بعيداً عن السياسة (١

بعيداً عن السياسة (١

بقلم جلال عامر ١٨/ ٤/ ٢٠٠٩
أتمنى أن تكف الأرض عن الدوران لأنزل منها واسمح لى يا عزيزى أن أبتعد عن السياسة لمدة أسبوع مضطراً بأمر الطبيب فقد تعلمت أن الفحص الضريبى يؤدى إلى الاكتشاف المبكر للأمراض وأرجو أن تتحمل - كرماً منك - حكايات كاتب «ساخن»... (كان الموكب يضم سيدة حامل وزوجها وشقيقتها وأمها وكان الغرض من رحلتهم أن تلد ذكية فى مستشفى التأمين.. أوقفهم موكب أحد المسؤولين وذكية تصرخ:

- مش بيقولوا الحكومة عارفة كل حاجة فى البلد.. يبقى كان لازم تعرف إن ده شهرى.

قال زوجها:

- يا ذكية اعقلى.. مصلحة الوطن أهم من الولادة.. إن شالله العيل ينفجر فى بطنك مش مهم.. اسكتى أهو الحمدلله عدى خلاص.

قال العسكرى: لسه يا ست ح يرجع تانى.

قالت فكيهة: يعنى بنتى تموت؟

ذكى: إللى يموت فى موكب زى ده يا بخته عند الله.. اكتبها لنا يا رب.

عاد موكب المسؤول فصاح الناس هيه.. هيه.. تهيأت الأسرة للتحرك فقال لهم العسكرى: - لسه يا جماعة ده جاى تانى.

قالت فكيهة بنفاد صبر: الله يخرب............

فقاطعها ذكى: عيب يا حماتى يعنى ده جزاؤه.. إنه بيتعب علشانا ورايح جاى من الصبح.

كان الناس قد علقوا ملاءة وبدأوا فى توليد ذكية وذكية تصرخ لعل الله يرزقها بإحدى الحسنيين أن يعود المسؤول أو ينزل المولود.. فى تمام العاشرة مساء نزل المولود وأسماه أبوه على اسم الشارع الذى ولد فيه وقال العسكرى : إنه راجع تانى.

قالت نعمات: هوه يا أخويا مفيش وراه شغلانة غيرنا هوه رايح جاى كده ليه طول النهار؟.

قال أحد الواقفين: أنا سافرت كتير وعمرى ما شفت مسؤول بيروح وييجى كده على طول.

قال آخر: هوه بيعمل كده ليه؟

قالت فكيهة: يمكن ضرة بنتى مسلطاه.

قال ذكى: يا جماعة.. إحنا ما نفهمش زى الناس دول أكيد هوه شايف حاجة فى الشارع أو جاى يقبض على حد... عاد موكب المسؤول ورجع والناس تصيح فى كل مرة هيه.. هيه.

سمعهم الضابط فقال لهم: يا هانم كل دى مواكب وهمية علشان الأمن والموكب الحقيقى لسه.

سألته فكيهة: آمال الموكب اللى بصحيح إمتى؟

قال الضابط: لا ده لسه بدرى قوى مش قبل الصيف الجاى.

قالت نعمات: تعرفى يا أمه فكرونى بأم طارق لما جت تجوز ابنها طارق قعدت تطبل وتزرغط كل يوم قبل الفرح بسبع شهور علشان محدش يعرف ميعاد الفرح.. ولما جه يوم الفرح اتعاركوا وسابوا بعض.

قال ذكى: أم طارق إيه ونيلة إيه.. خلينا هنا أهو راجع أهو هيه.. هيه

كان المولود الذى وضعته ذكية قد بدأ يكبر ويشارك فى التصفيق للموكب.