مسجد الحسين

طالما عملت كل اللى اقدر عليه
وبحاول اقدم على شغل هنا وهنا لتحسين ظروفى
وطالما معنديش واسطة لا فى الشغل ولا الجواز
بس برضة حاسسة انى عملت اللى علييا ولسه بحاول احسن من نفسى عشان اكيد
انا عندى اخطاء لازم تتصلح
وطالما فى عالمنا المادى انا عملت اللى اقدر عليه
يبقى خلاص
لازم ساعتها طالما عملت اللى علييا بما يرضى الله
لازم ألجأ ساعتها للعالم الروحى
لازم ألجأ لله
واصلى عند بيت من بيوته عشان ارتاح
رحت الحسين الجمعه اللى فات وصليت الجمعه
ناس كتير قوى ..كل واحد رافع ايده لله بيطلب حاجة
اللى جمبى عمالة تطلب من ربنا انه يشفى ابنها -ربنا يشفيه
انا مقدرتش ادعى على اى حد من اللى اذانى
دعيت ربنا انه يصلح الحال
ويفك دايرة النحس اللى محوطانى
ويسهل علييا ظروفى
انا كنت حسيت انى ابتديت اضعف وشفت الضعف فييا وحش
اتارينى مش انا بس اللى كده كل اللى كانوا معايا فى الجامع ضعفا بشكل او باخر
الضعف ده انسانى ...تركيبة جوانا
عشان كده لما حسيت انى طاقتى بتقل وبحس بالضعف ..لجأت لله
رحت الجامع ..صلاة الجماعة بتدى قوة
وكونى شفت ناس برضة ضعفا بيلجأوا لله زييى
حسستنى انى مش لوحدى ..الاحساس ده كفاية لييا
وادينى بعمل زى ما قريت فى كتب الدين
ان مهما الوقت كان فيه شدة لازم استمر فى العمل
يمكن الحال يتحسن قودام واقول ساعتها الحمد لله انى مضيعتش وقتى فى الايام اللى كان فيها شدة وعياط
فعلا الشغل وبناء النفس فى الشدة ووقت الضعف لازم استمر اعمله
عشان حستفيد من الشغل ده ساعة ما الحال يتحسن
واذا الحال فضل شوية كده مزنق
اهو الشغل احسن دوا
عشان متفكرش
الشغل بينسى وبيلهى
عشان التفكير ممكن يعمل حاجات وحشة
يبقى النسيان بالشغل احسن