حتعمل ايه يا حلو فى الولعة دى ؟
انا بدحرج التماسى وبلقف الهوا على الجو الاستوائى القارى اللى احنا فيه بقالنا كتير..وببعت باعلى تحية مع رفع قبعة ليوم السبت اللى فات واللى كان رسمى يوم واحد وعشرين يونيه البداية الرسمية للصيف..بداية عنيفة بتقول كلام كبير عن الصيف السنة دى وادينا شايفين فى النشرات وكده التايفون اللى اكل ناس فى الفلبين والغرقان اللى فى حتت كتير من امريكا ونشفان الريق اللى احنا فيه فى جو القاهرة المتميز بانه قارى استوائى موزامبيقى فى ايام الصيف..ما علينا انا كنت حاسسة انه صيف ولعة اصلا بداياته من الشتا اللى فات من كام شهر كده..انا كنت بلبس الدولاب تقريبا فى الشتا اللى فات ده ودلوقتى مش عارفة ألبس فى الجو اللى احنا فيه- انا بفكر فى رمضان اللى جاى فى 30 اغسطس ده-..اللى الواحد ممكن يعمله عشان يقاوم الشمس حاجات كتير..سامعه واحد ميكانيكى بيقوللى نقلب الليل نهار والنهار ليل..ماشى بس ده لما يكون ليك شغلك الخاص..تروح بمزاجك طبعا..اما بالنوسبة للى زى حالاتى مربوط بامضة الصبح والضهر واناء الليل واطراف النهار..فيجب على المتضرر الالتزام بالاتى :
نحاول نبعد عن الشمس باكتر وسيلة ممكنة بدل ما نفطس او تجيلنا ضربة شمس...الابتعاد عن الشاى والقهوة والنيسكافيه عشان دولة بيدروا البول وبنفقد ميه كتير بسببهم ومش بنعوضها..شرب ميه بالهبل ..نشغل عصاير والبان وجبن -بس مش اوى-عشان ناخود عناصر مهمة بنفقدها فى العرق زى البوتاسيوم والصوديوم...الواحد ينزل الشارع الصبح واخد دوش ويبقى فلة كده هو والشراب اللى لابسة ..بعد شوية- على حسب مقاومتك حضرتك يعنى-تلاقى نفس اتبهدلت انت والشراب وتحس انك فاكك من بعضك ومش مركز..ساعتها بقى حاول تبعد عن الشمس واشرب ميه كتير وكمان كوباية عصير يا مانجة يا جوافة-بس مش من تلاجتى لو سمحت انزل هاتهم من الشارع-..طبعا الصداع النصفى حدث ولا حرج..معلش ساعتها اشرب واحد قهوة عشان تعدل الصداع-ده اذا اتعدل من اساسه-..طبعا فاكهة الصيف فيها كل الحاجات اللى محتاجها الجسم فى الفصل ده..بس بلاش تكتر عشان الاسهال يعنى..انا جارتى حلت مشاكل الصيف فى كلمتين: دوش الصبح وبعد الضهر ووجبة واحدة فى اليوم : عيش بلدى وجبنة بيضة فيتا وخيار..ممكن طبعا نخرج نروش نروح اى بتاع وخلاص او ممكن نقيم تحت الدوش او التكييف..سلملى على الانفلوانزا يا معلم
posted by reham @ 4:28 AM
2 Comments:
ال بدحرج التماسى ال
.. لا معلمه معلمه ناقصك بس تفتحي قهوه وحجرين شيشه وتبقى رسمي
بس ليه خلتيها وجبه واحده بس فى الصيف دا بدل ما تقولى سبع وجبات فقط تكفى اثناء اليوم
وكمان جبنه دا ايه نشفان الريق ده دا نظام تعذيب بطئ ولا ايه
بس بصراحه انتى كل كلامك عسل يا عسل .. نو وندر واى اى لاف يو
Post a Comment
<< Home