مدد

قصيدة جديدة للشاعر الكبير جمال بخيت:


مدد يا صوت عبد الناصر.. مدد يا شيخ حسن البنا

نفسي ف شيء قبل الجنة.. يقوم بأة حزب وطنّا

ونقضي ع اللي مسرطنّا

باموت يا مصر المتباعة

باموت يا مصر المنهوبة



شمسك تسير عكس الساعة

والعين علي العمي مغصوبة

الصفر خَيّم علي زمنك

وعروق رقبتك مطلوبة

علي الحدود قتلوا ولادك

وتقفي ساكتة.. ومرعوبة

مدد يا هيكل.. يا ضميري

مدد يا كامل يا زهيري

مدد يا قاضي يا خضيري

مدد يا مكي يازكريا

يا چورچ إسحاق..

يا مسيري

يا بسطويسي.. يا حرية

مدد يا أجمل أعاصيري

مدد يا قلب الوطن الحر

مدد يا سيرة عوض المر

مدد يا ندهة كمال خليل

مدد يا حلم ندي القصاص

مدد يا خط رؤوف عياد

شقيان وماشي بكل عناد

مدد يا قمح سكينة فؤاد

مدد يا بنت يا مصرية

يا جميلة يااخت بهية

مدد يا شعر العامية

مدد يا صاحبي اللي قاسمته

مدد يا علم اتعلمته

من عم عودة وصدقي عزيز

شباب لبس وش العواجيز

مدد يا سورة إخلاصي

مدد يا خويا وتاج راسي

يا معصراوي.. يا حسيني

مدد يا ست نهي الزيني

يا فجر صبح علي عيني

صالح ما بين نفسي وبيني

وقاللي دي الست القاضية

كشفت عن الألوان زيفها

وخلت الوردة الزاهية

تعيش علي وش خريفها

مدد يا فادي يا اسكندر

علي خطي محمد الأشقر

علي طريق ابن أبوعيطة

جمّع مظاهراتنا مشاعر

ويغير من الهتافات شاعر

يحفظ ديوان لأمين الديب

يلاقي شعب كأنه أديب

عندك ف شعره

بلاد.. تقاسيم

عندك حجازي

وعمرو سليم

والنكتة بوزارة تعليم

>>>

باموت يا مصر المتباعة

باموت يا مصر المنهوبة

شمسك تسير عكس الساعة

والعين علي العمي مغصوبة

مدد يا وائل ويا عيسي

مصر الشباب ع الترويسة

فضحوا الوحوش السعرانة

أكلتنا جامع وكنيسة

مدد يا وائل ويا عيسي

مدد يا «غد».. ويا «كفاية»..

