حول العالم فى تلاتين يوم

ايوة يا سيدى بسمع كلام كريم وبشرب دلوقتى كوكا زيرو أون ذا روكس..اصلى لا مؤاخذة بقالى كام يوم بصحى الصبح أو العصر على صوت الجزيرة وهى بتزف الاخبار..طبعا مصر كان ليها الهبور الكبير من الخرا اللى بنسمعه..قبل رمضان كانت منورة بحريق المجلس..جه رمضان..نورت من يومين بحريق المسرح القومى اللى فى العتبة مع العلم ان الحتة دى تجارية بحتة..كله نازل يجيب لبس العيد ولبس المدارس..ربنا يستر..وانهيار الدويقة اللى سرعنا كلنا واللى سرعنى اكتر ان الواحد سمع -والسمع خير يا رب- ان المقطم كله مهدد بالانهيار والدليل ان فيه صخرة تانية اداءلجت من على الجبل..ده بقى غير بقية الاخبار..قمت نزلت جبت بوزو وقلت اقعد للجزيرة واعدى بالمرة كدة على المسلسلات ..والله الواحد مررتة اتفقعت..بقى انا بقالى ايام وليالى بحاول اسجل الدكتوراة ..وتقوم البت الهبلة اللى كانت بتسرح فى الشوارع من شوية فى بنت من الزمن دة..قال تاخود الدكتوراة وتتكلم كذا لغة لأ وكمان تقرا بالفرنساوى ..يعنى تاخود الدكتوراة وتنضف وتتكلم لغات وتتجوز واد فلة من بنت شوارع لكدة فى 5 سنين..والله ما كان الواحد تعب نفسه..حسبى الله ونعم الوكيل..يعنى 5 سنين تعمل كدة والله دى وسعت أوى ..المهم مفيش داعى احرق دمى..نجيب كيس البوزو ونكمل مع التى فى..ألاقى فراقيع فى الهند وكمان ماريوت باكستان اللى نور..مع كارثة اللبن اللى فيه ملامين جامد وماتين طبعا عيال الصين مستحملوش يا حرام..كتاكيت عندهم اسهال..والواد الصينى فيه كام سنتى ميه ؟ يا عينى يا صين ملحقتش تفرح بالبكين الفين و8 اللا وجالها الزلزال الكبير وبعديها بداية للتهديد للقوة الاقتصادية عن طريق مصيبة اللبن..وبمناسبة الاقتصاد..الأحة الكبرى اللى سمعت عنها بتحصل فى امريكا..انهيار سوق المال الدولى..نهار اسود ويا لهوى ويا رب استر والنبى ..ده الواحد بيدبر الشهر بالعافية يقوم يطلع لى أسد ؟...نرجع تانى من اسيا لمصر ومصيبة الناس اللى اتخطفوا كده أهوه ياللا فى الصحرا..مع تضارب الكلام..مرة رجعوا ومرة لسه مرة فى مصر لأ فى السودان لأ ليبيا لأتشاد...والحمد لله رحلتهم الصحراوية انتهت فى القاهرة اليوم ..حمد الله بسلامة ..بس كان على ايه الخطف بجد ؟..المهم فى ناس اتقتلوا فى الليلة دى عشان الرهاين ترجع..مرورا بمسلسل اسمهان اللى مطير عقول الناس..عمالة افكر فى سوزان تميم خصوصا ان الكليب بتاعها كل سوية على مزيكا على ما اظن..مرورا بالناس اللى كانت بتفطر بسكوت النهاردة عند كشك السجاير فى نهار رمضان..الجرايد جايبة سيرة فراقيع سوريا واللى ماتوا فيها مدنيين وفراقيع لبنان بتاعت النهاردة وحبس ابراهيم عيسى واستقالات فى اليابان..والناس اللى ماتوا على حدود اليمن من الجوع والعطش وهم مهاجرين من الصومال على ما اظن..على مظاهرات فى باريس عشان ساركوزى يخفف من الغلا شوية..على تهديد روسيا لبولاندا بالبتاع ..على حركة البترول بتاعت هوجو شافيز..بس مصر الصراحة نورت مرتين مع انهيار وخطف سواح..بس المصيبة الكبيرة اللى سمعتها انهيار سوق المال الدولى واللى حيعمل كساد وخراب مستعجل وبالرغم من كده زمايلى اللى ليهم ورق فى البورصة مصرين ان الحال عال وكله تمام بالرغم من خسارة واحد منهم تلاتة وعشرين الف مصرى..قال كل دة وبرضة الهام شاهين لسه كارهة جوزها مصطفى فهمى..والنبى هو عمل ايه ؟ مش اتجوز فى الحلال وبعدين طلق مراته التانية احتراما ليها ؟ هو مشى على حل شعرة يعنى ؟..ده علية كرافتات ترود الروح والله ..انا مستعدة أبقى الزوجة رقم4 لراجل بعيون زرقة زى مصطفى فهمى وبيلبس كرافاتات زيية وقمر كده ووشة يرد الروح ويسعدك من غير حاجة بالاضافة انه يكون ناجح وبيراعى حق ربنا وكمان حيدلعنى..والنبى ست عينها لازم يملاها التراب ..أصلها مش حاسسة بقيمة جوزها والله..