برنامج : حلة وانا فيها

نظرا لقرب قدوم شهر رمضان بعد شهر شعبان اللى حندخله كمان كذا يوم كده ان شاء الله ..وعشان انا لقيت فى الطبيخ نوع من المتنفس الطبيعى للحاجة الساقعة ..قدحت زناد فكرى ودعبست فى الكتب وطلعت كتاب نظيرة ..انا فكرت انى اعمل برنامج حلة وانا فيها عشان كل لما اطبخ اكله لحد رمضان ما يخلص ان شاء الله اكتبها بوست وحكتبها بنفس طريقة عمايالى ليها ..بس بقول فى ودنوكوا كلمة أهم حاجة فى الطبيخ ودى سمعتها من شيف-بياخود فلوس اكتر منى بالرغم من انى انا وهو بنلبس تقريبا نفس اللبس فى الشغل -بيقول ايه بقى ؟ عوك زى ما انت عاوز فى الطبخة بس أهم حاجة التوابل والبهارات اللى بتستعملها ..قد ايه ونوعها ايه ؟..وانا بقول يا أوختشى ويا اخويا اللى بيقرا كمان عشان فيه ناس بتطبخ لنفسها سواء رجالة أو ستات -بقول ان اهم حاجة كمية الملح والدهون اللى فى الاكل ..انا ملحى يا دوبك يكسر الدلع ومش بحب السمنة بستعمل زيت عباد شمس وساعات نى فى نى كمان ..بفكر فى الحاجات الصحية اكتر ..انا معاكو ان الاكل اللى بسمنة طعمه وريحته جميلة جدا وتهبل بس لو اتطلبت فى شغل بعد اكلة دسمة مش حعرف اقوم من على الكنبة ..المهم اكلى مش سوتيه طبعا طبيخ عادى ..اللى عاوز يطبخ او يتعلم الطبيخ عشان يزغلل عنين بنت الحلا ل أدينى أهوه حتكلم وأقول برنامجى على البوست حلة وانا فيها ..نبتدى بحلة النهارده اللى لسه متشطب عليها من شوية : بطاطس مطبوخة ورز مسلوق
كام بطاطساية تتقشر وتتقطع مش صوابع كلاكيع كده بأى شكل وحجمها متوسط عشان تستوى
نحمر بصلة فى شوية زيت عباد شمس بسيطة ومع البصلة توم متقطع -التوم والبصل محطوط دايما فى البامية والتورلى والفاصوليا الخضرا
نجهز الصلصة -اى حاجة بقى صلصة من السوبر ماركت أو طماطم مسلوقة ومضروبة فى الخلاط انا بحب صلصة ريجينا عاملة زى الطبيعية
نحطها على البصلة لما تصفر ونزود الميه او نحط الشوربة او نزود الميه ونحط ماجى -على حسب المزاج
لما تغلى نحط البطاطس المتقطعة ونسيبها لحد ما تستوى -تطرى يعنى مش تدوب
الرز بقى ..ده موضوع تانى ..مش بستعمل برستو ورز على البخار وبتاع ..لأ انا بنقع كوباية رز فى ميه شوية كده ساعة واللا حاجة عشان تنزل شوية كتير من النشا اللى فيها
المهم بجيب حلة متوسطة واحط فيها 2 كوباية ميه طالما انا ناقعة كوباية رزواحدة
بسيب الميه بس من غير زيت ولا سمنة -تغلى فبصفى الرز من الميه بتاعت النقع وبحطه فى الميه اللى بتغلى وعليه حبة ملح بسيطة -يعنى ميه مغلية ورز وشوية ملح
أول ما احط الرز فى الميه المغلية أوطى النار على طول على الدرجة الهادية جدا واسيبه يستوى براحته خالص
ممكن مثلا تعمل لنفسك فنجال قهوة وتشربه مع الجرنان لحد ما يستوى الرز والبطاطس

أى سلطة معاهم بقى وبالهنا

أى حد يحصله حاجة مليش دعوة ..انا بوصف ورزقى على الله

بس انا طبخت كده النهارده أول ما جيت من المستشفى
نلتقى فى السيشن الجاية ان شاء الله
مع تحيات برنامج
حلة وانا فيها
كاااااااااااااااات