برنامج :حلة وانا فيها -الحلقة التانية

والله طالمة الحالة مأشفرة شوية خصوصا اننا فى وسط الشهر كده وسحب الكهربا الله ينور ماشى على اخره الشهر ده مع شوية مصروفات عشان اللف بين الوزارة والقصر والمستشفى وتطليع اوراق وتطليع عينى ..قررنا مؤقتا استمرار القشفرة والارديحي لحين ما ربنا يفرجها ..وعشان كده حقول طريقة بسيطة جدا بس اللى عنده مصران عصبى -سورى-قولون عصبى -مصران دى قلبت على جزارة شوية -ما يعملش اللى حقول عليه واللى عاوز يغامر يغامر بقى ده مش قولونى
غريبة ان فيه ناس بتغسل قولونها عشان تخس...طب ما ياكلوا فايبرز كتير وياخدوا زيت خروع ماهو ده بينضف واللا لازم حقنة شرجية ؟
نرجع للطبق الاساسى بتاع القعدة النهاردة ..كلهم بيقولوا افتحوا التلاجة افتحوا التلاجة ..حاضر فتحناها ..لازم يتعمل حاجة باللى فيها ..لقيت كوباية زبادى وشوية دقيق فى كيس كده مركون جنب بقسماط القلى ومعاهم قرص ماجى يتيم
حنعمل ايه بالزبادى والدقيق والماجى؟ كشك على الطريقة التركية
طبعا مفيش بيت مفيهوش بصل ولا ماجى ولا لبن ولا خلاط ..الخلاط ده انا افتكرت انه رمز أبيح كهدية جواز ..أتاريه فرى ايفيكتيف جدا وعملى بطريقة عنيفة وسهل وبسيط وبيطلع الشغل بسرعة و100 100-طبعا كده الخلاط احسن من مليون جوز-بس ما علينا الرجالة برضه مننا وعلينا أو احنا اللى عليهم مش فارقة -وبعدين الخلاط مش بياخود حيز كبير فى المطبخ على عكس الراجل اللى ممكن كرشه بس يقفل ميدان التحليل -ما علينا
طريقة الكشك : زى ما اتفقنا قبل كده اننا مش من أنصار اللى بيحبوا الملح اللى بالكيلو فى الاكل
عشان كده حنحاول نقلل الملح فى الاكل من اجل حياة أفضل
بنجيب حلة متوسطة ونحط كوبايتين ميه وعليهم قرص ماجى وبصلة متقطعة ترانشات مش كبيرة
نسيبها على النار لحد ما تغلى والبصل يقرب يستوى ..نحط الملح والفلفل حسب الطعم بس حاسبوا تتلسعوا من الشوربة اللى بتغلى وسقف حلقوكوا يفأفأ زيى كده وتحوطوا أورال جل -اللهم احفظنا
اثناء البصل ما بيكون بيستوى نكون جبنا الخلاط وحطينا فيه كوباية ميه على 4 معالق كوبار دقيق على 4 زيهم لبن مع كوباية زبادى ونضربهم فى الخلاط لحد ما يبقوا دايبين فى بعض خالص زى اللى على كوبرى الجامعة بالظبط
المهم والحلة بتغلى بالبصل والماجى نصب عليهم الخليط اللى ضربناه يا حرام
ونقلب بقى على طول ونهدى النار خالص عشان ما يتلسعش من تحت
أول ما يتخن زى البشاميل وندوقه نلاقيه استوى -يعنى طعمه مش نيى يعنى مش باين فيه طعم اللبن او الدقيق وبقى تقيل
نحمر بصلة متقطعة رفيع على معلقة زيت صغيرة -أول ما البصلة تصفر وتقرب على اللون اللى بعده نقوم دلقينها فى الحلة بتاعت الكشك ونقلب شوية وبعدين نصب فى اطباق التقديم بقى
طبعا بيتقدم بارد وبلاش الطفاسةاللى بتدفعنا للتلقيط منه وهو سخن
ساعات ناس فايقة بقى بعد البصلة الاخيرة المتحمرة ما تتحط على الكشك يقوموا حاطيين حتت فراخ مسلوقة متقطعة صغير
وساعات ناس فايقة أكتر تعمل الكشك من أوله على شوربة فراخ

المهم كده أو كده الكشك بيطلع طعمه حلو وبالهنا والشفا على قلبوكوا وكل سنة وانتوا طيبين ونلقاكم على خير فى أكلات دسمة أخرى ..بفكر المرة اللى جاية نتقشف أكتر وأعملوكوا...
كاااااااااااااااااات