تفيدة ومرزوق-الحلقة 11

مرزوق بلع ريقه على طول وكتم الزغاريد بتاعته لما امه قالتله العين وحشة والحيطان ليها ودان والجيران مش بيتبل فى بوقهم فولة واحسن له يعلن الخطوبة رسمى بعد الامتحانات ..مرزوق ولد مطيع سمع كلام امه اللى خرجت بره فى الصالة بتولع بخور عشان تبخر الشقة ومرزوق وبالمرة الزرع اللى حاطينة فى البلكونة اللى دبل من عينين الجيران -على حسب وجهة نظر ام مرزوق- مش عشان هو زرع ليلى مش مفروض يتحط فى الشمس ليل ونهار..من الناحية التانية تفيدة جاتلها شحنة نشاط غير عادى بعد ما اتطمنت ان مرزوق بقى خلاص فى ايدها وفاضل تكة ويدخل القفص..بتقول لنفسها : مرزوق فى اليد احسن من غيره على الشجرة ..قامت ترجمت شحنة الطاقة دى اللى جاتلها فى صورة مذاكرة وحرت فى الكتب لحد ما النهار طلع وحركة الشارع ابتدت تدب..السوق النهاردة بدرى شوية عشان الجمعة ..قبل الصلاة كله عاوز يبيع الخضار الطازة وأول ما سمعت تفيدة النداء المعتاد -مجنووووووووووووونة يا قوطة - قامت خدت شنطة الخضار ونزلت جرى تتسوق..مشيت عند محلات كتير وبياعين بعربية كارو وناس فارشة ..ايه الاسعار دى ؟ حنتجوز ازاى يا مرزوق؟ تفيدة بتقول لنفسها ..قعدت تلف فى السوق..الخيار بتلاتة ..الطماطم بنت المجنونة المفعصة وضاربة ب2 ونص والبياع يقولها دى مستوية مستوية ..وهى بايظة وضاربة وريحتها طلعت فى الجو الولعة ده ..ملوخية يتيمة الحزمة ب50 ومتتاكلش..البتنجان لقيته بجنيه وجنيه ونص قامت اشترت 2 كيلو من ابو جنية وسلمت أمرها لله وجابت كيلو خيار وكيلو طماطم لزوم السلطة ..اتهفت فى نافوخها ونفسها راحت للفاكهة ..لقيتها اسعارها ولعة على الاخر..حتموت على مانجة سكرى ..تدور فى السوق انها تلاقيها مفيش..تعدى على محلات المانجة تلاقى اصناف مش اللى فى دماغها ..البياع يقولها : اى صنف يا باشا ب5 جنيه عشان خاطرك ..تقوله انا عاوزة سكرى ..يقولها خدى تيمور واللا زبدية تقوله سكرى ..حتوكلونى على مزاجكو واللا ايه ؟ وتسيبه وتمشى ..المهم اكتفت تفيدة بالبتنجان والسلطة وطلعت السلم جرى عشان تلحق تحضر الغدا وتلحق تنام شوية ..الامتحانات على الباب خلاص ولازم تشد حيلها خليها تخلص بقى الكلية دى ...
مرزوق بقى على سريره لسه نايم ..فاضل على الصلاة ساعة والبيه لسه نايم بيحلم بتفيدة وعمال يخرف ويحدف بوس فى الهوا ..واحدة منهم جت فى امه اللى اديتله بالقفا عشان يصحى يلحق الصلاة

ام مرزوق: اللا الصلاة ياد يا مرزوق
مرزوق: حد يصحى حد الطريقة دى يا اما ..ايدك تقيلة
ام مرزوق: قوم ياخويا نموسيتك كحلى ..انا عارفة تفيدة حتصحيك ازاى ؟
مرزوق فى سره : بطريقتنا الخاصة يا اما ..نياهاههاهاهاهاها

مرزوق لم الدور وقام من النوم وخد الحمام التمام بتاع يوم الجمعه ولبس الجلابية البيضة اللى امه محضرهاله عشان الصلاة ..حط كلونيا جايبهاله اخوه من بره وسرح شعره بفازلين عشان ملقاش جل بتاع الشعر..أمه خلصته ..نزل جرى وصلى ورا الامام ودعا ربنا انه يفرجها ويعدى الامتحانات على خير..طلع تانى البيت ياكوله لقمة مع امه ملقهاش مخلصة الغدا

