حتة بخمسة

بقرا كتاب جديد عن كيفية تقليل النفقات الشخصية الايام دي .. هو حلو .. مش عارفة ايه اللي فكرني بالكوافيرة وليه ربطت بينها وبين مكان كنت بدرس فيه لدكتورة في اليابان .. صورة المكان اصلا مطبوعة في ذهني بصورة عجيبة ..مع انه من اقل الاماكن اللي روحت اشتغلت فيها بارت تايم .. كنت اون كول في المكان ده ، لو حد اعتذر عن التدريس الخميس اروح انا .. المهم تقليل النفقات وترشيد الاستهلاك من الاولويات في حياتي دلوقتي لحد ما حياتي تتعدل ..حتكلم النهاردة عن تقليل النفقات ، بس مش اوي عشان تقليل النفقات بيختلف من انسان للتاني علي حسب امكانياته واسلوب حياته ..حتكلم عن الكوافيرة ومكان التدريس .. آخر مرة روحت الكوافير كان يمكن من ٣ اسابيع ، عملت حاجات عبيطة قامت الكوافيرة - بعد نظرات طويلة - : مش حنقص شعرنا بقي ونصبغه ؟ آخر مرة كانت من ٣ شهور .. قمت ربطت بين كلامها وبين آخر مرة لما قالت لي ان الحال نايم مش زي الاول عشان ظروف البلد فقمت بعد ما قصيت وصبغت وسشورت وكويت اديتلها ٥ جنيه في ايدها ، مع انهم قليلين علي المجهود اللي عملته بس دي امكانياتي حاليا خصوصا وان صاحب المحل لهف مني اكتر من ١٠٠ جنيه .. المهم بعد آخر مرة دي وترشيدنا للنفقات - خصوصا وان الكوافير اخد مني اكتر من ١٠٠ جنيه عشان صبغت بالرغم من اني انا اللي جايبة الصبغة - وبالرغم من كده دفعت كتير ..اومال لو هو اللي عمل كل حاجة كنت حدفع كام ؟ ١٥٠ ؟!.. المهم قلت انا ابقي اصبغ لنفسي ولو لحوست نفسي ايه يعني اهوه كله فداء لتقليل النفقات .. بس آخر مرة حسيت ان الكوافيرة بتشحت بطريقة غير مباشرة .. وافتكرت ساعتها صاحبة المكان اليابانية اللي كنت بدرس عندها يوم الخميس اون كول .. مش فاكرة الدرس كان علي كام الساعة او الساعتين ، بس اللي فكراه كويس اوي الموقف الغريب ده .. انا كنت بركب اتوبيسين عشان اوصل لمكان الشغل وبعديه انزل امشي ١٠ دقايق عقبال لما اوصل للمكان وافضل اطلع سلالم لحد ما يبان لي صاحب وفين وفين لما ألاقي نفسي باخود نفسي علي الكرسي .. والتلميذ يتأخر استني .. يرزل اصبر .. ينكت اقوم ساكاه .. قمت بعد ما خلصت حصتي ، خرجت عشان اخود حسابي خصوصا واني بشتغل بالحصة .. قامت حاسبتني ومنقصة ٥٠٠ ين من حقي ، وده بالمصري حوالي ٢٥ جنيه .. قلت لها ليه ؟ قالت لي عشان انتي بارت تايم .. حسيت بريحة نتانة في كلامها .. قلت لها ده اتفاق ولازم تحترمي الاتفاق يا اما مش جايية تاني.. كلمة مني علي كلمة منها قالت لي انا عارفة انك حترجعي بالاتوبيس ، خدي ١٠٠ ين زيادة - بدل ال٥٠٠ اللي من حقي-عشان تعرفي ترجعي بالاتوبيس .. يا بنت الكاااالب !!.. هو فيه كمان ولاد كلب في اليابان ؟.. قمت - بالرغم من قلة ادبها وهي بتديني ال ١٠٠ ين عشان رميته علي الترابيزة قودامي - اخدته برضة وانا بحسبن عليها .. وفكرت اذا قدمت فيها شكوي ، حيبقي الحق معاها وانا الخطأ علييا خصوصا واني مش معايا تصريح بالعمل بارت تايم من الجامعة .. وعشان الدرس ده ، روحت تاني يوم الجامعة وعملت الاجراءات اللازمة للعمل بارت تايم عشان اقدر اضمن حقي .. وانا اللي كنت فاكرة ان في اليابان اتفاق جنتل من ومش لازم نكتب حاجة ، اتاري لازم اكتب كل حاجة بدل ما ياكلوا حقي .. قال ١٠٠ ين قال عشان اروح .. ده انا باخود ٢ اتوبيس وبيكلفوني ٢٤٠ ين ياللي بتستعبطي .. دعيت عليها طبعا وانا مروحة وقطعت المكان بالرغم من فقداني لتلميذتي .. اينعم ربنا عوض من ناحية تانية .. بس افتكرت ازاي ست مفروض انها بيزنس وومان اتعاملت معايا - مهما كانت ظروفي- فانا دكتور وبدرس دكتوراه برة بلدي يعني اساويها واساوي ١٠ زيها .. بس الاصل الواطي واطي في اي حتة ..افتكرت ازاي بمنتهي قلة الذوق اديتني جزء من حقي اللي هو ١٠٠ ين - يساوي ٥ جنيه مصري- وازاي انا اديت الكوافيرة بمنتهي الذوق ٥ جنيه ك اكسترا ماني ليها نظير ادئها لعملها اللي بتاخود عليه اجر .. بس اقول ايه .. علي الاصل دور حتي في البيزنس ..