يعنى خلاص حنقول لقوضة الفيران باى باى ؟

حسيبك خلاص يا حلوة
حسيب قوضتى خلااااااااص
أخيرا بعد 7 سنين طب
وحوالى 6 شغل ومذاكرة زى الحمار فى ساقية
قررت أخرج من القومقوم
وأسيب قوضة الفيران بتاعتى اللى عايشة فيها
حروح قوضة الفيران التانية بتاعت أخويا
ملخومة
بلم الشنطة
وعندى احساس دفين انى ناسية حاجة
شكلى حنسى لولو كده واللا حاجة
بس مش حعرف أسربه فى الطيارة
حيجرى بين الركاب زى المجنون وهاتك يا عض
الشنطة بحط فيها أكل ولبس وأدوية
جبت شوكولاته
وفاضل الشيتوس
مش حطلع مؤتمر ولا زفت
يتحرق الطب
الطب عموما مطلعنيش مؤتمر لحد دلوقتى
الا مؤتمرات لوكال ..أصل الانترناشيونال ليها ناسها اللى بتعرف تطبخ كوسة وتحلى بقرع
ما علينا ...خلينا فى موضوعنا
حروح أزور أخويا
شوية كده وراجعة
كلمة " راجعة " دى عليها قولان
انا ونصيبى بقى
يمكن أحب ألبد هناك شوية واللا حاجة
اهى قوضة فيران فى كايرو
مش فارقة عن قوضة فيران فى ...واللا بلاش
خليها مفاجأة
وعلى العموم
انا بينطبق علييا المثل ده : كان فى جرة وطلع لبرة
أصلى انا كسرتها الجرة دى السنة اللى فاتت..من الخنقة والله
طبعا بعد التكسير قعدت أستكشف كايرو واستكشف كتب غير بتاعت الطب
واستكشف الناس...كفاية استكشاف فى بطنهم بقى
قوووووم ايه
جه فى عقلى بالى
ليه منستكشفش أبعد من كايرو ؟
فروحت ألكس
ووقفت قودام البحر...ليه مستكشفش أبعد من البحر ده ؟
هو الصراحة انا مش حعدى البحر المتوسط
انا باختصار رايحة اااااااااااااااخر قطعة أرض على الكرة الارضية
كل اللى أقول له عليها يضحك
حتى محمد بتاع الجرايد اللى وسيطه على الدستور والقاهرة واخبار الادب
لما سأل انا رايحة فين وقلتله
لقيته تنح وبعدين ضحك قوى
وانا كمان فرقعت من الضحك فى الشارع
أول مرة أركب الطيارة يا عيال
بقالى كام يوم احلامى عن المطار واجراءات وطلوع سلالم ونزول سلالم المطار
وجوه الطيارة
حتى امبارح جابوا فيلم
airplane! on mbc2
ومكنتش عارفة تعمل لاندينج
وبابا أعصابه اتشدت وقعد يقول لأ حتنزل ان شاء الله
وهو بيبصللى وخايف
هو مش عارف انى اصلا بموت فى الفيلم ده
شفته يمكن من 10-12 سنة كده واللا حاجة ..كوميدى جدا
الواحد حيسافر مدة طويلة جدا لحد ميوصل لقوضة الفيران الناحية التانية
على أول بلد بتشوف الشمس فى الكرة الارضية زى ما قريت
يمكن لما أشوف الشمس وهى بتطلع هناك
النحس يتفك
وأعرف ألاقى الاستقرار فى شغل ودراسة تريحنى وتزوقنى لقودام شوية
بالحلال وبما يرضى الله
مش بالكوسة التى تحيط بنا فى كل خورم ابرة
باى باى يا بلوج مؤقتا
اللهم هونه علينا وأطوى عنا بعده
أول ما أخلص من الجت لاج ححاول أدخول على البلوج أسلم عليه
ياللا باى باى
اه ه ه ه والنبى وصيتكم مسلسل قلب امرأة
حد يشوفه ويحكيلى حصل ايه فى أواخر الحلقات
على كومنت أو ايميل
وفى معلومة عرفتها كمان
ان الأميدايست اللى فى 23 ش مصدق الدقى
عنده أبليكيشنز لمنحة مجانية
لدراسة علوم انسانية كتير سواء فى اوروبا أو امريكا أو كندا أو مصر كمان
اللى مهتم يروح
أو يتصل بالدليل 140 ويجيب الهوت نمبر بتاع الاميدايست ويسألهم على الابليكيشن
الاعلان نزل فى الجرنان بتاع الاهرام من فترة كده حوالى 3 اسابيع واللا حاجة
ولسه التقديم مفتوح لحد أواخر نوفمبر على ما أظن
كل حاجة فى الاميدايست عن المنحة دى
ياللا سلام يا جماعة
واشوفكوا على خير
عيد سعيد وكل سنة وانتوا طيبين
:)