جوووووزى وانا حرة فيه

جوزى نقيته من وسط كذا واحد ..الله مش عشرة عمر؟ عجبنى ستايله وبدلته السودة وشكله الجميل خصوصا انه طويل وحاجة تملى العين ..رضيت بقسمتى بقى
كل شوية جوزى رن عليه ..جوزى جبللى خبر حلو..ومرة وحش..جوزى لازم انضفه..جوزى لازم اوديه للدكتور بتاعة
ده كان فعلى فى اول سنة لجوازى منه ..وبعدين
جوزى بقى مؤرف..جوزى طلعوه برا الاوضة..يا رب جوزى يتسرق..مش طايقاه ..طويل كده و صوته مش عاجبنى..جوزى وقع اتكسر ..جوزى البرفورمنس مش عاجبانى ..جوزى الايريال بتاعه مين كسره ؟
..جوزى وقع تانى والشاسيه اتعوج..جوزى وقع فى الميه..جوزى كانت حتمسك فيه النار..جوزى كنت حنساه فى الكافيتريا..جوزى بقت الذاكرة عنده شيش بيش..جوزى بيمسح صحابى من ذاكرته..جوزى ملوش قطع غيار
وبالتالى بدأت عينى على الزوغان على جوز تانى
وبدأت تأتينى احلام اننى اتجوزت واحد تانى اشيك واجمل واحلى وفيه كل الاوبشنز
كلمت جوزى الاولانى فى قعدة عائلية وتم حساب تكاليف الانفصال وتكاليف الوصل الجميل مع القمر التانى اللى جه نور حياتى ..كفايه علييا شكله وذاكرته الحديدية ..ده مش فضيحة فى وسط الناس
وابتدت اجمل علاقة عاطفية بينى وبينه
لحد ما عينى زاغت تانى و حموت على واحد رفيع و فيه اوبشنز اكتر وروش كده ومليان شقاوة وحيوية
بس يا عينى الميزانية مدوحسة المرة دى
وادينى صابرة على اللى معايا على ما تفرج ...