وحدى .....مع تلات كائنات

نظرا لقضائى ليلة زى الف ليلة و ليلة وحدى فى الحجرة مع تلاتة بقم مننا وعلينا خلاص فقد تفتق ذهنى عن قصيدة ..حيث انها تعبر تعبير واقعى عن مدى تخاذلى فى الحرب مع تلك الكائنات..ولكن بعد اتمامى هذة القصيدة وجدتنى اتشجع و حاربت اتنين منهم حرب شعواء ادت الى طفشانهم من القوضة حيث اننى تخلصت من الخنفسة عن طريق شيلها بالشبشب و رميها بره القوضة بس يا حرام اتقلبت على قفاها و فضلت تفلفص اتاريها وقعت على عش نمل كان جى جرى ياكولها قمت عادلاها على وشها فجريت بعيد ناحية البيت اللى جنبينا..اما بالنسبة للبرص فتم طرده بالتهويش ..مش طالبة معايا افلام رعب بقى و اضرب البرص بالشبشب بعد رشه بالبيروسول و بعدين ألاقى ديله بيتحرك لوحده..اما بالنسبة لصديقى الاخير -الخفاش حبيبى-فدى بقى مش لقياله صرفة...بيدخل من فين و يخرج من فين مش عارفة اكتشف وكره..يمكن استعين بالناشيونال جيوجرافيك للتنقيب عن عشه..بس هو لذيذ الصراحة :ابقى قاعدة بقرا ..يقوم داخل لافف فى القوضة حولين اللمبة اليتيمة اللى فى السقف و بعدين يختفى فى سقف القوضة انا بشغل ساعتها راديو سوا عشان يتسلى معايا مرة اغنية عربى و مرة انجليزى ..اهو كمان الصوت يبعده عن وشى..المصيبة بقى لو طلع عنده عيال او طلع مش خفاش اصلا ..سلام قول من رب رحيم..زى برضة ما كنت ماشية فى اللمون و جت بنت هبلة كده فاشخة بقها و بتقوللى كويس مطلعش ليكى عفريت فى اللمون..عفريت يا بنت الكلب؟ و اللا مش عاوزانى اشوف الخرى اللى عاملينه..طب واحدة من امكوا تغلط و انا اطلع قرف الخفاش على امها..كاتكوا خابط..ما علينا القصيدة اهيه
قصيدة proactive
خراب يا دنيا
عمار يا دماغى
شعار دايما باقوله
اصلى انا انا الواد الواعى
و فضلت اصطلبت فى الدنيا
لحد ما..اوووه...اه ه ه ه

هوب ..الكارسة وقعت على دماغى

ملحوظة:القصيدة دى فكرت فيها و انا بغسل الغسيل فى الطشت عملا بمبدأ العودة الى الطبيعة