حفلات وامتحانات

انا مش شايفة الكى بورد من أساسه وانا بكتب دلوقتى
عينايا عليها هالة كده من لخبطة النوم
غسلت وشى مليون مرة بس برضة مسطولة
عرفت بالصدفة -اه والله- انى مفروض أعمل تويفل من 10 ايام كده
طبعا جريت جرى الوحوش عشان ألحق مكان فى أقرب وقت امتحان
حجزت على النهاردة 30 تسعة
ده يمكن تالت تويفل أدخله
الاتنين اللى فاتو خلاص صلاحيتهم انتهت
طبعا اتظبت فيه على الاخر
كفاية الكمبريهنشن اللى فى الاخر دى
كانت عن المهاجرين الاوكرانيين فى كندا
ده اتقرا واتحل فى 5 دقايق تقريبا
انا ساعتها رجلييا سابت
طبعا قودامى براجراف قد كده وعليه 10 اسئلة والست بتقول فاضل 5 دقايق
الامتحان من 677 درجة وكل اللى انا عاوزاه 451 بس
يا رب أجيبهم عشان أخلص
بتحس وانت فى التويفل ان حتى وانت خريج لغات
وبتتكلم انجليش فلة
وليك صحاب أجانب بتتكلم معاهم عنجليزى وفرنساوى وايطالى
بس بتحس انك بتتحول الى حمار فى امتحان التويفل
ده احساسى الان الصراحة
قلت حيروح الاحساس ده بعد ما أخرج من اللجنة
لسه الاحساس ملازمنى لحد دلوقتى
وخايفة يطلعلى ديل وودانى تطول لحد ما النتيجة تطلع
ويغنولى فى الشارع :بحبك يا حمار
فى وسط الهيصة دى انا رحت حفلة مدحت صالح فى المركز الفرنسى
والنهاردة غالبا فيه نصير شمة ..عمرى ما سمعته على الطبيعة
وكل اللى أقوله كده يبصللى كأنى أيليان واللا حاجة
فيمكن يمكن أروح النهاردة لو ما أوغماش علييا بعد
الفطار من الاجهاد وقررت انام واضرب عواف على الحفلة
اللى عاوز يروح هى الساعة 9 ونص بالليل فى المركز الفرنسى والدعوة ببلاش
فيه اماكن تانية عاملة نشاطات كتير فى رمضان
بس انا معرفش لا حديقة الازهر فين ولا فين قصر الامير طاز
مين الامير ده ؟
وفيه اماكن ثقافية كتير تانية عمرى ما سمعت عنها
انا بسمع بس عن المركز الفرنسى وعن الساقية
الباقى معرفهوش
اه الهناجر كمان ممتاز
اذا حيبقى فيه وقت ان شاء الله
يمكن أبقى ألف فى الحسين واللا حاجة
رمضان بيجرى وقرب يخلص
كل سنة وانتوا طيبين
اللى عاوز يطلع حاجة يلحق
واللى مفتحش المصحف لحد دلوقتى زيى كده
مش عارفة يعمل ايه الصراحة
هو 600 صفحة تقريبا المصحف
على حوالى 12 يوم
ممكن 50 صفحة فى اليوم
بس يمكن والله أعلم يبقى رمضان 29 يوم السنة دى
يبقى لازم نقرا ما بين 55 -60 صفحة فى اليوم
ده غير المراجع اللى بنقلب فيها
انا حد دعى علييا واللا حاجة ؟