endless day
اليوم النهاردة طويل جدا وملحقتش اتغدي ..فيه اقتراح اني اتعشي سمك مقلي بس طبعا ده يساوي حموضة واني اتكبس وانام واحلم بكوابيس ..حشيل نصيبي لبكره للغدا ان شاء الله .. ابتدي اليوم اصلا الساعة ٤ الفجر صحيت مع دقات الساعة ولا فيلم الرعب .. صحيت بدري اوي عشان نمت بدري اوي علي تمانية بليل كده مع الفراخ .. ملقيتش حد رمي الزبالة بره علي الباسطة ، خرجت الزبالة وقعدت بصيت علي شريط الاخبار لحد ما كبس علييا النوم تاني بعد ما سمعت الزبال جه وشال الكيس بتاعي بعد ما هبد الشيلة كالمعتاد علي الباسطة .. نمت وصحيت مذعورة علي الساعة ٩ .. يا لهوي دكتور السنان !! اديتله معاد اروح علي ١١ بس الطرق كلها واقفة والجو رطوبة عالية وخنقة .. الغريبة ان الشوارع الي حد ما كانت هادية وده شئ كان كويس .. لاني عادة في الطرق الزحمة بحب اقرا فيها حاجة ، فلما لاقيت الطرق اوكيه ما قريتش حاجة لاني مخنوقة ومليش مزاج للقراية خالص .. بقي معنديش خلق زي زمان للاسف .. يمكن عشان فترة ضغط واني قررت اني اشد الحزام واللا عشان دكتور الدايت مانع عني الشوكولاته وبعض لوحدي في الكوفيرتة لما بكون عاوزة شوكولاتاية ؟.. هي حالة قرف زيادة عليها اني بقالي كل يوم الصبح تقريبا بعيط علي حال البلد بقالي اسبوعين كده ومن ٣ ايام دعيت علي نفسي بالموت بقي عشان نجيب من الاخر .. لاقيت اني مكبرة الموضوع علي نفسي لما روحت العيادة .. قعدت مع السكرتيرة ساعة بنتكلم عن كل حاجة تقريبا وده خفف من التوتر بتاعي لاني بقالي فترة بسمع بس لدرجة اني اتشحنت ومش بفرغ الشحنة عشان كده قررت اني ارجع تاني للبلوج عشان افرغ الشحنة بدل ما افرقع .. خوفت ان ده يكون بوادر اكتئاب بجد وقلت لو الموضوع ما اتلمش حروح للدكتور خصوصا مع الدايت ممكن تبقي نفسيتي تعبانة او مجهدة ز ي لما الجسم بيجهد من كترة الشغل وعدم الراحة ..السنة دي متعبة بظروفها واخبارها اوي بجد .. لما جه وقت الكشف بتاعي عند دكتور الاسنان لاقيته هو كمان داخل علي بوادر اكتئاب وبيقول انه بيحاول يتعلم مني التفاؤل ..والله استغربته بصراحة وقلت له علي الشحنة اللي جوايا .. قال لي الحل هو البحر بيغسل كل حاجة .. انا فكرت في الحسين بس فكرة البحر قائمة لما الميزانية تتعدل شوية لان الميزان دلوقتي مايل كده ..اسافر لما يتعدل كده ..يحينا ويحيكم ربنا .. صورت اشعة للمتابعة ونضفت الاسنان وكتبلي العلاج واستلفت من مكتبته كتابين علي الله الحق ابص فيهم كويس قبل ما اروح المتابعة التانية .. كتب جت له من فاعل خير عن سيدنا محمد وجزء من التاريخ الاسلامي خصوصا في فترة الحروب ..انا استريحت انه بيتكلم عن سيدنا محمد .. بقالي كتير للاسف ما قريتش في الدين .. وبقالي فترة طويلة للاسف ما قريتش المصحف .. مع اني حافظة حتت كتير منه بس الدرمغة اللي احنا فيها من اول السنة والله مخلياني مش مرتبة حياتي خالص ..