sealed with a kiss

حتى لو معشتش قصة حب
حلو انك بعد يوم طويل تسمع قصة حب ناجحة
انا اتعشمت كده
بقالنا كتير بنتكلم عن الجريمة وعواقبها
والقصص الروسى ومين قرا الجريمة والعقاب
وانا أهوه بقرا الايام دى جريمة قتل كاتباها مارى هيجنز كلارك
ولسه شايفة امبارح
48 hrs on mbc4
يعنى عدانى العيب أهو
قام البروفيسور كمكافأة للكلاس
جاب شريط كاسيت متسجل عليه قصة حب بين اتنين
كننا بنسمعه وبصراحة الكلام اللى بيتقال فى الحدوتة بين الراجل والست فى التعارف والخروجات مع بعض
كان مخللينى مبسوطة وحسيت انى كنت طايرة فى سقف الكلاس
والشريط كله عن الحب بينهم ..لدرجة ان الشريط نور من كترة الاحاسيس والمشاعر
والحب دلدق من الشريط
وحياتهم عبارة عن بوس فى بوس
قلت اخيرا البروفيسور جايب لنا موضوع لايت
قام من ضمن الاحداث الراجل بعت للست تلغراف وفى اخره بوسة
بس التلغراف عبارة عن كدبة انه عيان
قلت اه ه ه ه مبدهاش طالما الكدب دخل وحماتها اتدخلت فى الموضوع يبقى النص الحلو الاولانى من الشريط عدى
والنص التانى الصراحة كنت مكشرة فيه
وانتهى ان الست قتلت الراجل
---------------------------
رجعننا تانى لتحليل الجريمة
أقوله فى التحليل ايه ؟ اسباب ودوافع ؟
اقول له ازاى حصلت الجريمة بسبب الكره ؟
واللا اجيب سيرة سر الحما الباتع ؟
هو ليه بيحب الجرايم كده وتحليلها ؟ وبيقعد يكلمنا عن المحكمة والقاضى والاحكام وقصة الجريمة والعقاب ؟
هو قاللنا ليه
طلع خريج حقوق
بالرغم من محايلتنا ليه انه كفاية بقى جرايم وبتاع
طلب مننا تحليل مكتوب لوجه نظرنا فى الجريمة ودوافعها واسبابها
كان نفسى اسأله هى الست قتلته بمسدس عيار كام
اصل فى الطب الشرعى اللى درسناه كنت بموت فى المسدسات
قام على بختى دخلت لجنة شفوى واحدة بس
وكانت عبارة عن طبق اااااد كده مليان طلقات مستعملة وحية
وخراطيش وبلى فضى صغير ..اللى هييا الشوتس
قام الدكتور قاللى خدى 10 من اللى فى الطبق
وكلمينى عن واحدة واحدة ..طبعا كلهم مختلفين عن بعض
وقعدنا ندعبس مع بعض على كل رصاصة ونوعها ومسدسها
وبتعمل ايه فى البنى ادم وافحصه ازاى كدكتور
واشرح الجثة ازاى بعد الموت
استويت فى الامتحان ده
الراجل اقترح علييا اشتغل فى الطب الشرعى لما اخلص البكالوريوس
بس محبتش..واشتغلت فى حاجة قبلها
الطوارئ والجراحة
اديت لنفسى مقلب يعنى