يوميات طرقة عمليات
أعرفكوا بنفسى..اسمى طرقة..وبيدلعونى ويسمونى كوريدور..كوريدور اسم فرنساوى..أصلى فى الاصل فرنساوية..مبنية بايدين فرنساويين..ولما خلصت سلموا المفتاح للناس اللى حتشيل الشغل من بعديهم ..بفتكر كلمة اتقالت وهما بيسلموا المفتاح: ابقوا ورونا الشطارة بقى فى ادارتكم للطرقة...وأهوه من ساعتها وانا على حالى ..لا بلاطة زادت ولا بلاطة نقصت..يشيلوا بيبان يحطوا بيبان..أنا زى ما انا..ثابتة زى ابو الهول ..يا ما هرست دكاترة ودكاترة هرسونى..الايام دى كل الاجيال جديدة اللى بتيجى العمليات..زى ما بيقولوا ان كل غربال جديد ليه شدة..كل الدكاترة الجراحة الجداد عاوزين يسبتوا انهم مجدع..بيهدروا طاقتهم على الفاضى..ولما ييجى وقت الجد بيكونوا فطسوا خلاص..وهى الجراحة ايه اللا اتخاذ قرارسليم فى الوقت المناسب بالظبط؟..امبارح سمعت كلمتين بين اتنين دكاترة جراحة واحدة ست وواحد راجل..كانوا عندى فى الطرقة..خرجوا بعد ما قلعوا الجاونات وبيقلعوا الماسكات فى الطرقة..ايه كل القلع ده ؟..
الدكتور للدكتورة: ايه اللى فى خلقتك ده ؟ بيتادين؟
الدكتورة: بيتادين ؟فين ده ؟
الدكتور: على خدك
الدكتورة: مفيش بيتادين على وشى ..هو انا عقمت وشى واللا ايه ؟
الدكتور: طب امسحيه
الدكتورة: ما انا مسحته...اهههههه يا ابنى دى خد
ودى الحمرا من صهد العملية اللى كنا غارزين فيها...
وبكدة نقدر نعرف ان الدكتورة دى زميلها معندوش نظر ..
posted by reham @ 11:21 AM
4 Comments:
و لا فاهمة كلمة واحدة
الفيلسوفة الطبيبة بعد التحية
1- عذراً مرة أخرى " Disconnected has occurred"
2- كافكا هو واحد من أشهر كتاب الرواية فى القرن العشرين ؛ حيث كان يكتب -بالألمانية- الرواية التى تندرج تحت روايات " الموقف" ؛ بينما كان "ديستوفيسكى "يكتب روايات " سيكولوجية"
3- الله الله على " طرقة عملياتك....اسلوبك اكثر من رائع"
وهذه " الطرقة " يمكن أن تصبح مجموعة "رائعة" من القصص القصيرة ، حيث تقوم الطرقة بدور "الراوى" .
سوف تعيد الينا مثل هذه المجموعة من القصص القصيرة إبداعات يوسف ادريس فى " الشيخ شيخة" حيث كان البطل ومحور الاحداث يجرى امامه كل شئ ؛ فالجميع يعتقد أنه لا يعقل شيئاً مما يرى ..
" وكذلك المبدع الطيب صالح فى "عرس الزين"
فالجميع ينظر الى "الزين " على انه "المبروك " ، فى حين يشعر القارئ أنه "روح القرية " ..
وفى مجموعتك المقترحة ، سوف يكون امامك مساحة "شاسعة" - نفسياً وليس بالمتر المربع _ لكى تتجولى فى نفوس الشخصيات وتسعدينا
شكرا جزيلاً
نبيل
hend : hi sweetie , how are you ?فينك من زمان ؟ عاملة ايه فى الترم التانى ؟..معلش لو مش فاهمة انا اسفة..اسألينى ايه اللى انتى مش فاهماة وانا اشرح على طول ..بس بعد ما انا افهم اللى بيحصللى فى المستشفى
nabil :والله ححاول اكتب كويس...مرسى على المعلومة بتاعت كافكا..بس عشان اكتب كويس لازم احاول كذا مرة واقرا كتير..انا حاليا بكتب اللى بيحصللى من قلبى وطالما عاجبكوا حكمل كتابة بدل ما يحصللى حاجة من اللى بشوفه
والله انتى عارفه كتاباتك دي على اى حال وباي شكل احلى حاجات قريتها فى حياتي
انا اصلا مبقراش ولا بحب اقرا بس ابتديت اقرا لما شوفت موضوع ليكي صدفه وانا بدور على صوره احمد حلمي في فيلم جعلتني مجرما
Post a Comment
<< Home