برنجان

والله من كام يوم كده اتفرجت على العاشرة مساء واول مرة اضحك فيها ..كانت حلقة عن الاكل..بس بجد حلقة جامدة واللى اتقال فيها كان علمى بجد ..اصل انا درست ايام المدرسة تدبير واقتصاد منزلى ..والله الحاجات دى بتنفع..المهم جاوبت الناس على احسن طريقة لعمل المسقعة..قالت الاول ننزل السوق نجيب البرنجانة الطويلة شوية مش مدورة اوى عشان دى نتاية -كلام عجيب-يعنى اقول للراجل عاوزة برنجانة دكر..المهم عملت كده واشتريت برنجانة واحدة بس-اه والله-مطولة شوية وبصيت عليها من تحت لقيتها فيها حتة بيضة زى ما قالوا...قلت دى الدكر اللى مش مليان بزر..غسلتها وقطعتها بالطول مش بالعرض..قدحت الزيت قوى وعليت التليفزيون على اى اغانى وفضلت اقلى البرنجان ..وعملت دخان وبتاع والشفاط شغلته طبعا..افتكرت شيماء لما وصلت امريكا فى شيكاغو-علاء الاسوانى..المهم طبعا صفيت البرنجان المقلى من الزيت فى المصفة..جبت كام فلفلة وقليتهم ..ممكن كنت اقلى برارس الاول قبل البرنجان بس الصراحة ملقيتش فى البيت..المهم بعد كده جبت شوية زيت وتوم وطماطم مقطعة وظبت المسقعة..بصوا بقى هى فعلا مش شاربة زيت..عشان البتنجانة دكر مفيهاش بذر-حد عارف اشترى نوع كابوريا ايه؟اللى فيها لحم يعنى ؟الدكورة واللا الستات ؟--وكمان عشان قطعتها بالطول مش بالعرض-على الواقف يعنى-وكمان عشان غليت الزيت وشيلت البتنجان اول ما احمر على طول وكمان صفيته من الزيت - ..