سبع صنايع
طبعا كل اللى يجى البيت عندى حيلاقى دلوقتى جنب الجرايد و الكتب ,شرايط فيديو..ايوه يا سيدى هيه دى ..اهه شرايط الطبيخ ..سؤال يطرح نفسه :طب ليه بتعلم الطبيخ دلوقتى ؟..عشان أبقى بطبق الاقتصاد (و الله مش البخل)فى بيتنا ..طب ليه بردوه؟اصلنا مش مقتنعين..عشان معييش فلوس: استريحتوا ؟ نفسى اعرف بتضحكى ليه يا منى لما بقولك انى بطبخ؟و الله ده الطبيخ شبه الوقفة فى العمليات ..بس الفرق انى اذا ما لبستش المريلة فى المطبخ "نو بيج دييل" بس اذا نسيت ألبس الماكينتوش(ليه يا ربى الماكينتوش ده مش بيتاكل؟)فى العمليات بتلحوس بالدم ..دهوله يعنى و ببقى بايظة خالص ..اخر انتاجى ايه؟ شوربة العدس مع بصل اخضر ..و ردا على التساؤلات اللى وردتى من صحابى ,حرد عليكم اهوه و اكشف شوية اسرار من مطبخ ريهام:جيبوا حلة +شوية عدس اصفر ملو كبشة أو اتنين+قطعوا بصلة+توم+طماطماية ..حطوا ميه على كل ده و حطوا الحلة على النار..من30-45 دقيقة حيبقى كل ده بالوظة و دايب كله ..سيبوا الحلة لما تبرد..اضربوا كل اللى فى الحلة فى الخلاط و شوية زيت خفيف يكونوا فى حلة تانية على النار بيتحمر فيهم لسان عصفور ..و اللا بلاش ده عشان أنفلوانزا الطيور..خلوها شعرية ..لما الشعرية تتحمر حطوا عليها المضروب فى الخلاط و سيبوا كل ده على النار لحد لما الشعرية تستوى وبالهنا و الشفا
posted by reham @ 10:21 AM
4 Comments:
اشكرك علي الوصفة البسيطة... حقيقي كان نفسي أعد أكلة عدس لنفسي...و كمان اكلات غيرها لاني مغترب عن الوطن و الاسرة و زهقت و مللت من المطاعم و الكافتيريات
ياريت شبابنا يدخل المطبخ و يتعلم الطبخ حتي يعتمد علي نفسه لانه يوما ما سيكون مسؤلا عن نفسة و ربما عن أخرين اذا ربنا وفق في مشروع الزواج و تكوين أسرة جديدة
تحياتي
مجبرة اختك لا بطلة
يا بنت ال ايه عرفتيها ازاي دي .
ما هذا الهراء يعني ما تكتبى وصفه تكون شوربه عدس فين الاكل الدسم يا بنتى انا الكلام ده ميملاش عيني خشى بقى الرز والطبيخ والحركات دي انا اصلا بحب الرز اوى
انتى بتعرفى تعملى رز حلو ولا على اد حالك ؟\
This comment has been removed by the author.
Post a Comment
<< Home