ليالينا برة فى رمضان: الليلة الأولى

أول خروجة لييا فى رمضان كانت امبارح
لأ مش خروجة عشان ورق وكتب ومقابلة زمايلى فى الدبلون
كانت خروجة ثقافية
عرفت بالصدفة من اخبار الادب ومن الاهرام فى الصفحة الاخيرة
ان علاء الاسوانى فى جوتة يوم التلات
قمت لبست ورحت
اتكلمت معاه فيس تو فيس
شخصية مهذبة جدا ولطيفة جدا
وعرفته بنفسى واتكلمت معاه عن مدرستى اللى طلعت بناته فيها
ومضالى اهداء على يعقوبيان لأخويا دكتور السنان
والامسية ابتدت بقراية بالعربى والالمانى ليعقوبيان وشيكاجو
طبعا الالمانى مش بعرفه بس مستغلستش اللغة ولا الالمان
متعملتش معاهم قبل كده
بس اللى جمبى قالتلى دول مخلصين جدا
يعنى اللى يتعامل معاهم مش حيتضايق منهم عشان هما شعب كويس
كانت ليلة لذيذة ..بس الندوة بتاعته بالفرنساوى فى المركز الفرنسى كانت أقوى بمراحل
الفرنساويين عاشقين للثقافة فعلا
كانت ندوة تهبل فى المركز الفرنسى
بس فى جوته ..كانت هادية وبسيطة
بس انبسطت انى معايا يعقوبيان عليها اهداء الكاتب
------------------------------
مش لاقييا شخصيات تاريخية فى رمضان السنة دى
السنة اللى فاتت كنت بموت فى المأمون
وحبيت حتى الممثل نفسه
وعيطت لما المأمون مات
والسنة اللى قبلها كانت ملوك الطوائف تهبل
بس الامين والمأمون روعة روعة روعة
جزء من التاريخ معرفش عنه حاجة اصلا
انا اول مرة اعرف انهم ولاد هارون الرشيد
بص شوف الطب بيعمل ايه
بيخليك كده مش تبع كوكب الأرض
منفصل عن الواقع
بس لما تترمى مرة واحدة بعد التخرج فى حضن العيانين
بتبتدى تفتح عينيك والروح ترجعلك تانى
انا أول عيان اترميت فى حضنه كان داخللى الرعاية ميت الصراحة
ما علينا
المسلسلات السورى اصلا تحفة
يعنى ربيع قرطبة وملوك الطوائف جامدين
الامين والمأمون روعة
على طول الايام
وتشرق الشمس من جديد
عصى الدمع
أوعدنا يا رب بزيارة سوريا فى يوم من الايام
بلاد الشام دى ليها حتة زيادة فى قلبى
بتدينى راحة معرفش ليه
يمكن ازا روحت دمشق فى يوم من الايام
أقدر أعرف ليه الاحساس ده جوايا ناحية منطقة الشام
أوعدنا يا رب