حلو برضه

بالرغم من ان الاسبوع اللى فات كان رهيب ...أهو برضه عدى بخيره وشره
انك الصبح تصحى على صوت اجمل طائر فى الدنيا ..مش عارفة اسمه ايه
انى اسمع اغنية اشكى لمين لانغام فى شريطها الجديد وارجع بالذاكرة لوارا لايام المدرسة والشقاوة
ان بن عبد المعبود اللى جبته كان لسه مطحون وطازة جدا
انى اخيرا لقيت شريط ميجرانيل
انى عملت مسقعة تجنن مش شاربة زيت
انى جبت قميص نوم عيالى بس صايع
ان صاحبتى بتضحك تانى
والتانية ابتدت تفك بوزها
انى قدرت ابتسم فى وش الامريكى اللى كان عمال يتفرج على كل الكتب اللى انا بنقيها ولازق فى أفايا
فى ديوان ..اخترت انى ابتسم ومخترتش الردح المرة دى ..كان التليفزيون حيصور وكده ..بلاش انشر الغسيل اودام التليفزيون يعنى
انى شفت واحد شبه برادبيت الى حد ما فى ديوان وكان بيسند لوحة ..كنت عايزة اقوله عنك يا بيه
ان معظم التحاليل اللى بشوفها بتطلع نورمال الى حد ما
انى اخيرا حقص شعرى المقصف
انى جبت كتاب كنت عاوزاه بقالى كذا شهر
ان خلاص شهر رجب جاى ولازم ابطل استعباط واعوض اللى فات
ان تحليلى للفيلم الفرنساوى كان صح
ان محمد اللى من الكاميرون كان بيضحك على اللهجة المصرية بتاعتى
انى شفت احلى عيون زورق فى الدنيا الاسبوع ده
انى اكلت جالكسى بالبندق وعجبتنى
انى جبت بارباطوز لحبوكشة
انى اخيرا شفت فيلم
the painted veil -edward norton
انى سمعت فى الفيلم ده اغنية فرنساوى كننا بنغنيها من ايام المدرسة
انى شفت مصطفى بتاع الكافيتريا اللى فى المستشفى بيشتغل فى النادى بعد ما سابنا..كان نفسه اخود منه شوكوك زى ايام المستشفى
انى عديت على البيسين وعجبتهم الجزمة العيالى البمبة
ان يمكن الكورس اللى فى الصيف ميتعملش