منفضة للروح

شوية كلام عاوزة اقوله عشان انفض التراب من على روحى..أولا الفالح اللى لسه بيقول وماله الفقر..بقوله سيدنا على زمان قال ان لو كان الفقر رجلا لقتلته..وكمان قال فيما معناه ان الواحد مش حيستغرب اذا الفقير خرج من بيته شاهر سيفه..اللى بيقول ان الفقر مش مشكلة..ده اكيد لسه حياته واغلى حاجة عنده متحطتش فى المحك
-------------------------------------------------------------------------------------
الناس اللى لما بيكلمونى وهما حامل وخايفين من الحسد..انا بقول انى مش بحسد ولا فى بالى الكلام ده..كل واحد فاكر ان اللى عنده بسبب تعبه وشقاه..كل اللى عندك اصلا تفضل من عند ربنا..ادعيله بس انه ما يختبركيش فى يوم من الايام فيه..عشان اختباره بيكون شديد
-------------------------------------------------------------------------------------
اللى قاللى ان المرض اللى جالى ده سوء حظ..مش عارفة اوصفه بايه..لما اشوف حتعمل ايه لما ربنا يدوقك من نفس الكاس..ادعيله بس انه يرحمك من تجربة المرض فى الغربة والوحدة
-------------------------------------------------------------------------------------
كلام احمد عز الممثل فى واحد من الناس حقيقى جدا..انت ممكن تفقد ايمانك فى الغربة..وممكن من بعد ما تكون بتئوم الصلاة تبتدى تعاقر الخمر وترتكب الكبائر بمنتهى السهولة توصل للقتل والزنا والفقدان الكامل للايمان...الثبات على الدين مش بالشئ الهين فى الغربة ..ربنا يثبت الدين والعقل
-------------------------------------------------------------------------------------
كلام مدام نجوى للدكتور البرادعى فى العاشرة مساء وجعلى قلبى..المكالمة الوحيدة اللى خليتنى ارفع عينى من على شغلى وابص على التليفزيون..قالت الناس تعبانة ..ارجوك متسيبناش..مفيش بيت مفيهوش حد عيان..خليتينى جسمى كله يتهز وعينايا تدمع
-------------------------------------------------------------------------------------
فى بريد الاهرام النهاردة..قصة ريحة الحبايب توجع القلب..توجع القلب فعلا..اكتبوا حاجات تفرح ..شوية
-------------------------------------------------------------------------------------صورة الصفحة الاولى فى الاهرام النهاردة اللى فيها الاهرامات ومن فوقها اللايتنينج..تجنن وتهوس وتستاهل جايزة من الناشيونال جيوجرافيك