ناس ليها بخت..ما علينا..على المستوى الشخصى ..انا بلم حاجتى عشان انى راحلة...غالبا حيكون عندى ورك جامد بعد العيد واثنائه-اللهم هونه علينا-..شيكو مختفى ومش عارفة سافر السعودية واللا تركيا..فيكو مش عاوز يتجوز ماجى..أخو حمدى اتقلبت بيه العربية وراقد عندنا فى المستشفى بس كويس الحمد لله ..احسن من كسر الحوض اللى عند جوز رضا..شريف نجح جزء أول أم ار سى اس..عقبالى يا رب انا كمان..عيسى فك الجبس من دراعة عشان كان فيه كسر سكافويد..لسه فلوسنا ما صرفنهاش والقط نايم وخاسس فى رمضان ...جيمى مش سامعاله صوت.....مهند ادانى موبايلة العب بيه سودوكو..حسبى الله ونعم الوكيل..ماجى حببتنى فى الافلام الهندى بعد ما ورتنى فيلم فير زارا..وهو حببنى فى السودوكو..متابعة العيانين جت بفايدة وهم كويسين الحمد لله..محدش فطس...الصيرفى عامللى سمعة حلوة فى المستشفى بالرغم من انه عظام بس بيقول انى بشتغل الصوابع المقطوعة حلو..سكرتيرة الطوارئ رانيا بتدينى رنة كل شوية..فكرتنى انى عاوزة انطلق واعمل كيكة شوكولاتة...كان نفسى اشوف حلقة وائل مع شيخ الازهر بس نمت..الصراحة فوكس موفيز وام بى سى تو عاملين شغل كويس فى رمضان بدل ما تفقع من المسلسلات العجيبة..لسه فادى بيحمللى وينتر سوناتا عشان يديهالى هدية..حينقل على القصر الشهر الجاى...فكرنى بالذى مضى..قريت قصة وداعا ايتها السماء..شكلها كدة حتاخود جايزة السنة دى..جامدة جامدة..خلصتها ولسه انا فى الجزء التلاتة وعشرين من المصحف..الحمد لله كتير من الحاجات اتعملت فى رمضان..معظم الورق المهم بتاعى قربت اخلصه..تابعت مسلسل قصة الامس ويا خميس يا جمعة على الراديو..عرفت اشرب كوكا من عروض المحلات اللى جمبنا..كلت عين جمل اللى بحبة بالرغم من انه ممنوع عشان المرارة بعيد عنكم..تابعت عروض المحلات وجبت حاجات مش بطالة..قريتلى القصة دى اللى ان شاء الرحمن حتاخود جايزة عشان فكرها جامد وبتدور عن توهان البنى ادم فى الكون بحثا عن الله..سبحان الخلاق..مش عارفة ليه لما بسمع عن ايران بفتكر.. الذين قال لهم الناس ان الناس قد جمعوا لكم فاخشوهم فزادهم ايمانا وقالوا حسبنا الله ونعم الوكيل ....173..ال عمران..فيه ناس بتقول ان رمضان السنة دى ملوش طعم..مش عارفة بس عادى يعنى الاكل ملوش طعم..فيه ناس كتيرة قوى خست فى رمضان..رغبتى فى الترجيع اللى جت جديدة السنة دى..ضغطى اللى وطى ووقعت على السلم وركبتى ازرقت غير الحساسية اللى جات لى مع هرش جامد غير نقص الاملاح اللى جالى غير الرغبة الشديدة فى الشرب..بس حنعمل ايه ؟ ما هو رمضان كل سنة لازم نطلع فيه زكاة ونقرا قران ونصوم ونصبر ونراعى صلة الرحم وناكول عند ناس ونوكل ناس ونتفرج على الراديو ونسمع التليفزيون..غير اننا نقرا قصص حلوة..زى اللى قريتها واللى قريته لفضيلة الفاروق الكاتبة الجزائرية..غير ان لازمن كوباياشى يطلع لك فى البخت ويقول لك انا عاوز الورقة دى لأ مش دى دية ..والحاجات دى ..غير ان رئيس قسم الجراحة العامة يتغير وانا مش دريانة..محدش قاللى واحنا فى اواخر رمضان كدة..غير البحث عن الجزمة والشنطة واللبس والاندروير وحاجات الحمام وحاجات الاكل والحاجات الحريمى غير قص الشعر والرغبة الشديدة انى اصبغة وكدة عشان ادارى الشعر الابيض المتوسط..المهم رمضان كان هيصة جامدة قوى السنة دى..اتختم ان فعلا الجار بيراعى حق الجار..والدليل الانذار اللى جة لجارتى اللى فوقى من جارتى اللى قودامى عشان المية اللى غرقت سقفها بدون قصد..رمضان كريم وكل سنة واحنا مهيصين..والنبى كان ايه لزمتها الزحمة دى كلها؟ مش كانوا العيال ينزلوا المدارس بعد العيد ؟ اهوه اللى بيروح دلوقتى بياخود خمس حصص العاب..وبالباقى لبان..ياللا ما نابنا اللا الزحمة والحر الزيادة..هذا وبالله التوفيق..انزل ببالونات العيد يا ابنى