ورد الجناين

كان نفسى قوى فى حاجات كتير ايام الكلية ..اكتر حاجة كنت عاوزاها انى مش امسك اتحاد الطلبة..لأ مكنش لييا فى الحاجات دى ..ولا فى فرقة التمثيل ولا الرحلات العجيبة اللى مفتكرش ولا واحدة منهم..الا الرحلة اليومية على كوبرى الجامعة ..الكوبرى اللى بيفصل بيننا وبين هندسة..من اجمل الكليات كلية الهندسة واحلى والذ ناس منها..كفاية انى كنت ببقى مبسوطة وانا عندهم..مفتكرش اوى انى حضرت محاضرات فى الكلية الا فى سنة ستة بقية السنين فى الدروس وبقية الوقت عند هندسة أو فى السينما أو عند صحابى بتوع ماليزيا ..مش فاكرة حاجات قوى بالتفصيل غير ان علاقتى جامدة مع كوبرى الجامعة..من اول محط رجلى عليه واحس بالهزات المتوالية نتيجة مرور السيارات عليه..حتى بتاع الدرة والترمس والحبيبة والكراسى والشاى والقهوة وزمايلى اللى كانوا ساعات بيمشوا برضه على الكوبرى رايحين هندسة او المدينة الجامعية..مرورا بحسن زميلى اللى مكانش قادر يمشى ومكانش فيه مواصلة قام شاور لعربية كارو وصلته لاخر الكوبرى وهو حاطط البالطو على كتفه وبيعزم على العربجى بسجارة..حتى بتاع الفل و الورد..انا بحب الورد جدا ..دايما لما بشوفه بفتكر جنينة الاورمان ..دى كنت بعدى عليها يوميا وانا رايحة وجاية من الكلية..كبيرة وجميلة..فيها ورد وزرع جميل وفيها كمان حبيبة شكلهم بيبقى لطيف وسط الجنينة..كانت الجنينة دى جميلة فى عينى وكانت المكان اللى اخترته عشان ممكن اقابل فيه خطيبى اللى لسه مجاش من الزمن الاخر..بس نعمل ايه؟ فضلت أأجل موضوع دخولها لحد لما ربنا يفرجها بالخطوبة زى بالظبط حاجاتى اللى مقفول عليها وممنوع الاستعمال اللا لما اتجوز....طبعا مشروعى الارتباطى اتفركش من قبل حتى ملبس الدبلة وكل حاجاتى بتاعة الفرح بتاكولها العتة و جنينة الاورمان مطلتهاش ...اسكت يعنى ؟
محصلش كده طبعا ...بدأت حركة التمرد على الجنينة واشيائى المخزنة فوق الدولاب من سنتين كده
كنت معدية قودام الجنينة وشفت اعلان عن معرض الزهور ..الصراحة زوغت من الراجل اللى على الباب ومدفعتش ال50 قرش بتوع رسم الدخول عشان اصلا الراجل مكانش على الباب بس دفعتهم السنة دى ..و دخلت وشفت اجمل زهور و الله فى الدنيا وانبسطت قوى..رجعت كملت التمرد على حاجاتى المتشالة وابتديت استعملهم ..لقيت حتى صحابى البنات والولاد كمان ابتدوا يتمردوا على الوضع وكل واحد بيدور على نفسه بجد ..انا لقيت نفسى فى وسط ورد الجناين ..خالد لقى نفسة فى التانجو معتز لقى نفسه هو ومصطفى لما هاجروا واحمد كمان لقى نفسه فى امريكا وغيرهم لقوا نفسهم فى حاجات كتير ..بس اجدع واحد فينا اللى ساب الطب من بابه واشتغل فى البيزنس..كنا فاكرينه افشل واحد فينا اتاريه كان هو الوحيد اللى شايف الدنيا صح