دعوات صيفية

الصيف خلاص على الباب
نفسى مرة تانية اشوف المنظر ده من شباك القوضة بتاعتى فى الاوتيل فى الكس
نفسى فى نسمة هوا لذيذة منعشة من غير صداع نتيجة الشمس طول النهار
نفسى فى كتب ومواضيع وافكار جديدة
عاوزة ايس كريم معمول بضمير
عاوزة اروح مسرحية كوميدى محدش بيموت فيها
عاوزة اشوف افلام ليها قصة
واسمع اغانى جديدة عشان تتغنى كاريوكى
مش عاوزة موتور الميه يضرب
ولا الاجهزة تهنج
ولا السيستم يجو داون
وحتى اذا قامت الدنيا تانى زى الصيف اللى فات
مش عاوزة اعيط يا رب
مش عاوزة اشوف ناس محروقة فى اول صفحة فى الجرنان على الصبح واعيط وانا بشتريه
مش عاوزة استقبل ام تموت وابنها يسألنى ماما سكتت ليه
مش عاوزة استقبل ناس محروقة وتموت فى ايدى
ولا اطفال واقعة من الدور ال17
ولا عيان مش متشخص غلط وجاى فى المرحلة الاخيرة
عاوزة اجيب تى شرتات روشة
مش عاوزة استقبل حد مضروب سكينة فى الكبد وافضل اتابعه فى الرعاية لحد ما يموت
يا رب صاحبتى متطلعش عندها
SLE
يا رب حد يتجوز السنة دى
نفسى حابوكشة ييجى بالسلامة وميكونش عيان هو كمان
عاوزة اجيب له بارباطوز لونه ازرق من هايبر وان
ونعملله سبوع محصلش
مش عاوزة اسمع خناقات
ولا اعرف ان حد بيعمل عملية
وحتى اذا كان فيه
summer course for biz admin
يا رب الدكاترة يبقوا كويسين
يا رب اعمل بريزنتيشن كويسة
يا رب المتحانات تبقى حنينة
واقدر استحملها عشان مفطسش
عاوزة استعمل الصبغة بقى عشان الكام شعرة بيضة دول يختفوا
نفسى احضر محاضرات وندوات عامة ومتفقعش
من اسئلة الناس
عاوزة اقعد مع ناس جديدة حتى لو مشاكلها بسيطة
بس اتعرف على ناس لذيذة
ويا ريت ميعرفوش انى دكتور
عاوزة اتعلم طبخة جديدة
عاوزة ارتب المكتبة
عاوزة فنجال قهوة معمول بضمير وببن بجد
مش اى حاجة محروقة والسلام
مش عاوزة اسمع عن جرايم قتل تخللى دماغى تغلى
عاوزة احضر حفلة بيانو لعمر خيرت فى الساقية
وتكون على النيل
ويكون الهوا جميل واتسطل كده واعرف اصورها فيديو بالكاميرا عشان اشيلها على الكمبيوتر
او على يو تيوب
يا رب الصيف ده يبقى هادى وحتى لو كان سخن
هونه علينا يا رب