a must see movie

من فترة طويلة جدا حوالى سنة تقريبا مكنتش شفت فيلم عدل..فيلم بجد..ليه راس وبطن ورجلين..ويخليك تفكر وتقعد ساعتين مربوط فى الكرسى..الكلام جه على الافلام عموما واحنا بناكول شوكولاتة من سيموندس مع شاى..مش عارفة التركيبة مش نافعة كده..انا دايما بحب اكول شوكولاتة مع قهوة او نيسكافيه خصوصا لو الواحد مجهد فى الشغل..المهم شربت شاى مع شوكولاتة فيها كاراميل وبندق..شوكولاتة بلاك كمان الصنف اللى بحبه..الميتنج كان عشان نتناقش فى المصيبة السودة اللى عاملها جار فى جاره..البلاوى دى..وكمان ايه يعنى الجار المفترى مش عاوز يسامح الست المسكينة واللى جالها مؤخرا انفصال شبكى-الحمد لله الذى عافانى وفضلنى على كثير من خلقه تفضيلا-..سبب التجمع السكانى عند الست
دى لمناقشة موضوعها وكمان عشان عملنا شيفتات عليها كل واحد يحطلها القطرة مرة..ومفيش مانع اننا ناكول عندها شوكولاتة ولابد نشرب الشاى..خصوصا لو الشوكولاتة من سيموندس اللى فى فينى أو من باشانيل اللى فى المساحة..محدش جاب حاجة يعنى من شبرا؟..المهم جبنا فى القعدة بعد ما اتكلمنا شوية عن الطب وسنينه والعمليات ومين اللى مات ومين اللى فطس والحاجات دى..قوم ايه قالت واحدة من اللى قاعدين..انها عجبها فيلم عربى اتعرض قريب..بصراحة انا مكونتش اعرف ان المستوى الثقافى بتاع الميتنج تردى بالشكل المعفن ده..هوب فجاة الميتنج انقسم الى حزبين..حزب بيموت فى الفيلم ده والحزب التانى حزب وداد ..اللى يعنى بيحب الافلام اللى انا بحبها..عموما مش حطول عشان عاوزة ألم اليلة واخلص..انا لسه من خمسة كده شايفة ترانس سايبريان..فيلم كويس والله..يعنى مطلعتش من هدومى وانا بشوفه..قصة متزنة وليها بداية وبادى وتصاعد الاحداث وكورة بيجروا وراها كل الابطال- وانا أعز الكورة أوى-ونوصل للكلايماكس وبعدين ننزل على مفيش..عشان معرفتش الفلوس اللى فى الاخر دولارات واللا ايه الصنف..عشان الرؤية كان متعثرة شوية..فيلم يتشاف بجد..غير كده يعنى مفيش اللا برنامج توك شو واحد بس يتشاف..القاهرة اليوم ...امبارح كان يوم رومانسى قوى على شط النيل-المشوار المعتاد على كوبرى الجامعة-..الهوا كان طرى والناس محترمة بعض قوى على الكوبرى..وانا الووكمان فى ودانى والاف ام مظبطالى منير..والمغرب داخل كده ..وعربية كارو بتكسر عليك ..يعنى كان منظر رومانسى طحن..امبارح على المغرب النيل قلت عليه انه حيوحشنى..النهاردة الصبح بقى كنت فى موود نيلة خصوصا وان اوراقى لسه ما خلصتش- يا لهوى-..الصراحة كمية الورق اللى انا طلعته محتاج معيز تيجى تنضف..المهم ..هما كام فيلم تمام ممكن يتشافوا..فيلم كاراميل اللبنانى وفيلم ترانس سايبريان- والله الواحد مفروض يقرا القصص واروايات الروسى -وفيلم حيتعرض قريب يا حبايبى..اسمه قص ولزق..فعلا يستاهل انه يتشاف..فيلم قبلات مسروقة جميل بس حاسسة انه محتاج حياة اكتر..مش عارفة ليه كده..دايما الايام دى الحياة أقوى من أى رواية قريتها..وأقوى حاجة فى الحياة انك تساعد حد بكل قوتك..عشان تخللى حياته اجمل..بحمد ربنا على القدرة دى اللى خلاها جوانا