قلق وخوف مسيطر .. شوية فوق وشوية تحت ..موج عالي وتوقعات وترقب ده غير العياط بقي ..خرجت وروحت السوبر ماركت عشان اجيب جبن لماما تفتح نفسها عشان هي مش بتاكول كويس اصلا بقالها فترة .. او بتاكول قليل جدا فقلت اجيب لها الحاجات اللي بتحبها يمكن تاكول كتير .. جبت لبن بالفراولة لنفسي .. كان هافف علييا بقاله كتير الصراحة .. شربت من هنا وحسيت اني بقيت مبسوطة .. الفراولة اصلا دي من الفاكهة الرائعة بتعمل بهجة جامدة بجد او راحة نفسية .. المهم ريحتني ..خلصت المشتريات وبابا كان بيعمل شوية حاجات قريب وقال لي حعدي عليكي اخدك .. لاقيته حاطط علي الكنبة قط ابيض في اسود صغير من الشارع .. ولاقيته متنرفز اوي ..عيال قولالات الادب مش متربية ، لا تعليم ولا تربية ولا اخلاق .. بيشوطوا القط الصغير ده وهو بيحاول يهرب منهم وجي يستخبي العربية كانت حتاكله ..قمت شيلته وحطيته علي الكنبة ومن ساعتها وهو نايم .. بصيت عليه لاقيته عنده نقص في الاكل طبعا وشكله عطشان اوي اوي ..بينهج يا حرام من الجو بتاع النهاردة الوحش والجري من العيال الصغيرة .. لما حس بالامان نام .. دلعته شوية عشان اشوف درجة الوعي عنده بدل ما يكون بيموت .. لاقيته بيلعب ويهزر ويعضعض في صوابع ايدي بس ضعيف اوي من قلة الاكل .. اخدته البيت واول ما ماما شافيته زعقت طبعا لانها مش عايزة قطط في البيت خلاص بعد ما لولو مات ايام يناير ..شربته ميه وشوية لبن ..شرب من الميه كتير لحد ما عينيه فتحت و لما حطيت اللبن شمشم فيه كأنه بيدور علي امه وشرب حبة بسيطة وخلاص .. هو كبير ومفطوم بس طبعا عاوز مامته او حد يعوضه عنها ..ماما ما ادتنيش فرصة اني حتي احميه ..خرجته علي الباسطة وبعد كده اختفي ...شوية وكملت شرب اللبن بالفراولة واكلت معلقة كشك فلاحي بحبه جدا .. وطبعا قعدت علي الكنبة ملياش نفس لقراية الجرايد .. بصيت علي شريط الاخبار وخلاص بقي وبعدين لاقيت الحياة بتجيب اخبار ورا بعض علي الساعة ٣ كده .. بصيت علي الخبار دي مع بصة سريعة علي الميل بتاعي والفيس بوك .. مفيش اخبار زيادة ..قلبت كل ده وأنتخت شوية علي الكنبة وشربت ميه كتير جدا علشان الجو وحش اوي بجد .. عملت كام تليفون واتأكدت ان جلال امين جاي في الشروق .. نزلت تاني وحضرت جزء بسيط من الندوة وقلت اخرج اتمشي في الزمالك لان اه الكلام حلو بس مفيش جديد وكويس ان فيه ناس مقتنعة ان فيه شبهة مؤامرة في الموضوع بس كل الناس عاوزة الخير لمصر .. طيب اومال مين اللي بيعمل الاعتصامات والاضراب والمسيرات ؟ .. كفاية خير البورصة المنيل بنيلة .. ما علينا .. رجعت البيت بعد ما اشتريت شوكولاتة ولما مقاومتي تنهار ابقي اكول منها .. الحمد لله نفسيتي اتحسنت اكتر ومشي ٢٠ واللا ٣٠ دقيقة بمد فيهم فادني اكتر ..بس اكتر حاجة ظبطتني النهاردة هي الفراولة :)
