فى المعجنة بتاعت الايام
أسبوع مش عارفة أوصف شكل امه بايه..مش عارفة أقول ايه واللا اعيد ايه..ابتدى بتليفون بتحديد معاد امتحان..مذاكرتش عشان انا مش عارفة طبيعة الامتحان ايه..ده الاسبوع التانى لييا فى المستشفى القديمة..حالة من التوهان وعدم الاتزان..مش عارفة راسى من رجلى..كله بيجرى حوالين بعضة فى هرجلة..مفيش حل اللا انى احدد اتجاهى بتاعى انا بس وامشى فيه..حبعد عن الاورام شوية عشان خلاص مش قادرة..حروح ارض الجراحة العامة والطوارئ-يا قلبى لا تحزن...اتصال من اسامة عشان اروح شرم انقل عيان انستابل من هناك لمصر بالاسعاف مش بالطيارة كمان..تبعه بمكالمة تانية من شرم برضة بنتناقش فيها عن نقل عيان اتعرض للغرق وتانى اتعرض لازمة قلبية وتالت عنده سكر مدهولة وكلى وكبد وقلب مطرقعين..دخلت امتحان كمان فى المستشفى عن الانعاش القلبى الرئوى..يا جدعان ما انا اشتغلت حوادث وعناية فترة طويلة فى التكليف..لأ لازم تاخديها لحسن فيه جزا 50 يوم..احه..ماشى ..طبعا الدورة بعد الشغل..العيال بيستظرفوا قوى ومسمينها البريود..لذاذ قوى مش كده؟ حفرقع من الانبساط..طبعا بنقعد نفقر فى الدورة..بنام على روحى ..مش عاوزة اشوف جثث على سراير..نفسى اعمل حاجة للعيان عشان يخف..ماى أيم اذ ذا كيور..من ساعت ما رجعت والعيانين جابولى اكتئاب..بفرح لما تجيلى واحدة ست عندها ورم حميد فى صدرها..بمسك نفسى من العياط مع العيان اللى بيعيط فى العيادة-عشان عامل توصيلة القولون على الجلد ومكسوف لحسن ريحة تطلع وبيحط كلونيا وبينضف نفسه وهو عمال يعتذر وان ماسكة نفسى من العياط..لو طبطبطت عليه يمكن اعيط ومش لازم كده لازم ابقى دكر شوية..بيصبح علييا فى القسم وبيدعيلى قبل ما ياخود الكيماوى..نفسى أقوله يدعى على اللى بالى بالك -..او اللى بتجيلى وأفحص صدرها وألاقى سرطان قد كده وبقالها شهر واللا اكتر بتتعالج غلط..نفسى ومنى عينى أقعد شوية فى الطوارئ..ملعبى القديم..بس انا عارفة نفسى لما بحب..لو دخلت فى دوامة الطوارئ تانى مش حطلع منها..خلينا نركز شوية فى شوية جراحة عامة وعيانين يخفوا ان شاء الله..أدينى من بكرة ان شاء الله حنزل جراحة عامة لحد لما ربنا يفرجها..البروفيسور اليابانى يا خسارة قاللى انى اترفضت من التسجيل معاه عشان مليش مكان..قدموا قبلى 4 وانا اخر زفتة..وقعت من قعر القفة وطبعا ده خبر خللى يومى واسبوعى اسود والله..عياط وصداع وكوابيس بالهبل..ناس بتموت وبعمل حادثة بالعربية وبدبح قطة..النيلة دى..جاللى الخبر اصلا قبل ما انزل امتحن فى المركز الفرنسى..والله عقبال ما ركزت فى الورقة اللى قصادى كان فات وقت كتير من الامتحان..كنت ماسكة نفسى من العياط على بختى بالعافية..بشرب يانسون بالهبل عشان اهدى نفسى...أدى الاسبوع ده..صداع وتوهان فى المستشفى وامتحانين..واحد فرنساوى والتانى عن الاسعافات ورفض من التسجيل والقوضة اللى تقريبا خلصت...ايييييييييه دنيا..ما د
ايم اللا وجه الله..اه عندى عزا بكرة عشان السعادة كلها تكمل..وبدعى على نفسى انى اموت
posted by reham @ 10:08 AM
2 Comments:
الاستاذه الفيلسوفة الطبيبة ..ريهام
تحياتى وتقديرى لهذا الاسلوب الرائع فى تناول "يومياتك".
لقد دخلت إلى المدونة الخاة بك " بالصدفة" ...لكننى قضيت " مع يومياتك" وقت رائع امتد الى ما يقارب الثلاث ساعات .
لا أعرف بماذا أصف تأثير كلماتك ؛ لكن كل ما أستطيع قوله: اننى كنت عائداً من زيارة الطبيب ، لأننى أعانى من دوار وصداع"بسبب الضغوط الحياتية اليومية أو- المعجنة بتاعة الايام " كما تسمينها أنت ، ولكن بعد قراءة يومياتك شعرت بارتياح نفسى"لا أعرف سببه ولكن أعرف مصدرة ( كلماتك).
نبيل
باحث دكتوراه فى الاقتصاد
يا أهلا بيك والله تنور يا أهلا وسهلا
Post a Comment
<< Home