أهو هنا

مش كل شوية بقولكوا التوتة التوتة؟
أقعد تحت التوتة
أشرب شاى تحت التوتة
و توتة توتة وبتاع ؟
أهو انا بقعد هنا لما ما يكونش فيه عيانين
باقعود على النمل بقى ..ذنبوا على جنبوا بهشوا مش بيمشى
بمسك كتاب فى ايدى
او بمسك كوباية شاى
أو بمسك نفسى بدل متخانق
أو ساعات بقعد وخلاص واتسطل من الهوا
وساعات باكول توت اسود منها بس خلص
والتوت الابيض الكلب بياكله
مال كل الحيوانات اللى فى حياتى بياكلوا حاجات عجيبة كده ليه؟
لولو بياكول خيار -القط بتاعى
والكلب-مسمتوش لسه-بياكول توت
مش حسميه عشان اخر مرة كنت حسمى كلب
قام واحد مؤذى ابن كلب ضربه على راسه بالشومة
وسابوه ينزف لحد ما مات
زعلت قوى عليه والله
هو أينعم كلب كان محتاجلى انا عشان احميه
مش هو اللى يحمينى
بس حبيته جدا عشان كان طيب ولذيذ وكان بيتدلع علييا وبياكول اى حاجة
يوم ما مات حسيت ان قلبى انقبض
بعديها بكام يوم جالى خبر العامل اللى اضرب بالعربية ومات على السكة
انا عارفة نفسى لما قلبى بينقبض كده ..كنت حاسة ان فيه حاجة حتحصل
لما سمعت الخبر قعدت قريت سورة المائدة بحس عالى مش فى سرى
لحد دلوقتى مش عارفة عملت كده ليه ..وليه السورة دى بالذات
بس حسيت بعدها ان قلبى هدى واتطمنت