الدنيا زحمة عندى

لا باكول برة ولا بتعزم ..محدش عبرنى فى رمضان بس ناوية أعبر زمايلى اللى فى القسم
أهو كلوه بثوابه ..عيال غلبانة وجعانة ..زيى يعنى ..الله مش صحابى ؟
الدنيا زحمة جدا والجو حرر من تانى
وريقى بينشف من المشاوير الهيصة اللى انا فيها
الحمد لله مفطرتش غلط فى رمضان لحد دلوقتى
من السوطل ممكن أشرب مييا كده لما أدخل البيت من بره
بس بفتكر مرة واحدة انى صايمة
الورق لسه بطلعه والورقة بتولد ورقة
والورقة بتولد ورقة تانية وساعات امتحان وانترفيو
والورقة تزوق ورقة
تزوق ورقة كمان
ودوخينى يا لامونة
رمضان السنة دى انا مقضياة فى الشارع الصراحة
الصبح بلف على الورق..والساعة 2 بتزنق فى الرجوع وبعمل حسابى انى حرجع على ميزو..يعنى حوالى الساعة 4كده
يا دوب ألحق أعمل الرز أو أسخن العيش
مش لاقية مسلسل يتشاف..بارقة أمل لقياها مع قلب امرأة بتاع الهام شاهين
خصوصا لما اتجوزت مروان ..بنقعد نتريق انا وماما
انا أقولها يا ريت مروان ده يستنسخوا منه
وهى تقوللى شكله كده حيتقتل أو يموت بدرى
بقولها مفيش راجل كده ..طيب وكويس وبيحب الست بتاعته وبيدلعها وبيشتغل بجد عشان يعمل لنفسه كيان
غير ان نفسيته حلوة وقلبه مسامح
عشان كده انا وماما متوقعينله انه يموت بدرى
بطلت أسمع الراديو خلاص مش فايقاله ..دوشة الورق مغطية عليه
وعندى امتحان الحد اللى جاى والله اذ فجأة
بيفكرنى بامتحانات الكلية
ايه ده ؟ انتوا ممتحنتوش؟ اتفضلوا من هنا فيه امتحان
انا يمكن امتحنت مليون امتحان فى حياتى كده واللا حاجة
النهاردة بقى جت فى دماغى انى ألبس أبيض
لأ مش البالطو ..انا فى الشغل يا اما بدلة العمليات يا اما لبسى العادى
لبست لبس خروج أبيض..ويا ريتنى ما عملتها
العربية عملتها فييا انا وبابا وماما الحمد لله
واتفضحنا فى الشارع ..الحمد لله الحمد لله
وزقيت العربية وما كان فيه واحد عنده دم ييجى يزوق معايا
واتلحوست
والعربية طلعت ريحة من الموتور ودخان
وعينايا وجعتنى من الريحة اللى طالعة لدرجة انى قلت ايه الريحة دى ؟ هو البنزين مخلوط بسبرتو طبى واللا ايه ؟
طبعا فتحنا الكبوت وقعدنا نستنى الفرج لحد ما تبرد العربية اللى كانت سخنة نار
أففففف ريحتها لسه فييا
أسمع أخبار من ناس ماشية : قال بيقولوا طيور مهاجرة قال ..هع هع هع .وانا مش فاهمة حاجة عشان مش متابعة
اللا الورق بتاعى ..لا بتابع الجزيرة ولا جرايد ولا حتى راديو أو مسلسل
برجع بيتنا مهدودة مش شايفة ..المهم وانا فى العربية
طلعت كراسة من الشنطة وقعدت أكتب الكلام اللى الناس اللى فى العربيات التانية اللى بتعدى جمبى بتقوله
حياة تانية من جوه العربية
مش تصنت والله ..هما كان بوقهم فى ودنى وبيتكلموا بصوت عالى
بيقولوا مثلا
- الحصة دى بفلوس واللا ببلاش؟أب بيزعق وبيزغر لابنه اللى فاتح كتاب الجغرافيا وبيقرا فيه وهو خايف
-جوازها يوم 7..بنتين بيتكلموا مع بعض وبيتريقوا وبيتحسروا على بختهم وهما أصلا شكلهم يا دوب فى اعدادى
-حروح بيها اسكندرية ..بيزنس
-حامل؟ يبقى تتجوز..واحد فى عربيته ومليانة ستات عمالين يضحكوا وبيقولولوه بطل الكلام ده وكرررر
-بكره هاه؟ بكرة وربنا..رنديفو
-صف تانى وصف تالت وحاجة يعلم بيها ربنا ..واحد بيبصللى مش عارف يمشى فى الشارع عشان انا كنت عاملة صف تالت الصراحة
-انا كنت عاملة حساب كدة ..واحدة ست بتتكلم بأسى
-قال لك ايه ؟قال لى كده يعنى ..ابتسامات خبيثة بين اتنين شباب
-لازم يعنى أديك بالجزمة يا واد ؟ واحدة صايمة لابنها
-ايه أخبارك ؟عاملة ايه ؟ اتصلت ومطنشانى يعنى ..واحد بيكلم واحدة فى الموبايل
-طيب..واحد بيقولها وهو مكبوس
-يا واطى
-الصلاة ع النبى ..مع تسقيفة وبداية وصلة ردح
-انا وحمدى امبارح شربنا سجاير لف..معانا النهاردة ؟..شكله كده والله أعلم سجاير محشية بتاع ..خصوصا انى شفت جمبى ازازة توسيفان مشروبة بحالها
-فين الاتوبيس؟..واحد مش شايف الاتوبيس اللى جى حياخده بالحضن..شكله خارج من المدرسة ومش شايف
-ياللا يا حبيبى يا اللا يا بابا عدى الشارع..ايه الشنط دى كلها؟ ده انا لما ولد صغير عمل مرش ايرير لوارا عشان تقل شنطته
واحنا بنعدى الشارع ..فى محاولة لشرا كيلو جوافة اللى بقى ب3 ونص
ربنا يعدى رمضان على خير
ونعيد على خير يا رب