تانى يوم فى الطوارئ

الطوارئ مكنتش بفارقها خالص...كل ايامى هناك حتى لما بقيت فى الادارة كنت بارضة مسكاها..دلوقتى كل حاجة اتغيرت..التمريض ظألط بطريقة عجيبة لكن لما قعدت شوية فى الطوارئ فى انتظار حالات اليوم الواحد-واللى مجاش منهم اللا البواسير-لاحظت ان معدل هبوط العيانين والحوادث علينا قل جدا-احسن والله-بس طبعا بركاتى لما بتحل على المكان بتجيب فى ديلها حاجات-أهو ارتشاح رئوى على نزيف فى المخ على توقف فى القبل-طبعا راح التمريض باسنى وقاللى اقعدى فى قوضة مدير الطوارئ وانا اقول طب أبص بصة وهما راسهم والف سيف لأ ..كان نفسى اشوف حالة بترجع دم عشان الطقم يكمل..بقالى كام يوم بفكر فيها ..الكوابيس راحت خلاص لما نقلت على الجراحة العامة..امبارح بعد طبعا ما ختمت الكارت-ختمتك يا بيه-يبقى الواد واقف ويسيبنى اختم الكارت فى المكنة بنفسى..طب انا ايش عرفنى انى ختمته صح؟ ادينا بنلعب..نزلت بعدها الطوارئ طبعا عشان اليوم الواحد لازق فيها هى والرعاية..ليه كل عيان بطنه بتوجعه بيحب يمسك ايدى ويتكى قوى؟..طبعا فافصت من ايد العيان وشفت النبض وجسيت باطنة..طوبة بس غالبا مش التهاب..لسه حطلب سونار أو مقطعية وشوية تحاليل لقيت الاسعاف هوب شاله على مكان تانى..طبعا ده أثار تسأولات فى دماغى على حالات الاكيوت ابدومن..فكرت فى كذا احتمال بس كان لازم مقطعية وفحص الشرج-تانى يا دكتور؟-مشى العيان وسرحنا شوية فى تسجيل الدكتوراه وافتكرت دكتور اليابان بقى الله يرحمها..قلتلهم انا نزلته من ماستر لدبلومة ومعنديش استعداد اكمل فى رسالة عقيمة بغرض الحصول على الدكتوراة وانا عندى 47 سنة ..مش طالبة معايا حرقة دم انا عندى قدرة على الاحتمال..وهو الدكتور الكويس ايه اللا انه بيكمل قراية؟ هو لازم دكتوراة؟..فكروا فى كلامى وببعض المنطقية الكلام معقول وموزون خصوصا اللى خلصوا الدكتوراة بعد كفاح سنوى لمدة 7 سنين..مش والنبى كان وهم ؟..حبل رابط الواحد على مفيش..الرك على التشخيص الصح والتدخل الصح فى الوقت الصح والعيان بعد العملية يبقى فلة...غير الطوارئ والعمليات-اللى كننا مستنيين اى حالة تيجى وعلى راى زميلى..احنا النهاردة عاملين زى اللى بيصطادوا سمك..احنا واللى يطلع لنا..طيب..كان عندى اسهال طول اليوم..لما رجعت بالمترو لقيت نفسى مجهدة كدة ومفياش نفس..وانا على السلم افتكرت انى طول اليوم مشربتش ميه وانا عندى اسهال