خمسة - سياحة

رجعت من مشوارى
قلت انزل اشترى الجرنان اهى حاجة اتلهى فيها
عقبال ما الغسالة توقف
وكمان اجيب ميه معدنية لزوم السفر
انا مش دلوعة انا بشرب عادى من ميه الحنفية
بس لما بشرب من ميه السفر
جمبى بيوجعنى
وممكن يقلب على مغص كلوى والعياذ بالله
انا فى الطوارئ لما كان بيجيلى عيان مغص كلوى
-انا بحترم الألم عموما ومش بخللى العيان بتاعى يتوجع على قد ما بقدر
كنت بديله الكوكتيل بس بفكر هو ليه بيتألم قوى كده ؟
اتارى المغص ده من ابشع ما يكون
والله اخر مرة جالى
قعد معايا من الفجر لحد قرب عشرة الصبح
ولا اى علاج نافع معاه
لدرجة والله كنت بلبس وبحضر نفسى انى اتحجز فى المستشفى
لولا انى مكنتش حتى قادرة انى اقعد
والالم مش ماسك جمبى من ورا لأ كمان قلب على المثانة والمنطقة كلها كانت بتموتنى
وطبعا كان فيه ترجيع
ما بدهاش بقى ...اخدت حقنة كورتيزون وامرى لله عشان على الاقل اعرف اقعد فى التاكسى
او العربية
او اعرف اقعد من اساسه
اخدتها من هنا..اقل من 5 دقايق
كل حاجة راحت لحالها..ودخلت نمت زى البيبى عشان الليوميتاسين نيمنى الصراحة
المهم -لما نزلت الشارع افتكرت البرنامج ده وانا بشترى الجرنان والميه
عشان والله فطست فى الشارع ..نزلت قورب صلاة الضهر
يعنى الشمس عمودية على قفايا عدل
لفيت شوية على الجرنان-الدستور بيخلص بسرعة دلوقتى
وبصيت على كام اعلان
وجبت الميه وشفت عروض الاسعار
دى الخمسة السياحة بتوعى فى المنطقة
رجعت البيت طبعا سايحة فى عرقى
وكنت شفت النجوم فى عز الضهر والله
برغم نضارة الشمس..عينيا بتزغلل وبشوف فلاشات
دى نجوم الضهر اكيد
بجد فعلا دى مش موجة حارة جايالنا من هنا واللا هناك
ده الجلوبال وارمينج كلام بجد مش هزار يعنى
وادينا شايفينه عملى فى الشارع أهوه
المصيبة بقى ان المشاكل كلها حتبقى على الميه
عشان السخونية دى حتبخر الميه
وحتخللى حتة أرض ناشفة طوبة
وحتة تانية فيها سيول وكمان تسونامى
المشكلة بقى انى لسه قارية فى الدستور بتاع النهاردة
ان ممكن دول حوض النيل
بالبلدى الدول اللى بيمر عليها النيل قبل ما يوصلنا
يعنى كمان منابع النيل والبحيرة الكبيرة اللى بتعملها المطرة على الجبل
والله مش فاكرة لا اسم البحيرة ولا الجبل
المشكلة بقى ان الدول دى ممكن تكون عاوزة تاخود كفايتها من الميه-مع نقصانها بسبب الاحتباس الحرارى
وكفايتها دى يعنى نقص الميه ليينا كمان
يعنى كمان مولدات الكهربا
يعنى الزراعة وشرب الميه
يعنى حياتنا فى المدينة
والانتاج والصناعة والسيما
يعنى الكهربا اللى موجودة فى كل حتة
يا خوفى لا الاحتباس الحرارى يأثر بردوه على الموجات الكهرومغناطيسى
أهو بقى ساعتها كل حاجة تقريبا حتقف
وحنقعد تحت التوتة
توتة ايه بقى ؟
حنقعد فى اى حتة زى خيبيتها
ويمكن منلاقيش ضوليلة واحدة توحد ربنا
ابه التشاؤم ده ؟
بس كل كلامهم على 50 سنة قودام
ومرة سمعت 10 سنين قودام
ومرة سمعت ان الاحتباس حيعمل تأثير على سنة 2010
مش عارفة
المهم ساعتها ربنا يستر
يا عينى عليكوا يا ولادى
اللى بفكر اجيبهم يعنى لما أتأهل كده
ان شاء الله