مرزوق:طب انا حنزللى شوية القهوة يا اما عقبال ما تخلصى
ام مرزوق: ماشى يا ضنايا ..بس متنساش تجيب معاك بخور من عند عمك عبد الرازق
مرزوق: من عينايا يا اما بس انتى خلصى البتنجان بسرعة

الحتة كلها طابخة بتنجان الظاهر كده ..اصله ارخص حاجة فى السوق..كل الرجالة اللى متجوزين واللى لسه مفيش وقاعدين كلهم على القهوة طلبوا كل واحد منهم-ومعاهم مرزوق -رغيف كفتة من عند الواد زلموكة بتاع الكفتة اللى على الناصية ..كلهم بيلاحظوا ان القطط السمان اللى فى الحتة وعارفينهم واحدة واحدة بيختفوا واحدة ورا التانية مع زيادة استهلاكهم للكفتة..وبيلاقوا أعداد مهولة من قطط المنطقة سواء السمان او المسلوعين بتختفى مع زيادة الاستهلاك لأقصى معدلاته يوم الخميس..كل راجل عاوز يبر نفسه هو والمدام يوم الخميس..مش معقولة انهم يبروا نفسهم فى ليلة مفترجة زى دى ببتنجان مقلى او مسقعة ..لازم شوية زفر..الزفر الوحيد من عند زلموكة ..القطط اللى بتختفى دى اعتبروها قطط مهاجرة بتيجى تحط فى حتتهم شوية وبعدين تمشى
مرزوق قاعد على القهوة بعد الصلاة بياكول فى رغيفه وبيشرب الشاى ابو لبن

مرزوق فى سره وهو بيبتسم بخباثة وبيفتكر تفيدة :لازم أروم عضمى ..دنا داخل على بكالوريوس وبعديه داخل على تفيدة
أومال تفيدة فين ؟ غارزة لسه بين الكتب ..مفيش ميسد ؟ مفيش صباح الخير ؟ مفيش طبق رز بلبن ؟

قام مرزوق طلب طبق رز بلبن من عند محل الفار أشهر محل رز بلبن فى حتتهم ..قعد ياكله وهو بيرن على تفيدة ..معبرتوش..قام بعتلها رسالة على موبايلها ..يطق يموت وميلاقيش تابوت اللى يشوفك يا تفدفد وميحبكيش موت ..تفيدة ولا هى هنا لا سمعت الرنة ولا قرت المسيج ..مشغولة مع البتنجان لسه بتقشره وبتقليه ..حاطة لبانة فى بوقها وعمالة تندغ فيها وهى عمالة تدندن..يا بهية وخبرينى يا بويا على اللى جتل ياسييين..تحت السجر يا وهيبة ياما كالنا بورتوئان ..ترلم..الجدعاااان ..بص على الحلاوة حلاوة ..يا حلو يا اسمر....كل ده غزل فى البتنجان ..قام قلبها افتكر مرزوق..تفيدة لنفسها : أما اعاكسه شوية ..الله مش خطيبى ؟..قامت رنتله ..فتح عليها مرزوق على طول..وعلى نغمات اغنية محمد فوزى أول ما الحلوة فتحت شباكها فتحت باب قلبى للشوق طوالى ..اللى جاية من على القهوة ..دار الحوار ده بين الحبايب

مرزوق:صباح الفل صباح العسل صباح النعناع
تفيدة : يسعد صباحك يا حبى ..وحشتنى من امبارح
مرزوق:نياهاهاهاهاه
تفيدة : مش حضيع فلوس اكتر من كده عليك يا مرزوق..الكارت قرب يخلص..اسمع المفيد بس ..وانا بعمل البتنجان
مرزوق:بتنجان تااااااانى ؟
تفيدة بدلال:اسمع انا لوحدى فى البيت دلوقتى ..اقفل وتعالالى جرى ..محتجالك قوى قوى قوى الساعة دى..عاوزاك فى حاجة كده

تفيدة قفلت الخط..مرزوق عينيه نورت وبقت مدوره وشكله قلب على ديب سحراوى شرز..خد ديله وطيران على تفيدة

القهوجى :الحساااااااااب يا دوك
مرزوق:ع النوتة يا خميس مش فاضى

الناس فضلت تتحاكى ان شكل مرزوق فى اليوم ده وهو طالع يجرى على بيت تفيدة بقى شبه الديب المسروع ..وشوية من الناس دول ترائى لها انها شافت لمرزوق ديل وسمعته وهو بيعوى فى اخر الحتة وهو طالع جرى على سلم بيت تفيدة