posted by reham @ 12:04 PM
5 Comments:
ههههههههه بعد الشر عليكي ال نجيب من الاخر ال خلى فى شويه تفاؤل يا حجه مش كده
بتعيطي ليه بس مهي البلد زي الفل اهي ايه يعني البورصه خسرت ولا ولعت تعيطي ليه انتي هما خدوا من مرتبك
هو لولو مات !!!! وايام يناير كمان هو من الثوار الاحرار ولا ايه
فكرتيني بموقف كده حصل كان فى اطه عندنا فى الشارع ولدت قطقوطتين صغنتتين تحت بير السلم بتاع بيتنا بس صاحب البيت كان جايب عمال يهدوا حاجه كده ويظبت فى السباكه المهم اخويا غير مكان القطط امهم جت تدور عليهم قعدت يوم تدور عليهم بعد كده اخويا راج جاب كرتونه وحط الفطط فيها وحطهم ادام البيت عشان تشوفهم المهم مين شافهم الاول الواد حسن
ده واد صغير تخين بس عسول اوي لو عرفت اصوره هبقى اصوره
المهم لم العيال وقعدوا يلعبوا بالقطط وامهم مش عارفه تاخدهم فضل الحال ده طول اليوم وبعد كده مبقتش عايزه تيجي تاخدهم مش عارف ليه واقفه بعيد ومفيش حد عند القطط وبرضو مش عايزه تاخدهم انا استغربت المهم عدى يومين على الحال ده وانا راجع من الشغل بليل ببص فى الكرتونه لاقيت اطه واحده بس دخلت سالت اخويا فين التانيه قالى البقاء لله اتدايقت اوي بصراحه والتانيه دي مصريها زي اختها برضو قولتله طيب ليه يابنى ماكلتوهمش قالى امك جابت اللى بره دي وشربتها شويه لبن بس ياعيني هما كانوا صغيرين اوي ومغمضين مش بيعرفوا يشربواامي كانت جابت علبه قطره صغيره وحطط فيها اللبن بس معرفتش تشربها كتير المهم انا بعد ما غيرت وخلاص هدخل ادردش مع اصحابى على الشات عمال افكر فى القطه الجو كان برد كنا فى الشتا والقطه عماله تعيط المهم طلعت جبتهاكان فى عين مفتحعه والتانيه مقفوله مش عارف مقفوله ليه المهم قولت الفها باى فوطه كده عشان تدفى بس هيا مكانش عندها اى طاقه اصلا بقالها كزا يوم مش بتاكل المهم مسكتها فى ايدي عشان ادفيها وقعدت على الشات كنت شغال اكتب بايد واحده واصحابى يقولولى انت بطيء ليه مرضتش اقولهم كانوا هيتريقوا علياالمهم ايدي وجعتني بس لو حركتها القطه هتعمل صوت وتصحي البيت كنت عامل زي اللى عامل عمله المهم ابويا صحي الصبح وجه بيكلمني داريت ايدي ورا الكمبيوتر هو مش متخيل دي كده المهم ايدي اتحركت القطه عملت صوت قالى ايه ده قولتله دي القطه وشاورت براسى بره هو عارف انها ادام البيت قالى طيب المهم مشى ومخدش باله بعد كده امي صحيت واول ما سمعت الصوت اتخضت قالت ايه ده فى اطه فىالبيت المهم وريتهالها وقولتلها دي هتموت حاولى تشربيها شويه لبن المهم اديتهالها ونمت بقى عشان اعرف اروح الشغل كانت الساعه 8 الصبح المهم قومت على العصر كده سالت عليها قالولى احطنا شربنها لبن وطلعناها بره فى الشارع ادام امها قولت ماشى روحت الشغل ورجعت كانت ماتت
امبارح برضو كان يوم طويل معايا كان فيه حاجات كتير اول حاجه صحيت من النوم الساعه 7.05
