Too much events..Am afraid of loosing track !
الواحد مأنتخ علي الكنبة وبقالي داخلة علي ست ساعات بحاول انام .. خلاص ليلي بقي نهاري ونهاري ليل .. مش عارفة انام بالليل كويس اللا كام ساعة بعد ما اقرا ايه الكرسي واصحي بدري اوي ارمي الزبالة واشطب الحوض واتأكد ان الصالة علي الاقل مترتبة .. قوضتي انا رميت طوبيتها خلاص من الكتب اللي فيها ، طب علي روايات علي كتب في الاجتماع علي بيزنس علي ورق من الشغل ومن حاجات خلصتها وجرايد قديمة .. الحمد لله بعرف اوصل للدولاب واجيب هدومي .. القوضة دي لازم تتظبط في اسرع وقت .. مش لاقية ليها وقت خالص اصلا .. انا حتي معنديش وقت اقرا دلوقتي مش زي زمان .. فعلا اغتنم فراغك قبل شغلك .. وانا مأنتخة دلوقتي علي الكنبة وجامبي بواقي مج كابوتشينو بلبن خالي الدسم بطعم الهازل نات وبسكر دايت ماركة بونجورنو.. وبشربه بامتعاض لان طعمه مش ساتيسفاينج زي كابوتشينو ستاربكس اللي بموت فيه وهو الاوردر الريجولار بتاعي اصلا لما بروح هناك كل مليون سنة مرة عشان معوكش في الدايت ومعوكش في الميزانية المخرومة عشان انا دكتور .. المهم افتكرت اني يمكن من ٢٠٠٦ او ٢٠٠٧ كده كنت حاسسة ان حياتي ماشية بريتم بطئ شغل دراسة سينما ندوات كتب جرايد ومتشكرين علي كده .. مشاكل طبعا البلوج هنا اتهري من حكاوي المشاكل .. سواء اللي قدرت اقولها صراحة او اللي خفيتها والدمع اتكلم .. دلوقتي بقي ريتم الحياة اسرع مما اتصور .. الريتم علي اوي علييا من ٢٠٠٨ لحد دلوقتي .. بدل ما كنت في ٢٠٠٧ عايزة موضوع اقدر اتبني منه افكار علشان اكتب كتاب بأسلوبي واحاول انشره ، دلوقتي عندي حواديت وحكاوي اصلا حصلت لي لو اتكلمت عليها ممكن اكتب كتاب من كذا شابتر ... اتكلم عن ايه واللا ايه بس .. عن شغلي واللا دراستي واللا سفري واللا ظروفي الخاصة واللا العمليات اللي عملتها واللا حياتي الخاصة واللا حال البلد دلوقتي .. والله ما عارفة .. حتي عندي حواديت وتجارب مع القطط حبايبي اللي ربيتهم .. واللا اتكلم عن الكتب والافلام اللي شوفتها .. واللا آجي افضفض هنا تاني زي زمان ؟ مش قادرة احدد .. كل اللي بفكر فيه دلوقتي اني عايزة اعدل ساعات نومي وانام علي الاقل ٨ ساعات في اليوم علشان ابقي كويسة وفريش واعرف راسي من رجلي ..اعدل ساعات نومي وآجي ابتدي اتكلم هنا تاني زي الاول ان شاء الله ..
posted by reham @ 1:07 AM
15 Comments:
This comment has been removed by the author.
