وما الدنيا الا متجر كبير

خفت على نفسى ان الجملة دى تنطبق علييا
اصلى بسمعها كتير قوى الايام دى
بيقولوا ان الدكتور ساعات مش بيبقى عنده ملابس داخلية
سمعتها والله فى التليفزيون
طبعا قمت جرى على دولابى
لقيت بجد الكلام ده حقيقى
قعدت أقول همما جم بصوا فى دولابى واللا ايه ؟
من ساعتها جرى بحث مميت على التليفون مع انتيمتى
يا ترى حنجيب ملابس داخلية من فين ؟
وأهم من كده بكام ؟
طبعا حنبقى هوطل لو فكرنا فى اللانجيرى
فكرنا فى القطن المصرى حبيبى
قعدت هى تغطس وتقب وتطلع محلات عجيبة كده
وأسعارها فى السما
يا بنتى انا لازم ألتزم بالميزانية
اللى كلها تقريبا ضايعة على الكتب والجرايد
بس عاوزة اجيب حاجات قطن رخيصة
طب نسافر المحلة...محلة مين ؟
طب نروح العامرية..أفندم؟
رسى العطا على ملابس داخلية كارينا...ومالوا
طيب انا عاوزة قمصان نوم عشان انا البيجامات مش طايقاها فى الصيف الرهيب ده
ندور هنا وهنا..مفيش اللا حاجات ستات كوبار واحنا عاوزين حاجات عيالى يعنى
المهم تدويرة فى وسط البلد على مصر الجديدة على الهرم على هنا على هنا
خبطت فى محل فيه طلبى
كأن مصمم قمصان النوم شاف مخى مخطط ايه من جوه
وعمله تنفيذى على الواقع
انبسطت قوى
وسعره كان مناسب جدا وكمان قطن مفيهوش بولي ايستر
عيالى بس لذيذ
الست اللى بشترى منها وشى خير عليها
جت فتحت بدرى قمت نطيتلها
وقعدت أنقى براحتى
جم الناس اتلموا والحرارة فى الجو بتزيد
قعدت تقول أووووووف
طلبت شاى ..وانا لسه بنقى
قالتلى انا حقفل بدرى وامشى يمكن دلوقتى
يعنى أشهل يعنى ؟حاضر
الست بصراحة كانت عاوزة تقفل باب رزق عشان اليوم ده بالذات
كان فيه ناس كتير
والستات اللى حوالييا بينقوا وشايفننى باخود حاجات مقفولة بكياسها من غير قياس
ومش بفاصل فى السعر
ابتدى الكلام بيننا
-انا حامل وشكل قميص النوم ده مش حيمط معايا
لا يا ستى خديه على ضمانتى حتخديه وتدعيلى
-انا عندى بنت فى حجمك يا ترى ده مقاسه جميل ؟
والله ده واسع علييا كمان
-ألوانه بتطلع فى الغسيل ؟
لأ واذا خفتى اعملى زييى انقعيه شوية وبعدين اشطفيه
راجل بقى جه وسط الستات...عدو واللا حبيب؟
شكله غلبان ومطحون بس مش صايع
يعنى جاى وسط حاجات ستات بيعوك ايه ده ؟
لقيته تايه وشفت فى ايده دبلة شمال
اه بيدور على حاجة للمودام
-لا مؤاخذة
ايوه..عشان المدام بتاعتك؟
-اه..انا اسف
لا ولا حاجة ..بص ده مش لذيذ طالما هى شبهى ..خود دول على ضمانتى
وخد فعلا كذا واحد
الست صاحبة المحل قاعدة بتعدل دماغها بكوباية شاى
وسايبانى بلعب
ابصلها ألاقيها بتبتسم..ماشى الحال؟
جت جمبى ضحكت وقلتلها ..ها كنتى عاوزة تمشى النهارده؟شوفتى وشى حلو عليكى ازاى ؟
ردت علييا ..ان شا الله دايما وهى مبسوطة وشكل مزاجها اتعدل..ابقى تعالى كل يوم
مش انا اذا كنت بياع أو تاجر مش كنت حنفع برضه؟
وفيها ايه ؟ واللى يتعرف علييا ويفتح بقه ويقول ايه ده ؟ دكتورة ريهام؟
أقول له لأ مش انا ..انا ست أبوها
ولازم ساعتها اتنكر فى لبس بياعة من الصعيد
وأحوط وشم على دقنى..طب والله حنفع
انا كنت حتى فى نبتشياتى بيجيللى عيانين كوتار
لدرجة ان تمريض الطوارئ بيفطس
سبت المستشفى ونقلت شوية على القصر العينى
نبتشيتى بتقلب مستشفى الطوارئ كلها
وبيبقى الاستقبال معجنة...وزميلى لما ييجى يستلم مفيش اللا كام عيان ييجى
اللا زميل تانى شبهى كده ..نظام بيستقبل اتوبيس واقع
لورى خابط فى صف عربيات
طبعا الحمد لله مش بنطلع اندال معاه وبنساعده
لحد منفطس احنا كمان
بس التجارة حلوة جدا
مش عاوزة اللا كام قاعدة تطبقها
-ابتسامة لذيذة فى وش الناس..وانا بيبى فيس ابتسامتى مش وحشة يعنى
-ابص مباشرة فى وش الناس وانا بكلمهم..ولو كلمت واحد بس لازم ابص له فى عينه
-الحماس..أنقل الحماس للى حوالييا ..لو حمست اللى قصادى حيشترى حتى لو ما كانش عاوز
الحماس أصله بيعدى
بس البضاعة بتاعتى كمان لازم تكون ايه وان
بس برضة برجع وأقول سبع صنايع