أبو العلا.. ماضي.. معايا

ف طريق ما يعرفش نهاية

إلا بميلاد مصر الحرة

إلا بميلادنا.. ومددنا

وكرامة تفضل لولادنا

مدد يا آية ف سورة العصر

مدد يا تمثال نهضة مصر

مدد يا فيلم صلاح الدين

مدد يا حمّاد.. ويا حمدين

متصدرين باسم الأمة

للمجزرة .. وقوانين سكاكين

للمبخرة.. وقوانين زنازين

باموت يا مصر ومخنوقلك

عبد الحميد شتا مشنوقلك

ميت عشان فرصته بتضيع

لولاد كلاب وولاد جرابيع

ثابتين علي عرش فشلهم

نايمين علي وش عسلهم

سرقوا الرغيف والحرية

سرقوا السياسة الخارجية

ادوا الحرامي.. بنوك الوز

وادوله مصنع طعمه يلذ

وادوله فندق لجل يهز

وادواالحديد لولاد العز

والبورصة محشورة ف جيبهم

والسد لو كنا نسيبهم

بميته وبكهربته

بكره هايدخل ف نصيبهم

مدد يا صوت عبد الناصر

مدد يا شيخ حسن البنا

نفسي ف شيء قبل الجنة

يقوم بأة حزب وطنّا

ونقضي ع اللي مسرطنّا

الليل يتوب عن كوابيسه

وأشوف ف مصر رئيس سابق

والجي ما يكونش وريثه

مدد يايحيي حسين يا أمين

بيخصخصوا الهوا والميادين

بيمصمصوا الناس والفدادين باعوا الطريق الصحراوي

وباعوا أحلام الجامعة

وهتكوا عرض الشرقاوي

وعملوا بيصلوا الجمعة

باعوا وباعوا وها يبيعوا

شيخ الوطن ولاّّ رضيعه

وباعوا صوت عبد الباسط

وشهر يوليه وأسابيعه

باموت يا مصرالمتباعة

باموت يا مصر المنهوبة

شمسك تسير عكس الساعة

والعين علي العمي مغصوبة

هاتي المدد يامني الشاذلي

لاتخافي يوم ولاتتنازلي

وصوري مصنع غزلي

ف الاعتصام العمالي

انا كنت رب العوم.. مالي؟!

مقتول غريق ويّا آمالي

آدي الغريق..

والقاتل فين ؟!

مدد يا عبدالغني يا حسين

صورلي مصر المحتارة

صورلي غرقي العبّارة

مالهومش حد ينجيهم

غرقوا بحاضرهم وماضيهم

البحر مافيهوش قشاية

والملح نار جوه عيونهم

وعيون بلدهم نساية

ومنارة الشط تخونهم

باموت يامصر الغرقانة

باموت يامصر المنكوبة

طعم الحياة كله إهانة

وانتي علي النيل مصلوبة

>>>

مدد يا بنت الإيه يا آلاء

يا حصة الوطن المشتاق

الأولي في علم التغيير

بُشري .. بألوان الطباشير

راسمه العلم ف الصفحة أسير

وبتعلني بقلب الموجوع

إن الوطن ميادين ونجوع

تعبان من الحرمان والجوع

عين المراقب.. غفلانة

عن العيون الإنسانة

بنت الخمستاشر إحساس

بنت الخمستاشر تفكير

بنت الخمستاشر غنوة

علي وتر علم التعبير

عين الملاحظ بتلاحظ

إن العقول جوه قوالب

ما فيهمش خنساء ولا جاحظ

عين المصحح مبهوتة

من الخطوط المفلوتة

>>>

المصحح: يا نهار مقندل مش فايت

مش دي الإجابة المظبوطة

اضبط يا ناظر واتصرف

الناظر: يا نهار مزفت ومدوحس

مش دي الإجابة العلمية

شيلوني هيلا يا افندية

نوصل لحد المديرية

المدير: أنا مش مدير ف القصة دي

وعينيا مش شايفة قصادي

سؤالنا ما فيهوش أمريكا

والبنت هية المحقوقة

وضروري.. قطعا مزقوقة

يا إما حزب الله ف لبنان

يا إما سوريا أو طهران

أو المقاومة العراقية

قوموا بينا نعملها قضية

( ومن الإدارة التعليمي

إلي الإدارة الأمنية )

- آدي سين سؤال

انطقي يا آلاء

منين عرفتي أساس الداء؟!

مين بلغك إن المأمور

بيبوس ف رجلين الأعداء؟!

مين جندك للشيوعية

ولبسك إخوانجية؟!

- أنا ؟!

أنا بنت مصر الحرية

ياديول ديول الحرامية

سرقتوا فرحتي بشبابي

سرقتوا بهجتي بكتابي

سرقتوا من لغتي الأولي

سطور ف كشكول التعبير

خدوا مني صفر علي غباكو

وألف صفر لكل جبان

ماذاكرش درسه عن الأوطان

بتتبني بفكر وإيمان

بتتبني بدفتر مواليد

فيه الشهيد قبل الفنان

>>>

شكر واجب:

فلنشكر كل مخبر

مبلغ عن آلاء

من أول المصحح

للناظر.. للوزير

كشفوا معدن ولادي

وبلغوا الحبايب..

و بلغوا الأعادي..

إن النشيد مازال

هو نشيد.. بلادي