معانا يا رب- الجزء التانى

"أفردى وشك"..الكلمة اللى الست الوالدة كانت بتقولها لى لما حد ييجى يباركلى فى البيت.."والله انا حاسسة انك سقطتى !" الجملة المعتادة ليها موجهة لييا وانا قاعدة فى قوضتى لوحدى وساكتة أو هارية نفسى من العياط..مش عاوزة طب و عاوزة هندسة..محدش ساعدنى فى اتخاذ القرار..ومكنتش أعرف ان اتخاذ القرار أصلا عملية علمية بتقوم على دراسات وجمع معلومات وطرح البدائل واختيار البديل الافضل..عرفت كل ده بعد ما درست فترة فى ادارة الاعمال وادارة المستشفيات..بس ساعتها كنت صغيرة ومحدش وجهنى....حسيت ان أول فرحة لييا بجد بتتسرق من قلبى..أول حلم أتنازل عنه عشان خاطر الناس..والناس دوله أهلى مش اى ناس..يعنى لازم أرضيهم..رضاهم كلفنى كتير وكلفهم برضة كتير..قوى!
كنت فاكرة ان السنين طويلة والعمر كتير عشان اللى معملتوش وانا فى كلية الطب أعمله بعد التخرج...كنت ناوية بعد كلية الطب أخلص كلية الهندسة!..انا نفسى بضحك على التفكير ده..فكرة مجنونة...بس لقيت الفكرة المجنونة دى بتتجسد قصادى فى أيام الكلية..كان لييا صاحبة فى دفعتى مقيدة فى كلية الهندسة وكلية الطب فى نفس الوقت وبتذاكر هنا وهنا ..وأيام الامتحانات كنت بحس ان قلبها حيقف من الاجهاد..وبعد ما خدت بكالوريوس الهندسة مشتغلتش بيه عشان ملقتش شغل واشتغلت بشهادة الطب وبعدين اتجوزت ومسمعتش عنها حاجة بعد كده
زمان كان لسه المام بيتحط فى بوقى..الأهل بيجيبوا كل حاجة..كنت فاكرة ان الدنيا سهلة..وان أحلامى المؤجلة ممكن أعملها بعد التخرج..مكنتش اعرف انى بعد التخرج مطالبة-ولوحدى-انى اجيب لقمة العيش بالحلال من شغلى..عشان كده كان حلم كلية كلية الهندسة جوه قلبى لفترة طويلة..كنت عاوزة أوصله ..أهلى حيصرفوا علييا بعد ال6 سنين لمدة 5 سنين كمان..وايه يعنى ؟..الحلم فضل معايا ليل نهار...مكنش راضى يسيبنى...مش فاكرة قعد معايا الحلم ده لمدة قد ايه..بس قعد فترة عقبال ما فقت منه...اتخلصت من وهمه على دراسة عملتها فى مجال الكمبيوتر والبرمجة خليتنى –بعد ممارسة الطب لمدة طويلة-أعرف ان الطب من أحلى الأشغال الشاقة المؤبدة اللى الواحد ممكن ياخودها
اشترك معايا فى حلم كلية الهندسة زميل اتعرفت عليه فى الشغل..كان من النوع الهادى بس الذكاء بيطل من عينيه ومن تحت النضارة..لما حكيتله على الحلم ده قعد يضحك..قاللى انه كمان كان مهووس بكلية الهندسة ودرس برمجة عشان يفوق من وهم كلية الهندسة...ده شدنى انى أفوق من الحلم اللى كان بيشدنى و يخللينى أسرح فى احتمالات نجاحى فى هندسة اكتر من طب....الحلم ببساطة حولته لشئ مادى..دخلت مجال البرمجة واتعلمت وتعبت ..بس حمدت ربنا انى طلعت دكتور..فرحتى بنجاة عيان أكبر وأحلى بكتير من فرحتى وانا بعمل ديباج للبروجرام!
عرفت من التجربة دى أن أى حلم بتمناه ....لازم أحوله من فكرة فى دماغى الى واقع..والتمن ؟ ..التعب..بس تعب لذيذ..بيوصل لأعلى درجات حلاوته لما بنجح وبوصل للى عاوزاه...دبلومة البرمجة اللى أخدتها فادتنى كتير فى شغلى ..بس من ناحية تانية خلليتنى أسجد لله وأحمده انى بقيت دكتور..بس عشان أبقى دكتور كان لازم أمر ب6 جولات حرة..ماتشات ملاكمة على مدى 6 سنين ..تقريبا بدون توقف..لحد مخدت البكالوريوس
ونبتدى بأول بوكس ..قصدى أول خطوة...ياللا بينا...بسم الله الرحمن الرحيم..تاتا خطى العتبة!