على ومحدش حاسس بييا..سبت كل حاجة ..انا اخدت علم باللى دفعته..الشهادة بقى للى ليهم نفس يكملوا للاخر...الحمد لله هم وانزاح من على دماغى وخلى ضغطى يوطى شوية..طبعا التليفزيون بيعرض -بجانب القرف بتاع كل يوم بالليل-افلام متعادة 5000 مرة..بحاول انام بدرى..بس كل ما امسك جرنان الاربع ودستور الاربع..ايدى بتاكولنى انى انزل اروح سينما...النهاردة اخدت بدل شغل عن يوم الجمعة-اجازة يعنى لمدة يوم- وقررت أبرطع ...روحت المول الصبح الساعة قرب اتناشر..كان لسه مفتحش..دخلت كافيه وطلبت واحد شاى وقعدت اقرا شوية فى قصة جديدة لسه شارياها...فتحت المحلات ..جبت حاجات من بتاعت اتنين ونص ومشيت على السينما..انا الصراحة شفت البيبى دول وعلى جنب يا اسطى..كنت بنام الصراحة ومكنتش لييا مزاج قوى..يعنى الواحد يدخل سينما عشان يعدل دماغه يحس انه اتضحك عليه ..ما علينا بس الصراحة الدور بتاع محمود عبد العزيز كان عاجبنى قوى..يعنى هو اللى شال الفيلم الصراحة..التانى كان متوسط مش هايل يعنى بتاع الاسطى..دخلت النهاردة على طول فيلم مسجون ترانزيت..ساندرا متخايبش ابدا..فيلم هايل..اجدع فيلم شفته لحد دلوقتى..قصة كويسة ومحبوكة ومش بتجهدك ذهنيا..المشهد بتاع الولد الصغير لما مات قطعنى على الاخر وقعدت اعيط ..كان جامد جدا..والام-مش عارفة اسمها ايه الممثلة دى الصراحة-كانت بتعيط وتصرخ على ابنها بطبيعية عجيبة لما قطعتلى قلبى والله...مشهد جامد فعلا يستاهل جايزة على اللقطة دى بس..اخراج ساندرا شيك ومتمكن والقصة حلوة..بستجدعها جدا عشان اسلوبها وكفاءتها..لما بشوف اسمها على الافيش انها المخرجة بدخل على طول عارفة انى حشوف حاجة حلوة..بس لسه برضة محتاجة انى اغسل دماغى اكتر عشان صدمة الماجستير المرة دى تعدى كده..مش بيعيشلى ماجستير الصراحة...ياللا أهو راح فى داهية
posted by reham @ 11:04 AM
3 Comments:
بوست رائع بجد اتمنالك المذيد رهام مدونتك جميله فعلا
ربنا يخليك ..تعالى زورنى على طول
السلام عليكم .أنا اسمي حازم و كنت بدور علي طريقة عمل الكبدة الإسكندراني و بالصدفة لفتت نظري مدوناتك بجد أبسط كلمة تتقال ان خفة الدم لسه بخير لحسن بعيد عنك البنات كلها دمهم بنج دلوقتي بصراحة مدوناتك بتجمع بين خفة الدم الرهيبة و الأسلوب المنظم و العفوية المطلقة اللي بيصبوا في بلطجة الحرية. مع ان اسمك بيفكرني بمأساة لن يمحوها الا قرص سيانيد علي غير ريق بس انتي بجد شرباتاتاية.و علي فكرة انا مهووس بحاجة اسمها قطط
Post a Comment
<< Home