قاعد لوحدى
قاعد لوحدى فى النادى لا بييا ولا علييا..متنحة فى الشجرة اياها اللى انا قاعدة تحتيها كافى شيرى خرى..مستنية سندوتش الجبنة البيضة بالطماطم كتصبيرة لحد العشا..ماهو انا خرجت من صباحية يوم الجمعة على الحسين..صليت الجمعة الاولى فى السنة الجديدة هناك..بعد الصلاة وقفت انهم يفتحوا الباب عند الحسين عشان اقراله الفاتحة مفتحوش..وراجل وقف وسطينا بيقول بصوت عالى ان كل واحد يحرص على حاجته لحسن فيه حرمية فى وسطينا..قعدت اضحك بصراحة والست اللى ورايا رقعت بالصوت ان بنتها مش لاقياها..اتارى البنت كانت اتزقت بقوة الدفع لقودام..المهم قريت الفاتحة للحسين من بعيد عشان كان فيه ناس كتير جايية تزور..مبدهاش زنقة وسرقة كمان..طلعت على الفيشاوى اعدل دماغى بالشاى ابو نعناع..الوقت سرقنى لما اشتريت الجرنان على القهوة وقعدت اقراه مع الشاى..طلبت شيشة كمان بعد تليفون زى الخرا ما جالى ..صحبتى بتحاول تعرف زميلى مش عاوز يتجوزها ليه..طب انا والنبى ارود اقول ايه؟..الايطالية اللى جنبى طلبت شيشة هى كمان لما قعدت تبص للسيجارة الكبيرة دى اللى انا بشربها و بقينا اتنين من حوض البحر المتوسط بنشيش جنب بعض..والست الاجنبية تيجى كمان تصورنا..اتصورت الصراحة ومالوه..الوقت جرى واللعب بالشيشة وشرب الشاى على معدة فاضية جوعنى..دفعت ورحت رايحة على النادى..طلبت سندوتش وقعدت تحت الشجرة اياها..اول ما قعدت حسيت انى غطست فى الكرسى وحسيت انه حضنى كده..أهو ده العشم برضة..وحشتنى انت كمان..ومكدبتش خبر..الولد اتأخر فى انه يجيب الاكل روحت اخدتلى تعسيلة على خفيف..نايمة ونص دماغى صاحية..فتحت عينى لقيت الست اللى جنبى بتزغرلى..ايه يعنى لما انام فى النادى هو انا رفعت رجلى فى وشك ؟..عيالها بقى كتير كده معدتش الصراحة..بيلعبوا ببلونة هيليم..صاحبتها جت وقعدوا يتكلموا على تمن البالونات ييجى عشر دقايق كنت كلت فيهم السندوتش وطبعا بتزغرلى لسه كأنى باكول اكلها..دى جبنة بيضة يا أمى..امال لو طلبت لحمة حتقومى تاكلينى بقى..قررت انى انام شوية تانى بس لقيت العيال اول ما شافوا قطة جايية تلقط رزقها من جنبى قاموا جريوا وراها بيرعبوها وعاوزين يضربوها..الصراحة اتقرفت قوى من كده..وقمت لبست الجاكيت وانا بقول للعيال ايه كمية العنف اللى انتوا فيه ده؟...بلاش والنبى العنف مع القطط دوله برضة ليهم عائلات واطفال بيخرجوا زى حلاتنا يدوروا على رزق ربنا..بس كل كائن بيدور على رزقه بطريقته..يعنى مثلا استحالة انكوا تلاقونى واقفة بلحس بقى قودام محل كبابجى وانا باصة للحمة..واللى يشوفنى بعمل كده قودام المحل يبقى يعزمنى على كفتة عشان بحبها..وبلاش نظام ارميلك رغيف وكلى على الريحة قودام المحل جنب القطط..ودمتم
posted by reham @ 5:55 AM
10 Comments:
7amdallah 3lsalama ya rehammmmmmmm
nawrty masr walahy ana mab3rfsh aro7 elhuseen we a3d low7dy kda ashish :P akid 7ad hay7'n2 3la marw7y any way welcome ya sety kan nefsy asm3 good news 3nk bas maybe later isa :D take care ya gamila
bye
عشان كل تفكيرك فى المرتب و الرزق و الفلوس كل اللى مضايقك فى انهم بيضايقوا القطة المسكينة انها مرأة عاملة .... افردى هى ست بيت غلبانة يعنى
انا مش عارفة الناس بتربى عيالها ازاى بجد ... بدل ما هى قاعدة تزغرلك كدا تشوف عيالها دول اللى عملين يأذو فخلق الله ...
و عشان خاطرى بلاش الشيشة دى عشان صحة حضرتكم... ملهاش لازمة ... كفايا على صدرنا هوا القاهرة النقى
memo;hello sweetie ,how is everything? i have read in ur blog that you will go abroad for studying..how is it going so far? by the way , next time i will go to el hussein , am gonna need some company..why don't you join me? and hend also can come
hend,7ader ya hanoud ,wallahi el shisha keda tafarei7 lezoum el fishawy..el marra elli gaya inshallah 7atlob sa7lab bass..we law geity, notlob ma3a el sa7lab tawla..sorry guys for being late to answer , wallahi ma3kouka fee 7agat keda
ربنا يا رب يفك العك اللى عندك و يكرمنى فى بقيت الامتحانات احسن الميكرو كدا بهدل الدنيا .... ربنا يستر ..... ربنا يعينك على العك بتاعك
amein , ya benty ana ba2ali 14 sana bamte7en , ah wallahi..ledaraget enenna law da7'alna el koleya keda sodfa , beya7'douna nemte7en ,aheh 3'alasa ba2a..so2al welnaby , heya el microeconomics bet3od el talaba?
هههههههههههههههههههههههههه
من أجمل الخزعبلات اللى قريتها
بجد بجد بجد برافو
بس كنت عايز أسال سؤال
بخصوص الجملة دى
كائن سلامندر اتحط فى الخلاط بقالوه مليون سنة من ساعة ما اتخرج ومش عارف
يخرج بس بيفلفص
يعنى أية خلاط ...؟؟
تحياتى و تقديرى
يا ريته بيعض .... كنا لبسنا حاجة سميكة تخفف العضة ... بعيد عنك الميكرو دا بشع جدااااااا ز الابشع الدكتورز بتوعه .... 3 العن من بعض ... نقولها مش فاهمين تقولنا هتفهموا فى البيت ... مقولكيش بأة على المعيد ... ساعة و نص فى مسألة واحدة و فى الاخر بعد ما السكشن خلص و قالنا تعالوا سكشن تانى بعد ساعة ونص ... اكتشف انه كان بيحل غلط و اضطرينا نعض كمان عشان نشوف الصح ... اللى احنا بندرسه دا و الله حاجات ظريفة و منطقية بس مس بالكم دا و الوقت دا و الدكتورز دول ... دانا سبت الامتحان بعد ما فشلت جهودى فى الحل و عمالة افكر انا السنة الجية هعيد فى اقتصاد و لا احول سياسة ... المهم ان الوالد قالى انا مليش دعوة بيكى لو عيدتى السنة عديها فى عربى يا أمورة... يا رب يكون بيهزر
ييييييييييييه عندى قانون بكرة و مأساة الميكرو هتتكرر ... دعواتك معانا يا بركة
خاللود:والله منور..اهلا بيك دايما..خلاط= انك تكون دكتور
هنود:ربنا يعدى التيرم ده على خير
شكلك كدا فى الخلاط دلوقتى فعلا
اه والله..حد يكون متوضى ويدعيللى والنبى
Post a Comment
<< Home