امي كانت بتوصل اخويا الصغير المدرسه كانت صحتني الساعه سبعه الا ربع بس انا نمت تاني وراجعه البيت بتخبط جامد على الباب بتقولى انا عارف انك هتنام المهم قومت جرى غسلت وشى مكانش فى وقت اخد شاور على السريع حتى المهم نطيت فى البدله قالتلى تشرب حاجه قبل ما تنزل كنت متفق معاها تشترى موز ولبن وتعمل عصير بس امبارح اخويا الصغير شرب اللبن اللى هو اول امبارح يعني ومتبقاش اجلت موضوع العصير المهم قالت هعملك كوبايه حتى انا الشطيان لعب فى دماغي منا كده كده هتاخر يبقى تاخير فى تاخير واشرب اللبن بالموز المهم عملت كوبايتين ضربتهم بسرعه ونزلت جرى كالعاده الشارع اتزحم من اول ما المدارس بدائت مبقتش بلاقى توك توك فاضى لحد المترو وقفت شويه المهم وصلت الشغل متاخر واليوم اللى قبله انا مشيت من غير ما استاذن من المدير لانه مكانش موجود وتليفونه كان على المكتب مش معاه ومعاد الشغل التاني جه لما وصلت سلمت على زمايلى المدير بصلى بصه كده روحت سلمت عليه وابتسمت قولتله سورى انا مشيت امبارح كان عندي مشوار مهم منا مش معرفه بقى انى شغال شغل تاني
قالى منا استغربت لاقيت ماشى وسايب ال tap على المكتب لو حد حب يأذينا كان اذانا اعتذرت وقولتله انشاء الله مش تتكرر تاني طبعا ملحقتش اجيب شندوتشات من محمد توفيق لان كان عليه زحمه وانا مستعجل - محمد توفيق ده محل الفول والطعنيه اللى فى شارعنا - كنت شبعان فى بدايه اليوم بس مع مرور الوقت ابتديت اجوع وبيني وبينك الاكل هناك غالى ولازم ابعت الاوفس بوي يشتريلى اكل من تحت عشان مينفعش انا انا انزل من البنك بس مكانتش دي مشكلتى المشكله اني نمت امبارح فى اليوم ده الساعه 3 بليل وصحيت 7 والطبيعي اصلا اني انام 2 بدل 3 فرقت معايا الساعه دي فضلت اشرب في نسكافيه بس مش جايب معايا خالص بقيت باصص للحاجه اللى بعملها ومش عارف انا بعمل ايه اللى يشوفني يقول ماشاء الله الواد مركز وشايف شغله بس ربنا كرمني بعدها وفوقت حتى البرنتر والكيرن عملوامشاكل فى اليوم ده وعملت كول عليهم وعلى ما الشغل مشى كانت الساعه جت 2 بعد الضهر كان فى شويه حاجات عايزه تتراجع جبتها وقعدت على الجهاز اللى فيه النت وفتح البلوج اشوفك كتبتى حاجه ولا ايه لاقيت المقاله اللى قبل دي بس ملحقتش اقراها كان لازم اخلص الشغل قولت اطبعها واخدها معايا اقراها وانا فى الشغل التاني البرنتر مكانتش متعرفه قولت مش مشكله بكره اقراها الشغل التاني ده بقى حواراته كتير ورخمه مش لازم احكيها
شوفتى بقى يا ستى الفرق بين كتاباتك وكتابات اى حد تاني اهو اللى انا حكيته ده هو ده اللى ينفع تسميه تخريف او دوشه
لا يا عم اسلوبي انا احسن ..ههههههههههههه
اللي يشوف اسلوب غيره يهون عليه اسلوبه
انا عايز اعرف لولو مات ازاى
خد طلقه خرز فى ديله ايام الثوره ولا ايه
Post a Comment
<< Home