بنلف فى دواير

يعنى شوية فوق وشوية تحت
حلوة الاغنية دى بتاعت مروان خورى ..بس قبلها كل اغانى قصر الشوق تجنن
الايام دى لما بسمع اغنية فيلم عجميستا ..مع كلام خالد ابو النجا وصاحبه فى الفيلم مع صوت الاغنية
جسمى بيقشعر..خصوصا لما كانوا جايبين سيرة المرتب اللى لازم اعيش منه واربى منه عيالى
عشان اخليهم احسن منى
وافتكرت حديث لسيدنا رسو ل الله عليه الصلاة والسلام
معناه ان الواحد لازم يسيب لعياله ميراث عشان ميشحتوش من الناس
الحديث ده أول مرة اسمعه والله السنة دى
كل كلامه كنز..ولما سمعت الحديث ده مبقتش عارفة اعمل ايه
دكاترة النقابة عملوا مظاهرة سلمية قودام النقابة
رافعين يفط ان اساس مرتبهم 48 جنيه
انا الاساسى بتاعى 40 جنية
وبيوصل بكله..خصوصا بدل عدوى..الذى يضم بدل عدوى ايدز وفايرس سى وبى
اللهم احفظنا
الحمد لله الذى عافانى وفضلنى على كثير من خلقه تفضيلا
بيوصل الى 208 جنية
يعنى أورث لعيالى ايه ؟ عيش حاف مثلا؟
المهم الاغانى دى فيها كلام بيفكرنى بحاجات والله مش عاوزة افتكرها
بس بلاقيها بتطلع
واحدة من اشباح الماضى
عروض الجواز
اول ما خلصت الكلية و خوفى من قاعدة النيابات اللى الديابة بياكلوا فيها بعض
وخوفى على مستقبلى
كنت حاسة -خصوصا بعد الظلم اللى جه علييا فى سنة خامسة
انى نزلت فى اوطى حتة من دايرة الايام
وده اتأكدلى لما طلعت من مولد النيابات بلا حمص
حتى قاعدة النيابات مكملتهاش-ديابة مسعورة
ومحدش بيحترم وعده للتانى قبل القاعدة
لما خرجت من القاعة طلعت على عم مصطفى
هو عارف..بعمله علامة بيعرف انى عاوزة شاى
اهوه يجبلى الشاى ..مرة يقوللى امتحانات برضة؟ وده لما يلاقينى سرحانة
ومرة يقوللى شاطرة..ده لما ياخود من قودامى كوباية اللبن
المهم لما قعدت هناك قولت ديتها ايه ؟ تكليف فى الارياف؟
مش حستلم
قام طبعا ..فى ناس بيحبوا يصطادوا فى الميه العكرة
جالى عرض جواز من زميل لييا
قاللى كده فى وشى مرة واحدة
انا مستعد اكتب كتابى عليكى وتقدمى القسيمة فى الوزارة عشان تيجى القاهرة
الحمد لله انى شفت ناس كتير على حقيقتها
ومختارتش الحل ده
عشان اللى بيتكل على بنى ادم مش بياخود اللا الخرا
بس انا اتكلت على الله
ومشيت فى حال سبيلى
بعد الكلام الواطى ده بشهرين
جالى تكليف بتعيين فى مكان كويس الحمد لله
قمت خرجت من حتة الدايرة الواطية
وطلعت فى العالى
ولما وصلت للقمة -فى نظرى
عرفت انى لازم انزل-كنت حاسسة والله بأن النزول جاى
وأهوه فعلا حصل
بس ربنا فرجه قريب
وانا فى اوطى حتة من دايرة الايام تانى
جالى عرض جواز شبه الاولانى ده
طب انا عاوزة بيت واولاد وحياة كاملة
أقوم ألاقى الدبان بيهف علييا كده ؟
ناس واطية