خروف العيد جامد وشديد

يحضرنى الان حالا دلوقتى وانا شاممة ريحة لحمة بتتشوى والساعة داخلة على واحدة بعد نص الليل ..كلمتين والله محشورين هنا ..أرحموا دكتور قومين أشهر افلاسه فى جميع المحافل..انا مستغربة مين المسروع ده اللى نادر انه ياكول لحمة مشوية بعد نص الليل ؟..الريحة داخلة من الشباك مع ريحة تقلية على ريحة قلقاس على سمك مقلى..قوضتى تشرف على منور المطابخ مما يصيبنى بالحيرة-بالاضافة للترجيع-حيث اتسأل يا ترى الريحة دى من عند أمى واللا من فين؟ما علينا..الخرفان بقى فى المنور عاملين ريحة عجب عجب..يا رب عدى العيد ده على خير..طبعا نزلت أهرس شوية فى شوارع وسط البلد..مشترتش حاجة طبعا عشان الافلاس وحتى لو مفيش افلاس مش ناوية اشترى اللا بوزو صعيدى والدلع ديديى عشان عندى نقص أملاح..فيلم هى فوضى كان فى نفسى ومعزتش حاجة عليها طبعا قمت دخلته ..والله انا كنت حاسسة انه ممكن يكون أقوى من كده بس كان ماشى مش وحش..فيلم حين ميسرة شكله برضة مش وحش..ياللا بقى كل سنة واحنا طيبين والسنة اللى جاية يا رب ألاقى بروفيسور زى العسل أسجل معاه..يبقى قمر كده ويشرح القلب ويخلينى أخلص بسرعة بدل الولادة المتعسرة اللى انا فيها دى ..قربت أجيب توأم خلاص..بالاضافة الى كل سنة واحنا طيبين أحب أوجه نظر الخروف اللى كان بيزغرلى النهاردة فى المنور ان فيه فيلم لايونز فور لامبز أحبه انه يتفرج عليه قبل منجيب رقبته..مش عارفة حاكول فتة ولحمة السنة دى طبقا لنظام"جعان أفتلك ؟"واللا لأ..هذا يتوقف على قدرة معدتى على الاحتمال بعد أكل السوشى لمدة شهرين