مش عارف مين امتعاض دي!!! ما علينا
انا عايزك ترغي كتير اوي مبقاش فى حاجه بتخرجني من مشاكلى غير قرايه الحودايت بتاعتك
هو انت ليك مدونة ؟ .. عموما ححاول اكتب هنا كتير عشان افضفض بس علي الله ما تزهقو ش
عندي اكونت على البلوج هنا بس مش بكتب مجربتش اكتب قبل كده انا اصلا عامل الاكونت ده مخصوص علشان ادخل اقرالك اساسا انا كل مره بنسى الباص او بني اسم الاكونت وبتعزب على ما بقعد افتكره بس الحمد لله بيجي معايا صدفه بعد معاناه
معلش انا مش بدخل على الفيس عشان الفيس مش شغال على النت ورك اللى انا عليها
ايه مكتبتيش حاجه يعني في الويك اند ده
وهو ليه النت وورك اللي عندك مش شغال عليه الفيس بوك ؟ بجد اول مرة اعرف المعلومة دي والله .. هو انت مهندس اتصالات واللا في بنك ؟ .. ومتشكرة اوي علي اهتمامك بقراية اللي بكتبه مع اني باجي هنا اكتب اللي علي بالي او فضفضة بمعني اصح او رأي عاوزة اقوله او وجهة نظر .. مكونتش اعرف ان لسه في ناس بتقرالي لان البلوج سيبته لظروف خاصة ولاستعمالي الفيس بوك .. اتشرفت بيك :)
This comment has been removed by the author.
This comment has been removed by the author.
انا اللى اتشرفت بيكي
النت ورك مش شغاله عشان فى بنك فعلا
يابنت ال ايه عرفتيها ازاى دي
اقولك على حاجه
هاتي ودنك كده
ههه انا اصلا مبحبش اقرا لحد ولو مسكت كتاب ولا قصه اخرى فيه اخلص اربع خمس صفح بس فما لما اتابع حد كده يبقى اكيد الحد ده كويس
بجد كتابات حلوه مووووت مش بنافق ولا بجامل
ادعى انتى بس الميزانيه الشهر الجاي تكفى اجيب بورده جديده بدل اللى اتحرقت دي
انا اصلا عندي روتر فى البيت وموصل لناس بس جهازي بايظ بقالى شهرين مش عارف اجيب واحد جديد
اوعى تفتكرى علشان شغال فى بنك وكده يبقى تحت القبه شيخ ههههه
الحال من بعضه
والله كتير باجي هنا وبحس اني بخرف مش بكتب .. اول ما احس ان عقلي مشحون بكلام باجي هنا ببقي مع نفسي واقعد اكتب حتي مش براجعه قبل ما بنشره .. كويس انك شايف اللي بكتبه حلو .. وعموما فعلا انا معاك ان فيه كتب تشل وانت بتقراها وكبيرها ١٠ صفحات وخلاص وساعات كبيرها برضة الغلاف الخارجي ودماغك .. لا لغة صحيحة ولا هدف و مضمون ولا حاجة تشد انتباهك .. فده بيدل علي فراغ عقل الكاتب للاسف وفقره في الافكار والاسلوب والشخصية الجذابة .. انا اذا ما كانش الكتاب مفيد ومش حيضيع وقتي ولا يطير البرج اللي فاضل عندي بقراه ، غير كده بسربه بالكيلو
بتحسى انك بتخرفى !!!
اكيد بتهزرى ولا دا تواضع يعني
(- ^)
برج ايه اللى فاضل بس انتى ليه بتعاملى نفسك المعامله دي انتى باين عشان دا اسلوبك وانتى متعوده مش شايفه انه كويس
طيب تيجي نتراهن انا وانتي لو بقيتي صحفيه وكتبتي جاست اربع سطور فى اى جريده مش معروفه مبيعاتها هتزيد وانتى هتغطي على ناس كتير موجوده هتبقى صاروخ يا ريري هههههه وبكره تقولى محمود قال
يسمع من بؤك ربنا .. هو في حد من الناشرين او الصحفيين بيقرا اللي بكتبه ده اصلا ؟ انت بس الاوديانس الوحيد لييا ..هههههههههههههه .. محسسني اني بعمل one man show
This comment has been removed by the author.
والله بتكلم جد اصل انا كزا مره اقارن بين اسلوبك وبين اسلوب كزا واحده صحفيه بيحاولوا يكون اسلوبهم خفيف بس مش عارفين عامتا انتى بتقولى ان انا الاويناس الوحيد عشان البلوج مش مشهور ومحدش بيشوف مش عارف اسميها مقالات ولا حواديت بس انتى لو جاتلك الفرصه دي هتغطي عليهم وانتى مش واخده بالك
Post a Comment
<< Home