خدمة العملاء و3 حاجات فى دماغى

اتزنقت على كوبرى الجامعة وانا رايحة القصر-ومين ما بيتزنقش يا ولدى ؟ انا طول عمرى مزنوق-..حطيت الووكمان فى ودانى خصوصا وان العربية اللى قودامى كان فيها دكتورة-حاططة الهلال-عمالة بتزعق للى جمبها وبعد فترة قلبت عياط..ركزت فى الاف ام وكانوا جايبين محمد منير..قلت اكيد ححبه فى الغربة هو و ام كلثوم..وصلت البيت اخيرا على ادان المغرب..بعد ما استريحت شوية لقيت فى التليفزيون اعلان منصور شيفروليه لخدمة العملاء..اعلان تحفة وحلو جدا ..العميل فيه بيشيله العامل فى الشركة على كفوف الراحة..بيشيلة بجد..حاجة زى حنان وبوسة الام فى الصورة دى..قمت افتكرت اللى حصللى فى البنك..ناس بتاع يعنى ..حاجة تقرف..المهم وانا راجعة من كوبرى الجامعة اللى كان لسه واقف برضة..افتكرت انى شفت قط مشمشى صغير قودام مستشفى الباطنة فى محل القطط..وفكرنى بلولو القط بتاعى وهو بيبى..وبعدين شفت دكتور ايهاب اللى كان بيدينى اناتومى فى اولى وتانية فى الدرس..وافتكرت دخولى للكلية العجيبة دى..وبعدين افتكرت حاجة عجيبة قوى..لما زمايلى سألونى مرة عاوزة تاخدى ايه ؟..كتخصص يعنى..قلتلهم عاوزة حاجة تلم الجسم كله-وادينى أهوه على وش مدير طوارئ-وكملتلهم كلامى : اصلى يا اما اخود الجسم كله يا امما اخود على مستوى الخلية..وادينى بسيب الجسم كله عشان ابصبص للخلية شوية..هو ايه اللى خلانى ابقى دكتور اصلا ؟..انا حمشى بقى عشان اشوف عمرو اديب اللى بيناقش نقطة مهمة جدا..يذيع الصورة المدبوحة واللا لأ..يا خراشى هو انا ناقصة؟..بس السؤال انهى دبيحة ؟ سوزان واللا الراجل اللى خسر فلوسة فى البورصة ودبح عيلتة واللا الديب اللى الست دبحته فى الغيط ؟..المهم ذيع يا ولدى..مش حتيجى انيل من يوم ما استقبلت عيان مدبوح فى استقبال القصر..يااااه هى دى الايام يا ولاد..هو احنا مش حنام النهاردة واللا حاجة ؟