a cat

مش عارفة ايه مزاج القطط تنام وتتدلع على كتب المذاكرة بالذات
امبارح جبت ييجى مليون كتاب طب عشان نطلع معادلة لسوايل الجسم كده
ما علينا ...قعدة بدعبس فى الكتب والجداول والبتاع وعندى صداع من كترة التليفونات اللى برد
عليها بقالى تلات تيام متواصل لما قربت أحولل
وعمالة أفكر طالما مش عارفة وزن العيانة طب اظبت السوايل بكام لتر وبتاع وقد ايه الكترولايتس
قام لولو القط بتاعى جه نط على الكتب ونام عليها
لما شفت الصورة دى قلت كل القطط كده بالشكل ده
------------------
انا الايام بتاعتى الايام دى شكلها غريب ومش متظبطة خالص
وبستقبل تليفونات زيادة عن المعدل الطبيعى ..بجد تعبت اتكلمت فى الموبايل بس حوالى 5 ساعات
سواء استقبال أو انا اللى بتصل
دوشة كده ولخبطة عند ناس وعند عيانين مع تدوير على شغل مع انترفيو على الفون
عقبال الانترفيو اون لاين
وناس بتكلمنى على حاجات كتيرة وهيصة
بس الكلمات المشتركة فى التليفونات دى هى
عيادة مستشفى عملية ولادة نزيف بلح دم طبيخ كتب طوارئ
وفى النص يا حد يزعق يا حد بيهزر يا حد بيكلمنى وهو سايق يا حد بيوصفلى كيكة البرتقان
يا حد بيركن عشان ياخود جلسة علاج طبيعى يا حد بيشخط
يا حد رغاى وخلاص
انا بفضل اسمع طالما عايزين يتكلموا
وساعات بنام وانا بسمعهم
أصل حد بيفضفض وخلاص
فأنا بفصل... بنام
طالما انا بالنسبة للطرف الاخر فى المكالمة دى عبارة عن ودن وخلاص
بس لو فيه حاجة مهمة لازم اقولها بصحى من نومى كده واتشطف واقول اللازم
--------------------------------
التليفون بيطاردنى ومش عاوز يبطل رن
بيرن حتى دلوقتى والساعة داخلة على 12 بالليل